Read gitonga Valamuli 14 Bible Online

Valamuli 14 - gitonga bible

Valamuli 14

¹Samisoni a di relela Timina. A di ya wona tigoni mule nyamayi moyo nya Mufilisitiya.

²Gikhati a nga wuyago gaya a dita embela mayi ni babe waye, khuye: “Nyi wonide tigoni ga Timina, nyamayi moyo nya Mufilisitiya, nya gu lomba gukheni mu ya nyi dzegela a ta khala mwangadzi wangu.”

³Aholu, vavelegi vaye va di mu wudzisa, khavo: “Ina wa gu hamuga nyamayi ga vanyamahegyane va va ndriyago, ni vbakari nya vathu vatshavbo va tigoni gwathu, nya gukala u vbweta guya dzega nyamayi nya mahedheni yaya nya Vafilisitiya, gani?” Samisoni a di embela babe waye, khuye: “Nyi dzegeleni nyamayi yoyu, kholu, uye tsakedwe khu monyo wangu.”

⁴Babe ni mayi waye va di si dziti nya gukhavo esi sa guta khu ga PFHUMU Nungungulu, kholu a di gu vbweta ndzila nya gusasele khiyo Vafilisitiya, kholu, khavo va nga bani na va khozisa va na Israyeli khu gikhati gyogyo.

⁵Samisoni, a di relela Timina gumogo ni vavelegi vaye. Avbo va nga vbohago marembweni nya vhinya ya Timina, a di khingwa khu ginghalana na gi gu ngurura.

⁶Khavbo avbo, Liphuvbo la PFHUMU Nungungulu li di mu belela khu tshivba, Samisoni nari mwalo gilo mandzani gwaye, a di gi vbadzulela khu nga oyu a vbadzulelago phongo. Aholu kha nga pwadzela babe ni mayi waye, iso a nga girago.

⁷A di relela aya wudzana ni nyamahegyana wule va haladzana.

⁸Khu hwane nya matshigu nya gukari, Samisoni a di bwelela Timina gasi guya dzegana naye, Samisoni a di ndreya ndzilani gasi guya wona girumbi nya nghala a nga yi songago, a diya mana ndrani nya girumbi nya nghala dzinyosi nya dzingi, na dziri ni wulombe.

⁹Samisoni a di dusa wulombe khu mandza a gimbila na gu hodza khu ndzila, a diya ninga nuye babe ni mayi waye, va hodza navo. Aholu kha nga va embela gilo, nya gukhuye wulombe a di dusa ndrani nya girumbi nya nghala.

¹⁰Avbo babe waye a nga relelago gaya ga nyamahegyana, Samisoni a di gira vbale buzo nya khongolo ngudzu, kholu madzaha ma di gu olovela gu gira kharato.

¹¹Gikhati va mu wonego, va di dzega magumararu madzaha gasi gu mu bangaladza.

¹²Samisoni a di ma embela, khuye: Nya guvbweta gu mu gira tekatekane gasi mu sandrula ndrani nya livbandre na mavili matshigu nya buzo, mwa gu sandrulani gwadi, nyi na mi ninga magumararu dzilasolo ni magumararu mayadha nya myendra.

¹³Aholu mwa gumba wu dhumbani, enu khenu mu na gu nyi ningago magumararu dzingandzu ni magumararu mayadha nya myendra. Avo va di hakha, khavo: “Delu ni tekatekane yago hi yipwe.”

¹⁴Khavbo avbo, a di va embela, khuye: “Khu ga muhodzi, gu di duga guhodza, khu ga nya dzitshivbe gu dugide gulombela.” Gu di vbindra matshigu mararu nyamba kodza gu ninga phindrulo nya tekatekane.

¹⁵Avbo gu nga vbindrago livbandre na mavili matshigu, va di embela ngadza Samisoni, khavo: “Gurumedza mwama wago a hi ninga tshamuselo nya tekatekane, wa gumba gira kharato, uwe ni va na gyanu hi na mi vbisa khu nilo. Mu di hi ranani gasi guta hi dzegelani iso si hi lumbago, na?”

¹⁶Khavbo avbo, ngadza Samisoni a di ya lila ga mwama waye, khuye: “Uwe nyi ngu gu wona nya gukheni khu nyi goli, gambe khu nyi haladzi, kholu u ningide tekatekane va na gyathu gasi va yi ninga phindrulo, nyamba phela khu gu nyi embela tshamuselo waye.” Uye a di mu embela, khuye: “Ambari babe ni mayi wangu nyi ngamba va pwadzela, khu ginani nyi na phelago khuwe nyi gu tshamusela?”

¹⁷Ngadza Samisoni, a di lila mbeli gwaye ndrani nya livbandre na mavili matshigu nya buzo. Khu guralo, khu litshigu nya livbandre na mavili a di mu ninga tshamuselo, kholu a di simama gu mu garadza. Khavbo avbo, uye a diya ninga tshamuselo va na gyawe.

¹⁸Khu guralo, vathu va dhoropani mule, va di mu embela khu litshigu nya livbandre na mavili, lidambo li si gu pfoli, khavo: “Ginani gi lombelago guvbindra wulombe? Ginani gi gu ni tshivba guvbindra nghala?” Samisoni a di va hakha, khuye: “Naripwani kha mu nga limani khu gimombyana gyangu nya nyamayi, gima na mu sa yi mana phindrulo nya tekatekane.”

¹⁹Khavbo avbo, Liphuvbo la PFHUMU Nungungulu li di mbaka ga Samisoni. Uye a di relela ga va na Asikaloni, a vboha aya songa magumararu vama vawe, a dzega dzingandzu dzawe aya ningela avo va nga ningago phindrulo nya tekatekane. Khu hwane a di tala khu giviti, a bwelela gaya ga babe waye.

²⁰Ngadza Samisoni va di mu ningela ga pari yaye, yi nga bani yiri mubangaladzi waye nya dzegano.