Read gitonga 2 Pedro 1 Bible Online

2 Pedro 1 - gitonga bible

2 Pedro 1

¹Eni, Simoni Pedro, khumbi ni mupostoli wa Jesu Kristo, nyi ngu mi lovelani lidangalila enu mwatshavbo mu hakhidego gukhodwa nya gululame nga ogu gwathu, khu guvbanyiswa hi ningwago khu Nungungulu ni Muvbanyisi wathu Jesu Kristo.

²Wuhigo ni gurula gu na engedzelane gu dandra ga enu, khu guti Nungungulu ni Jesu Pfhumu yathu.

³Tshivba ya Nungungulu yi ngu hi ninga satshavbo hi si vbwetago gasi hi vbanye khu mavbanyelo nya yadi nya gutsakise Nungungulu, khu guti wule a hi ranidego guta hengela wudhumo ni wuwadi waye.

⁴Khu guralo, uye a hi ningide siningwa nya sikhongolo nya lisima a nga hi tumbisago, gasi hifela gu vbulugiswa ga mapimo nya gupfhungumule ma fumago tigoni, hi kodza gu hengela tumbunugoni gwaye nya wunungungulu.

⁵Khu guralo, gu vbwetega muri ni gukhodwa, gukhodwa mu gu tadzisa khu wuwadi, wuwadi mu wu tadzisa khu guti;

⁶guti mu gu wonegisa khu gu dzi phara; gu dzi phara mu gu pata ni gutimisela; gutimisela mu gu tadzisa khu githawo ga Nungungulu;

⁷githawo ga Nungungulu mu gi tadzisa khu gupwanana nya wundruye; gupwanana nya wundruye, mu gu tadzisa khu lihaladzo.

⁸Khayo ayo mavbanyelo gu vbwetegago muri nawo. Mwa gu bani muri naso satshavbo sesi, mu na khala vathu nya gukhutale, mu na ninga mihandro nya yingi nya yadi khu kotani nya guti Pfhumu yathu Jesu Kristo.

⁹Aholu, uye a gu mwalo naso silo sesi, a ngu fanana ni gikhumu, mwendro ni muthu nya gurole mapimo, a divaledwago khu gukhuye sighoho saye sa gale si tsetseledwe.

¹⁰Khu guralo, vandriyangu, zamani, mu simama gutiya guranwani gwanu, ni guhathwani gwanu. Mwa gu girani kharato, gima kha mu na tshunganiswa mu thega.

¹¹Khu kharato, mu na ni fanelo yatshavbo nya gubele mufumoni nyamba vbela, wa Pfhumu ni Muvbanyisi wathu Jesu Kristo.

¹²Khu guralo, nyi na mi alakanyisa gikhati gyatshavbo silo sesi, ambari mu sitigo. Tiyani lisineni mu li hakhidego.

¹³Nya gu wona nari fanelo yangu gu mi dundrugisani silo sesi olu nyi nga gu vbanya ga tshatsha yoyu.

¹⁴Kholu, nyi ngu dziti gukheni kha nyi na hwela gu diga givili gegi nya gufe, kha nga Pfhumu yathu Jesu Kristo a nyi embedego.

¹⁵Khu guralo, nyi na gira tshivba yatshavbo nya gu mi hevbudzeni silo sesi, gasi hwane nya gufe gwangu, mu tshala mu si dundruga.

¹⁶Kholu ethu gima kha ha mi hevbudzani silo nya gu si luge, gikhati hi nga mi tivisani Mahungu nya Yadi nya gute ga Pfhumu yathu Jesu Kristo nya gungangamele, nya gutale khu tshivba; kholu ethu hi wonide wugulu waye khu maho yathu.

¹⁷ Kholu ethu hi diromo, gikhati Nungungulu Babe a mu ningidego wuzundzo ni gidhumo.[1] Lito li nga duga khu gungangamelani nya gukhongolo ngudzu, khilo: “Oyu khu Mwamana wangu nya gu mu gole ngudzu, oyu a nengedzisago monyo wangu.”

¹⁸Ethu hi li pwide lito lolo na li guta khu ndzadzini, gikhati hi nga bani hiri ni Jesu Kristo Gigomoni nya guage.

¹⁹Khavbo avbo, hi na ni gutumba ga Mahungu ma nga tiviswago khu vaprofeti, ma gukhayo: Mu ngu gira gwadi mwa gu yingisa mahungu yoyo, kholu, ma ngu fanana ni guwonegela gu wenengedzago gidemani kala gugya; thandra nya masase yi na wenengedze myonyoni gwanu.

²⁰Ga satshavbo, dundrugani esi: “Mwalo muthu a kodzago gu tshamusela khu gu si khugela khu hungoni gwaye esi si nga lowa khu vaprofeti omu nya Milowo nya Guage.”

²¹Kholu, ma mwalo magana nya vaprofeti ma nga lowago khu gudzina nya muthu, aholu, vathu va di kutsedzedwa khu Liphuvbo nya Guage, va ganela Mahungu nya gute khu ga Nungungulu.