Read gitonga 1 Johane 3 Bible Online

1 Johane 3 - gitonga bible

1 Johane 3

¹ Wonani wukhongolo nya lihaladzo la Babe ga ethu, gu kala hi gu ranwa pwani hi sanana sa Nungungulu. Lisine kamwe, hi sanana sa Nungungulu. Litigo kha li hiti, kholu kha la muti Nungungulu.

²Sigodwa sangu, ethu olu hi sanana sa Nungungulu, aholu, hi si gu dziti gukhethu hi na bani hiri ginani. Ethu ha guti esi nya gukhethu, gikhati Kristo a na dzi wonegisago, hi na fanana naye, kholu hi na mu wona wurumba waye, nga edzi a guromo khidzo.

³Muthu watshavbo a gu na ni gitumbo gwaye a gu dzi agisa kha nga Uye a agidego.

⁴Oyu a ghohago a na ni nandru nya gundrage nayo, kholu gughoha gu ndraga nayo.

⁵ Enu mu ngu dzitini gukhenu Kristo a di dzi wonegisa gasi guta dusa sighoho sathu, nari gu uye mwalo gighoho.

⁶Khu guralo, oyu a hengelago naye guvbanya kha ghohi. Aholu, oyu a ghohago gima kha mu wona, gambe kha muti.

⁷Vanavangu, mu nga dzumeli mu sengwa khu muthu! Oyu a girago esi nya lisine lulamide, kha nga nuye Kristo a lulamidego.

⁸Oyu a simamago gu ghoha a gu lumba Sathane. Kholu Sathane ghohide gukhugela guhegulani. Mwamana wa Nungungulu a dzi wonegiside khu kotani nya isoso; guta pfhungumula mithumo ya Sathane.

⁹Oyu a gu gyanana gya Nungungulu kha simami gu ghoha, kholu Nungungulu mbewu givilini gwaye. Khu guralo, kha dzi kodzi gu simama a ghoha, kholu velegedwe Nungungulu.

¹⁰Ogu khugo guhambana nya lisine nya sanana sa Nungungulu ni sanana sa Sathane. Oyu a si girigo esi nya gululame, ni gumba haladza ndriyaye, khandri gyanana gya Nungungulu.

¹¹ Kholu mahungu mu ma pwidego gukhugela guhegulani khaya: Hi na haladzane khu gyathu.

¹² Hi nga giri kha nga Kayimi a nga bani a gu lumba Sathane a songa ndriyaye. A di mu songa khu kotani nya ginani? Kholu mithumo a nga bani a gira Kayimi yi di vivbide, gasi eyi ya ndriyaye yi diri yadi.

¹³Vandriyangu, mu nga liwugi mwa gu zondrwa khu vathu va mafuni momu.

¹⁴ Hi ngu dziti gukhethu hi dugide khu gufani hi bela guvbanyani. Ha gu dziti kholu hi ngu haladza vandriyathu. Oyu a si haladzigo ndriyaye a nga fude.

¹⁵Oyu a vengago ndriyaye musongi. Enu mu ngu dzitini gukhenu musongi mwalo guvbanya nya gupindruge.

¹⁶Kharato, khavbo hi dzitigo gukhethu ginani lihaladzo: Kristo ningede guvbanya gwaye khu kotani gwathu. Khu guralo, ethu nethu hi ngu yela gu ningela guvbanya gwathu khu kotani ya vandriyathu.

¹⁷Muthu a gu gitetema, a gu wona ndriyaye nari ni wusiwana, aholu a sega monyo waye, a si mu ningi gilo, a na tiya kharini gu ganela khuye a ngu haladza Nungungulu?

¹⁸ Vandriyangu, lihaladzo lathu li nga khali basi nya guganele ni mabhulo. Li na khale lihaladzo nya lisine, li dzi yeyedza khu mithumo.

¹⁹Khidzo kharati hi dzitigo gukhethu ha gu lumba lisine, myonyoni gwathu ha gu dzipwa na hi tiyide mbeli ga Nungungulu.[6]

²⁰Kholu, myonyo yathu ya gu hi kona, hi ngu dziti nya gukhethu Nungungulu khongolo guvbindra myonyo yathu, a nguti satshavbo.

²¹Khu guralo, sigodwa sangu, myonyo yathu ya gumba hi kona, hi tiyide mbeli ga Nungungulu.

²²Ethu hi ngu hakha gwaye satshavbo esi hi lombago, kholu hi ngu yingisa milayo yaye, ni gu gira esi si mu tsakisago.

²³ Esi a rumago khesi; nya gukhuye hi na khodwe linani ga Mwanaye Jesu Kristo, ni gu haladzana khu gyathu nga edzi Uye a nga hi rumago khidzo.

²⁴Oyu a yingelago milayo ya Nungungulu a ngu hengela guvbanya ni Nungungulu, Nungungulu nuye a ngu hengela guvbanya naye. Ha gu siti isoso khu kotani nya Liphuvbo a hi ningidego.