Read gitonga Valamuli 15 Bible Online

Valamuli 15 - gitonga bible

Valamuli 15

¹Hwane nya gu bani ma vbindride matshigu madugwana, khu gikhati nya guvbwere tirigu, Samisoni a di dzega giphongwana a hongola nagyo aya wusela mwangadzi waye, aya vboha, khuye: “Nya guvbweta gu bela makhuvini a guromo mwangadzi wangu;” aholu babe wa mwangadzi waye kha nga dzumela.

²Babe wa mwangadzi waye a di mu embela, khuye: “Eni nyi di gu alakanya nya gukheni khu mu vbweti gambe; khu guralo, eni nyi mu ningede ga mubangaladzi wago. Khu mu woni nya gukhuwe nandra waye mburide ngudzu guvbindra uye, gani? Dzega uye a tshikhedza wulangani ga koma waye.”

³Samisoni a di mu embela, khuye: “Olu eni nyi na bani nyiri mwalo nandru ga Vafilisitiya, va gu gu girela silo nya guvivbe!”

⁴Khavbo avbo, Samisoni a di khuga aya mola mazana mararu (300) migehe, a yi hunga mivili mivili khu migila, a hungelela mwenge vbamigilatunu,

⁵a khondrisa mwenge a yi digeledza vbakari nya marembwe nya tirigu ya Vafilisitiya. Khu guralo, uye a di vbisa dzinyandra nya tirigu yi nga bani yi vbweridwe yi vegedzedwa, a vbisa gambe marembwe nya miuvha ni miolivha.

⁶Vafilisitiya va di wudzisa, khavo: “Khu mani a giridego silo sesi?” Va di va hakha, khavo: “Khu Samisoni, mwane wa Mutimini, kholu, va di dzega mwangadzi waye va mu ningela mubangaladzi waye.” Khavbo avbo, Vafilisitiya va di hongola vaya vbisa ngadza Samisoni gumogo ni babe waye.

⁷Samisoni a di va embela, khuye: “Kha nga mu giridego esi, nyi ngu mi embelani kheni, kha nyi na nga bwelela nyamba dzi phodzela avbo gwanu.”

⁸A di va sasela nyambana gisiro nyamba va tsetsa, a songetela nya vangi, khu hwane a khuga a relela a ta khala phagoni nya giwindri gya Etani.

⁹Khavbo avbo, Vafilisitiya va di gwela, vaya ghova tigoni ga Judha, vaya phalalega ni lidhoropa la Lehi.

¹⁰Vama va Judha va di va wudzisa, khavo: “Khu ginani mutago mu ta hi dhumela khu matshari?” Avo va di hakha, khavo: “Ha guvbweta guta hunga Samisoni, gasi hi mu gira iso uye a hi giredego.”

¹¹Khavbo avbo, gu di duga magumararu mazana (3.000) vama va na Judha, va relela phagoni nya giwindri gya Etani vaya embela Samisoni, khavo: “Ina uwe khu dziti gilo nya gukhuwe Vafilisitiya va ngu hi fumela, gani? Khu ginani u hi giredego silo nya nga esi?” Aholu, uye a di va embela, khuye: “Iso va nga nyi girelago, khiso neni nyi va giredego.”

¹²Va di engedza va mu embela, khavo: “Hi dzude gasi guta gu hunga, hi gu ningela mandzani ga Vafilisitiya.” Samisoni a di va embela, khuye: “Sambanyani nya gukhenu enu kamwe, kha mu na nyi songa.”

¹³Avo va di ganela, khavo: “Ahihi, kha hi na gu songa, aholu hi na gu hunga hi gu ningela mandzani ga Vafilisitiya, ethu gima kha hi na gu songa.” Va di mu hunga khu dzingodzi dzimbili nya dziphya va mu dusa khu phagoni nya giwindri.

¹⁴Avbo a nga vbohago Lehi, Vafilisitiya va di duga va mu khinga na va kulungela. Aholu Liphuvbo la PFHUMU Nungungulu, li dita khu tshivba ga Samisoni, dzingodzi va nga bani va mu hungide khidzo mawogo, dzi di tsagama nga dzikhindra nya wuluva nya guvbye khu nilo, dzingodzi a nga bani a hungidwe khidzo dzi di thega khu mawogoni gwaye.

¹⁵A di mana gihaya nya buru nya gu bani yi ngari gufa, a gi rola a sasela khigyo likhumi mazana (1.000) vama.

¹⁶A ganela, khuye: Khu gihaya nya buru, nyi va giride matala, khu gihaya nya buru nyi songide likhumi mazana (1.000) vama.

¹⁷Avbo a nga vbedzago gu ganela, a di dzudzuga gihaya gyogyo. Wulanga wowo, a di wu riya khuye Ramati-Lehi.

¹⁸Kha nga a nga bani na gupwa lidora nya likhongolo, a di lila ga PFHUMU Nungungulu a ganela, khuye: “U ningide gupala gogu nya gukhongolo khu mandzani ga githumi gyago. Ina, nyi ngu yela gufa khu lidora nyi thegela mandzani ga mahedheni yaya, gani?”

¹⁹Khu guralo, PFHUMU Nungungulu a di pandra giwindri gi nga bani giri dhoropani ga Lehi, gi goga mati, a sela. Khavbo avbo, liphuvbo laye li di wuyedzelana a mana tshivba. Khu guralo, wulanga wule wu di ranwa khu lina nya gupwani: “Eni-Hakore, gutshamusago gupwani Nambo Wa uye a wombago huwa” kala na muhuno.

²⁰Samisoni khade mulamuli wa Israyeli, gipimo nya magumavili myaga gikhati gya Vafilisitiya.