Read gitonga Valamuli 6 Bible Online

Valamuli 6 - gitonga bible

Valamuli 6

¹Va na Israyeli va di gira silo nya guvivbe mahoni ga PFHUMU Nungungulu; Uye a di va ningela mandzani ga Vamedhiyani gipimo nya livbandre na mivili myaga

²Vamedhiyani, va di tshanisa ngudzu va na Israyeli, khu guralo, avo va di thavela musigomoni vaya dzi girela mavbala, ni dziphago umo nya makhokhola.

³Gikhati gyatshavbo va na Israyeli va nga bani na va gu yala, gu dita Vamedhiyani, Vaamaleki ni mambe mafumbo ya Khugadambo ma ta va dhumela.

⁴Va dita ghova mahangeni va ghohetela dzimbewu dzatshavbo dza mahangeni, kala va vboha vbafuvbi ni Gaza, gimwalo ni gimwegyo nya guvbanye va nga bani va gi tshiya tigoni ga Israyeli, ambari dzinvuta, dzimombe ni dziburu.

⁵Kholu avo va dita ni sifuyo sawe gumogo ni mitshatsha yawe; avo gumogo ni dzingameriya dzawe, va diri vangi ngudzu kha nga dzimbera nya gutale nyambana tengo; va dita gasi guta khungumula litigo.

⁶Khu guralo, va na Israyeli va di khala ngudzu sisiwana khu kotani ya Vamedhiyani; khavbo avbo, va di lila ga PFHUMU Nungungulu.

⁷Gikhati va na Israyeli va nga lila ga PFHUMU Nungungulu khu kotani ya Vamedhiyani,

⁸PFHUMU Nungungulu a di va rumela muprofeti a nga ta va embela, khuye: “PFHUMU Nungungulu wa Israyeli a ngu ganela kharati, khuye: Nyi mi dusideni khu tigoni ga Egipito, ndranga nya wugumbi;

⁹nyi mi vbulugiside mandzani ga Vagipiti ni ga vatshavbo va nga bani va mi tshanisa; nyi va tutumiside mbeli gwanu nyi bwelo khavbo nyi mi ninga litigo lawe;

¹⁰Uye a mi embede gambe, khuye: Eni kheni PFHUMU Nungungulu wanu; mu nga khozeli vanungungulu va Vaamori; mu khalago tigoni gwawe. Aholu kha mwa nyi yingisani.”

¹¹Khavbo avbo, Ngilozi ya PFHUMU Nungungulu, yi dita khala vbavbatshi nya simbo nya wukhongolo wa Ofira, wu nga bani wu lumba Jowasi nya lihundzu la Abhiyezeri. Mwanaye Gidhiyoni, a diri guvbulani nya tirigu, vbagithalatunu gu gamedwago avbo dziuvha, gasi guya sihala umo va si wonwi khu Vamedhiyani.

¹²Khavbo avbo, Ngilozi ya PFHUMU Nungungulu yi di mu tumbulugela yi ta mu embela, khiyo: “Gidhiyoni, PFHUMU Nungungulu a na ni uwe mudwani nya tshivba nya nyimbi.”

¹³Aholu Gidhiyoni a di phindrula, khuye: “Nyi pwele wuhindzi uwe mune wangu, nari gukhwatshi PFHUMU Nungungulu a na ni ethu, khu ginani hi dugeledwago khu satshavbo sesi? Somo hayi siliwugiso saye satshavbo esi vababe vathu va hi embeledzelago, khavo: PFHUMU Nungungulu a hi duside tigoni ga Egipito? Khu guralo, olu PFHUMU Nungungulu a hi digide, bwelo khavbo, a hi ningela mandzani ga Vamedhiyani.”

¹⁴Khu guralo, PFHUMU Nungungulu a di mu khedza, a mu embela, khuye: “Khu tshivba u gu nayo, gimbila u ya tshula va na Israyeli mandzani ga Vamedhiyani. Ina kha nya gu rumela, gani?”

¹⁵Gidhiyoni a di mu hakha, khuye: “Nyi pwele wuhindzi, mune wangu, nyi na dzi kodza kharini eni gu tshudzisa va na Israyeli? Olu ndranga yangu a gu iyo nya wusiwana ngudzu ga lihundzu gu ilo nya lidugwane ga Manasi, eni kheni nya dugwane wakone wa ndrangani ga babe wangu.”

¹⁶PFHUMU Nungungulu a di mu hakha, khuye: “Eni nyi na bani nyiri nago, u na pala va na Medhiyani vatshavbo nga khwatshi wa gu pala muthu moyo basi.”

¹⁷Gidhiyoni a di engedza gambe a ganela, khuye: “Nya gu bani nyi manide makategwa mahoni gwago, nyi ninge giyeyedzo nya gu khigyo, khuwe kamwe u ganelago ni eni.

¹⁸Nyi ngu gu lomba gukheni u nga hongoli, kala nyi wuya nyi gu resela ningelo wangu gasi nyi ta wu vega mbeli gwago.”

¹⁹Gidhiyoni a di hongola gaya aya dongisela phongo ni sibaba nyambana mela nya gugirwe khu efa nya wuguvbi; nyama a di yi thela gitundruni, muro a wu thela gikalangoni; a si resa vbavbatshi nya simbo nya khongolo a ta si bikela mbeli gwaye.

²⁰Khu guralo, Ngilozi ya Nungungulu yi di mu embela, khiyo: “Dzega nyama ni sibaba nyambana mela, u si vega vbatshani nya giwindri gegi, u vbaladza muro.” Gidhiyoni a di gira kharato.

²¹Ngilozi ya PFHUMU Nungungulu yi di kuha nyama ni sibaba nyambana mela khu tshoka nya ndronga yi nga bani yi pharide mandzani. Nilo wu di gwela khu vbagiwindritunu wu dagaredzisa nyama ni sibaba nyambana mela. Ngilozi ya PFHUMU Nungungulu yi di mwalalega mahoni gwaye.

²²Khavbo avbo, Gidhiyoni a di wona gukhuye a diri Ngilozi ya PFHUMU Nungungulu; a di ganela, khuye: “Oh, Pfhumu nya Tshivba Yatshavbo! Nyi wonide Ngilozi ya PFHUMU Nungungulu khovbe ni khovbe!”

²³Khu guralo, PFHUMU Nungungulu a di mu embela, khuye: “Gurula gu na khale gwago! U nga thavi, khu na ngafa.”

²⁴Khavbo avbo, Gidhiyoni a di vbaha vbale giluvelo gya PFHUMU Nungungulu, a gi riya lina, khuye: PFHUMU Nungungulu nya Gurule. Kala ni muhuno giluvelo gi nga gu manega Ofira wa Abhiyezeri.

²⁵Ga wutshiguwule wa wumowo, PFHUMU Nungungulu a di mu embela, khuye: “Dzega gimombyana gya babe wago, ni mombe nya wuvili nya livbandre na mivili myaga, u khungumula giluvelo gya Bhahali gi lumbago babe wago, u pila lidingo la Asera, li guromo khu bambe nya giluvelo.

²⁶Khu hwane girela giluvelo PFHUMU Nungungulu wago, khu tshokatunu nya gigomo gegi. Gira phaso nya guvbiswe khu gimombyana nya wuvili, eyi i mhamba u na gu yi vbisago khu mapulango nya lidingo nya guage u pidego.”

²⁷Khu guralo, Gidhiyoni a di dzega likhumi vama vbakari nya sithumi saye, a gira kha nga idzo a embedwego khidzo khu PFHUMU Nungungulu; aholu, khu gu thava ndranga ya babe waye, gumogo ni vathu va dhoropani, satshavbo a di si gira ni wutshigu.

²⁸Khu guralo, vathu va dhoropani mule, avbo va nga wugago ni mambagugya, va di wona gukhavo giluvelo gya Bhahali gi khungumudwe, ni lidingo li nga bani li romo vbafuvbi gwaye; ni gimombyana nya wuvili gi di vbisedwe vbagiluvelotunu nya giphya.

²⁹Va di wudzisana khu gyawe, khavo: “Khu mani a giridego esi? Hwane nya gu bani va vbwetedzede gwadi, va di tugula gukhavo khu Gidhiyoni, mwamana wa Jowasi.”

³⁰Khavbo avbo, vama va dhoropani mule va di embela Jowasi, khavo: “Dusa mwanago vbavbandze. Uye fanede gu songwa, kholu khungumude giluvelo gya Bhahali, bwelo khavbo a fanya lidingo nya guage li nga bani li khala vbafuvbi gwaye.”

³¹Khu guralo, Jowasi a di embela vatshavbo va nga bani va mu wugela, khuye: “Enu mwa guvbweta gu vhikela giluvelo gya Bhahali, gani? Mwa guvbweta gu gi vbulugisa, gani? Uye a na gu gi dwanelago, a na songwa vbadzimindrutunu! Bhahali khu lisine naripwani a diri nungungulu, na dzi vhikede gikhati va nga khungumula giluvelo gyaye.”

³²Khu kotani nya isoso, Gidhiyoni va di mu rana khavo khuye Jerubhahali,[2] kholu Jowasi a di ganede khuye Bhahali a na dzi vhikele, kholu gu khungumudwe giluvelo gyaye.

³³Ga gikhati gyogyo vatshavbo Vamedhiyani ni Vaamaleki gumogo ni mambe mayigo, va dita khu Khugadambo va tombanisa masotshwa yawe, va tsemakanya tsongo wa Joridhani vaya zumba kovani wa Jezireyeli.

³⁴Khavbo avbo, Liphuvbo la Pfhumu li di bela ga Gidhiyoni, uye a di womba pundru, a tivisa va na Abhiyezeri gasi va ta tombana gwaye.

³⁵A di rumela myango guya rana lihundzu latshavbo la Manasi, guta phara matshari, gumogo gambe ni va na Aseri, va na Zebhuloni ni va na Nafitali, va gwela navo va mu khinga.

³⁶Gidhiyoni a di embela Nungungulu, khuye: “Wa guvbweta gutshudzisa Israyeli khu mandzani gwangu kha nga u tumbisidego,

³⁷wona, nyi na vega puri nya mawoya vbagithalatunu; thondrwane ya gu naganisa basi seda, vbavbatshi gwatshavbo gu manega na gu bangide, nyi na dziti gukheni u na tshula va na Israyeli khu mandzani gwangu, kha nga idzo u ganedego khidzo.”

³⁸Si di girega kharati; kholu Gidhiyoni a di wuga khu litshigu li landrelago na gu ngari dzimindru dzikhongolo, a di gama puri a tadza gimbiyana khu mati nya thondrwane.

³⁹Gidhiyoni a di embela Nungungulu, khuye: “U nga nyi khondriseli likhulo lago. Nyi dige nyi gira gambe gilombo gimwegyo. Wa gu nyi dzumedzisa nyi vbwetedzela gambe khu puri. Ga gikhati gegi gira gu yi banga puri, gu nagana vbavbatshi khu thondrwane.”

⁴⁰Nungungulu a di gira kharato ni wutshiguwule, a di bangisa basi puri; vbavbatshi gu di naganide gwatshavbo khu thondrwane.