Read gitonga Valamuli 3 Bible Online

Valamuli 3 - gitonga bible

Valamuli 3

¹Khayo aya mayigo, PFHUMU Nungungulu a ma tshidego, gasi gu linga khayo va na Israyeli, avo va ngamba dzi wona dzinyimbi dzatshavbo dza Khanani.

²Gasi situgulwana sa na Israyeli si kodza guti ni gu hevbula gu dwana nyimbi, ngudzungudzu ga situgulwana si ngamba yi wona.

³Va nya mayigo vakone khava: Livbandre manganagana nya Vafilisitiya, ni vatshavbo Vakhanani, Vasidhoni ni Vahevhi, va nga bani na va vbanya musigomoni sa Libhanoni, gukhugela gigomoni gya Bhahali-Herimoni, kala nyangwani ga Hamati.

⁴Mayigo yaya, ma di tshidwa, gasi PFHUMU Nungungulu a kodze gu linga va na Israyeli, gu va wona gu va ngu landrisa milayo a ningidego vababe vawe khavbo ga Mosi.

⁵Olu va na Israyeli va nga bani va vbanya vbakari ga Vakhanani, Vahiti, Vaamor, Vaperezi, Vahevhi ni Vajebhusi,

⁶va di lowola vanyamayi va vbakari nya mayigo yaya, avo navo va lowodzisa vanyamahegyane vawe ga madzaha ya tigoni mule, ni gu khozela vanungungulu vawe.

⁷Va na Israyeli va di gira ugo guvivbidego mahoni ga PFHUMU Nungungulu wawe, va khozela Vabhahali ni sihuru sa Asitaroti.

⁸Khavbo avbo, PFHUMU Nungungulu a di gorogela va na Israyeli, a va ningela mandzani ga Khusani-Risatayimi, mufumeli wa Mesopotamiya, va na Israyeli, va di fumedwa khu Khusani-Risatayimi, livbandre na miraru myaga.

⁹Khu guralo, va na Israyeli, va di lila ga PFHUMU Nungungulu, uye a di va rumela mutshudzisi a ta va tshudzisa, a gu uye Otiniyeli, mwamana wa Kenazi, ndruye nya nandra waye wa Kalebi.

¹⁰Gu dita gwaye Liphuvbo la PFHUMU Nungungulu, a ta khala mulamuleli wa Israyeli; aya dwana nyimbi; Kusani-Risatayimi, mufumeli wa Mesopotamiya, a di ningedwa mandzani gwaye khu PFHUMU Nungungulu.

¹¹Khu guralo, litigo li di khala gurulani gipimo nya magumana myaga. Otiniyeli, mwamana wa Kenazi, a difa.

¹²Va na Israyeli va di engedza va gira gambe ugo guvivbidego mahoni ga PFHUMU Nungungulu; aholu, PFHUMU Nungungulu a di ninga tshivba Egiloni, mufumeli wa Mowabhi, gasi gu sasela va na Israyeli, kholu, va di gira silo nya guvivbe mahoni ga PFHUMU Nungungulu.

¹³Egiloni a di tombanisa va na Amoni ni va na Amaleki; va diya dhumela va na Israyeli, va wandra lidhoropa nya Migindru.

¹⁴Va na Israyeli va di thumela Egiloni, mufumeli wa Mowabhi, gipimo nya likhumi na livbandre na miraru myaga.

¹⁵Khavbo avbo, va na Israyeli va di lila gambe ga PFHUMU Nungungulu, uye Pfhumu a di va emisela mutshudzisi, a gu Ewudhi, mwamana wa Gera, nya lihundzu la Bhejami, mwama nya guthume khu nyambade. Va na Israyeli, va di rumela khu mandzani gwaye, miningelo nya guluve Egiloni, mufumeli wa na Mowabhi.

¹⁶Ewudhi a di dzi girede litshari nya gulodzwe eno ni eno, na liri ni pimo nya kono moyo gulapha; a li hungelela nyongani gwaye gwa nyamudye khu vbavbatshi nya guambala gwaye.

¹⁷A diya ningela miningelo nya guluve ga Egiloni, mufumeli wa Mowabhi; Egiloni a diri mwama nya guene ngudzu.

¹⁸Avbo Ewudhi, a nga vbedzago gu bikela miningelo nya guluve, a di bweledza avo va nga bani na va rwade miningelo nya ndruwo.

¹⁹Aholu a di va vbwelegedza aya bwelela khavbo si guromo sifananiso nya guvatwe khu siwindri, vbafuvbi ni Giligali, a wuya a ta embela Egiloni, khuye: “Mufumeli, nyi na ni mahungu nya sihalo nyi vbwetago gu gu embela.” Uye a di mu hakha, khuye: “Degula!” Khavbo avbo, vatshavbo va nga bani va mu thumela va di duga mbeli gwaye.

²⁰Ewudhi a di bela nyumbani nya gupepemele ya vbatshani, iyo mufumeli a nga dzi girela gasi guya khala a pepemela a hakha liphuvbo; Ewudhi a di embela mufumeli, khuye: “Nyi na ni mahungu nyi vbwetago gu gu embela na ma gu dugela khu ga Nungungulu.” Mufumeli a di khuga khu vbagikhalotunu gwaye.

²¹Khavbo avbo, Ewudhi a di homola litshari nyongani gwaye ya nyamudye, a mu paya girumbu,

²²avbo gu nga belago ni givbindru gyakone; kha nga a ngamba li homola, li di londredwa khu mafura li duga khu hwane.

²³Khavbo avbo, Ewudhi a di duga khu vbamwanyatunu a khota malimba nya nyumba.

²⁴Hwane nya gu bani na dugide, si dita sithumi saye, si ta mana gu, malimba nya nyumba ma khothidwe; si di pimisa nya gukhiso a gu dzina saye a gu dzi ruma hwanyumba gwa nyumbani gwaye gwa vbatshani.

²⁵Va di lirela kala va garala, kha nga ulo uye a nga bani a si tuli lidimba, va di dzega pfhungulo va tula. Va diya mana mune wawe na thegide huye labalaba vbavbatshi, na fude!

²⁶Avbo sithumi saye si nga bani na si gu virela, Ewudhi a di mwalalega a vbindra khavbo si guromo avbo sifananiso, a hongola Seyira.

²⁷Na vbohide, a di gwela sigomoni sa Efrayimi a womba pundru, va na Israyeli va di relela naye khu gigomotunu, na thangide mbeli gwawe.

²⁸A di va embela, khuye: “Nyi landreni, kholu PFHUMU Nungungulu, ningede mandzani gwanu valala vanu.” Va di mu landra va relela, vaya dzega wulanga va nga bani na va guvbindra khavbo va na Mowabhi tsongoni wa Joridhani, va si dzumedzisi ni moyo gu vbindra khavbo.

²⁹Gikhati gyogyo, va di sasela va na Mowabhi, va songa gipimo nya likhumi magumi mazana (10. 000), vama nya dzisizwa ni tshivba, gu si vbulugi ni moyo.

³⁰Khu kharati, litshigu lolo va na Mowabhi, va di khoziswa khu va na Israyeli; litigo li di vbanya gurulani gipimo nya livbandre na mararu magumi myaga.

³¹Hwane ga Ewudhi, gu di landrela Sangari, mwamana wa Anati, a nga songago livbandre na limwedo mazana (600) vama nya Vafilisitiya khu ndrombo nya dzimombe. Uye nuye a di tshudzisa va na Israyeli.