Read gitonga Valamuli 5 Bible Online

Valamuli 5 - gitonga bible

Valamuli 5

¹Khu litshigu lolo, Dhebhora ni Bharaki, mwamana wa Abhinowamu, va di embelela ndzimo yeyi, khavo:

²“Kha nga olu vathangeli va thangedego Israyeli, vathu navo va dzi ningede wurumba wawe khavbo gu vbeledego. Bongani PFHUMU Nungungulu!

³Enu vafumeli yingisani! Upwani enu vamwamangulu! Nyi na dhumisa PFHUMU Nungungulu khu gu embelela, nyi na embelela ga PFHUMU Nungungulu wa Israyeli.

⁴Uwe PFHUMU Nungungulu, avbo u na khugago khu Seyiri, avbo u nga gimbilago gukhugela mahangeni ga Edhomi, mafu ma di tsekatseka; khu ndzadzini gu dota mati, mapfhi ma wisa ndzadzi.

⁵ Sigomo si di nyiviliga mbeli ga PFHUMU Nungungulu wa gigomoni gya Sinayi, mbeli ga PFHUMU Nungungulu wa Israyeli.

⁶Matshiguni ya Sangari, mwamana wa Anati, ni matshiguni ya Jayeli, dzindzila nya gugimbile khidzo dzi di fuva; vasundzi va di gimbila khu dzindzila nya gudzuwulugele.

⁷Mitalala ya na Israyeli, yi di fuva kala eni Dhebhora, nyi dugelela nyi khala mayi wa Israyeli.

⁸Avbo va na Israyeli, va nga bani va vbweta vambe vanungungulu, nyimbi yi di bela dzinyangwani gwawe, gu di si manegi gitshangu mwendro litshari, vbakari nya magumana magumi mazana (40. 000) ya Israyeli.

⁹Monyo wangu wa gu tsakela vathangeli nya dzinyimbi va Israyeli, ni ga vathu va nga dzi ningelago khu gugola gwawe. Rungudzani PFHUMU Nungungulu.

¹⁰Enu mu khiledego dziburu nya guage, enu mu khalago vbamalawutunu nya wumburi, ni enu mu gimbilago dzindzilani, phalalegisani mahungu yaya.

¹¹Iyo gu pwalago ligwaha nya sighalala, malangani gu regwago mati, pwadzani mithumo nya gululame ya PFHUMU Nungungulu, mithumo nya gululame a giredego ga avo va vbanyago mitalalani ya tigoni ga Israyeli. Khavbo avbo, vathu va PFHUMU Nungungulu va di vboha kala dzinyangwani nya lidhoropa.

¹²Khendzuga, Dhebhora, khendzuga! Kheni khendzuga, khendzuga u embelela ndzimo! Bharaki, Khuga u eme, u thangela avo u va modego va khala sibotshwa, uwe gumogo ni mwamana wa Abhinowamu.

¹³Khu gikhati gyogyo, avo va gu mitshaledwa ya tigoni, va diya sasela vathu nya guthavisege, PFHUMU Nungungulu a di nyi dwanela nyi pala dzindrena.

¹⁴Va dugede tigoni ga Efrayimi tumbunugo wawe wu dugelago gipandrengulo gya Amaleki, khu hwane gwago, a di gu landra Bhejami vbakari nya vathu vago; khu Makiri, gu di duga vathangeli, khu Zebhuloni va duga avo va pharago ndronga nya wufumu.

¹⁵Manganagana ya Isakari, ma diri gumogo ni Dhebhora; Isakari gumogo ni Bharaki vomo panini, va va landra khu migondro, khu gitsongwanani gya Rubheni, gu dugide makungo nya makhongolo nya monyo.

¹⁶Khu ginani u na gu tshalago mavbandroni u yingisa dzindrodzi nya vahavisi nya mitshambi, na? Khu mitsongoni ya Rubheni, gu dugide maalakanyo nya mangi khu monyoni.

¹⁷Gileyadhi a di simama gu khala khu khisikheyi ga Joridhani, gasi Dhani, khu ginani a nga khala mataroni? Aseri, a di khala funguni nya yiphwa a hefemula siwoni gwaye.

¹⁸Zebhuloni litigo nyamba thava gufa, kha nga nuye Nafitali, musigomoni sa khabini.

¹⁹Gu dita vafumeli va ta dwana, vafumeli Vakhanani va dita dwana Tahanaki, vbafuvbi ni mati ya Megidho; aholu kha mana phango nya parata.

²⁰Khu ndzadzini dzi di dwana dzinyeledzi, khu dzindzilani dzawe dza vbatshani dzi wugela Sisera.

²¹Va di kukulutwa khu tsongo wa Kisomi, tsongo wule wa gale, tsongo nya mayunga. Uwe hefemulo wangu, tiya uya mbeli.

²²Gu di pwala sikingo nya sitsendro nya dzikavalo na dzi gu tutumiswa khu tshivba nya dzingwazi dzawe.

²³Li na vadwe lidhoropa la Merozi, gu ganela Ngilozi ya PFHUMU Nungungulu valani ngudzu vavbanyi vaye, kholu, kha vata phasedzela PFHUMU Nungungulu, gu phasedzela PFHUMU Nungungulu gu dwana ni valala vaye nya tshivba.

²⁴Ngadza Hebheri, Jayeli, Mukheni, a na katege vbakari ga vanyamayi; a na katege vbakari ga vanyamayi va vbanyago mitshatshani.

²⁵Sisera a di lomba mati, uye a mu ninga mahwe, a di mu resela matega khu mbiyani nya wufumu.

²⁶A di thawuludza mandza ya nyambade, a rola simbo nya tshatsha, khu mandza ya nyamudye, a rola gikhokhotho gya muthumi, a songa Sisera, a mu pola hungo, a mu pola hungo wu vbondza.

²⁷Sisera, a di khidzima, a thega vbavbatshi huye navanava migondroni gwaye, a fisa guralo idzo a thegidego khidzo.

²⁸Mayi wa Sisera a di gu si wona khu vbagihogotunu, a khevisela khu vbagihogotunu, a lila, khuye: Khu ginani kareta yaye yi hwelago gu wuya? Khu ginani gu hwelago gupwala sikingo nya kareta yaye.

²⁹Sigengeli nya vagadzi vaye, va di mu phindrula, gambe a di dzi phindrula abune, khuye:

³⁰Ina kamwe khandri va gu kabanelana phango, gani? Mwama ni mwama, a kabaniswa nyamahegyane moyo mwendro vavili. Sisera a di ningwa phango nya myendra nya mavalavala nya mangi, myendra nya mavalavala nya gulugwe, phango nya mavalavala nya gulugwe maphuvbo mavili, nya gumburise thamoni ga mupali.

³¹PFHUMU Nungungulu, valala vago va na fise guralo, aholu, avo va gu golago va na khale nga lidambo, avbo li dugago khu tshivba yaye yatshavbo.”

³²Litigo li di khala gurulani gipimo nya magumana myaga.