Read gitonga 2 Johane 1 Bible Online

2 Johane 1 - gitonga bible

2 Johane 1

¹Eni lidhota nyi ngu lovela singalagadzi a hathidwego ni sanana saye, avo nyi va golago khu lisine; nasiri eni basi, aholu ni vatshavbo vale va litigo lisine, va ngu mi golani.

²Ethu hi ngu mi golani khu lihaladzo nya lisine li guromo gwathu, gambe li na simama gwathu kala gupindruga.

³Wuhigo ni wuhindzi ni gurula gwa Nungungulu Babe ni ga Jesu Kristo, Mwamana wa Babe wu na khale ni ethu khu lisine ni lihaladzo.

⁴Nyi nengede ngudzu khu gu dziti gukheni simbe sanana sago si ngu vbanya khu ndzila nya lisine nga edzi hi hakhidego khidzo nayo wa Babe.

⁵ Olu, uwe Pfhumugadzi, nyi ngu gu lomba nasiri kha nga gu gu lovela khu gu hi golana khu gyathu, aholu nayo nya wuphya, khuwo wule hi wu hakhidego gukhugela guhegulani.

⁶Lihaladzo khilo eli: Khu gu hi vbanya khu gu yingela milayo ya Nungungulu. Kha nga mu pwidego gukhugela guhegulani, simamani gu vbanya lihaladzoni momo.

⁷Vakanganyisi nya vangi va phalalegide tigoni gwatshavbo, avo va gu hevbudza gukhavo Jesu Kristo gima kha nga dzi gira muthu. Oyu a ganelago kharato, mukanganyisi, nala wa Kristo.[1]

⁸Dzi woneleni, gasi mu si luzi thumo hi wu giridego, aholu hi hakha tshatshazelo nya guenele.

⁹Oyu a si emigo ndrani nya gihevbudzo gya Kristo, mwalo Nungungulu. Aholu, oyu a emago gihevbudzoni momo gya Kristo, khuye a gu ni Babe ni Mwamana.

¹⁰Muthu a guta iyo gwanu nyamba resa gihevbudzo gya Kristo, mu nga mu hakhi dzindrangani gwanu, ni gu mu losa mu nga mu losini.

¹¹Kholu, oyu a losago muthu nya guralo, a ngu hengela naye mithumoni gwaye nya guvivbe.

¹²Nyi na ni silo nya singi nyi vbwetago gu mi embela, aholu, kha nyi dzini guya khu gu lova khu lidangalila, kholu nyi nata iyo gwanu nyita mi holela, nyi nata ganela nanu eni, wurumba wangu, gasi li fela gu tadzisega litsako lathu.

¹³Ava va lumbago Libandla nya vandruye [2] li hathidwego nilo khu Nungungulu, va ngu mi losedzela.