Read gitonga Gutuledwa 1 Bible Online

Gutuledwa 1 - gitonga bible

Gutuledwa 1

¹Khugo ogu gutuledwa ga Jesu Kristo, ugo a nga ningwago khu Nungungulu, gasi a yeyedze ga sithumi saye iso si guromo vbafuvbi ni gu girega. Uye tiviside silo sesi khu ga ngilozi yaye a nga yi rumelago ga githumi gyaye Johane.

²Uye a gu fakazi nya magana ya Nungungulu, ayo ma ngata tiyiswago khu Jesu Kristo, khu satshavbo esi a nga si wonago.

³Kategide wule a hevbulago [1] libhuku leli; ni vale vapwago magana yaya nya wuprofeti, va ma vegedza myonyoni gwawe silo si lovidwego, kholu satshavbo sesi, somo vbafuvbi nya gugirege.

⁴Eni Johane nya gu lovela livbandre na mavili mabandla ya Aziya, kheni: Wuhigo ni gurula gu na khale ni enu khu ga wule a gu uye, a nga bani ari uye, a gu uye a natago, ni ga livbandre na mavili maphuvbo, ma gomogo mbeli nya gikhalo nya wufumu waye.[2]

⁵ Ni ga Jesu Kristo fakazi nya guthembege, matiwula nya vafi vatshavbo a gu Pfhumu nya vafumeli va mafuni. Uye a hi haladzago a nga hi tshulago sighohoni gwathu khu novba waye;

⁶ a gu hi gira vafumeli ni vaphasi nya mhamba ya Nungungulu Babe waye. Khyaye gidhumo ni tshivba kala gupindruga. Amen.

⁷ Mu ngu mu wona, a guta khu mapfhini; vatshavbo va na mu wona, ambari vale va nga mu songago, mafumbu yatshavbo ya mafuni ma na dzi laya khu kotani gwaye. I tiyiso: Amen.

⁸ Pfhumu Nungungulu wari, khuye: “Kheni Alfa ni Omega! Wule a gu Uye, a nga bani ari Uye, wule a na tago; a gu uye Nungungulu nya Tshivba Yatshavbo.”

⁹Eni Johane nyi gu ndriyanu, muhengeli ni enu sigaradzoni, Gufumani, ni gutimiselani khu ga Jesu Kristo, nyi diromo gidwane gi ranwago Patimosi kotani nya gu pwadze mahungu ya Nungungulu ni gu fakazela Jesu Kristo.

¹⁰Khu litshigu la Pfhumu [3] nyi di tshigedwa khu liphuvbo, nyipwa hwane gwangu lito nya likhongolo nya nga pundru,

¹¹na li gu, khilo: “Iso u si wonago, si love libhukuni, u li rumela ga livbandre na mavili mabandla ya Aziya a gu aya: Efeso, Esmirina, Pergamo Tiyatira, Sardhesi, Filadhelifiya ni Lawodhikeya.”

¹²Eni nyi di thendregedza gasi gu wona khu mani a ganelago ni eni. Na nyi thendregedzide nyi di wona livbandre na dzimbili dzikandriya nya ndralama.

¹³ Vbakari nya livbandre na dzimbili dzikandriya, nyi di wona moyo nya gufanane ni Mwamana wa Muthu, na ambade ngandzu nya gulaphe, na hungide libhandri nya ndralama vbakhanatunu.

¹⁴ Hungo waye ni ndzudzu waye wu diri wa guaga, kha nga mawoya nya guage mwendro kha nga hunguva; maho yaye ma di ngangamela kha nga nilo.

¹⁵ Migondro yaye yi di fanana ni sugu nya gungangamele niloni; lito laye li di fanana ni ligwaha nya talo nya mati.

¹⁶Khu nyamudye a di pharide livbandre na dzimbili dzinyeledzi; khu kanani gwaye gu di duga litshari nya gulodzwe eno ni eno. Khovbe yaye yi di fanana ni lidambo nya gungangamele khu tshivba yaye yatshavbo.

¹⁷ Gikhati nyi nga mu wona, nyi di thega migondroni gwaye kha nga muthu nya gufe. Aholu, uye a di nyi handzega libogo laye la nyamudye, khuye: “U nga thavi! Eni kheni Guphela ni Guhegisa.

¹⁸Kheni wule a vbanyago. Nyi di fude, aholu olu nyi ngu vbanya kala gupindruga. Nyi na ni dzipfhungulo nya lufu nedzi nya litigo nya vafi.”

¹⁹Khu kharato, lova iso u nga si wona: Iso si guromo olu, niso si na gu giregago hwane nya esi.

²⁰Sihalo nya livbandre na dzimbili dzinyeledzi u nga dzi wonago na nyi pharide khu nyamudye, nuwo nya livbandre na dzimbili dzikandriya nya ndralama, tshamuselo wakone khoyu: Livbandre na dzimbili dzinyeledzi dza gu tshamusela dzingilozi dza Nungungulu nya livbandre na mavili mabandla. Gasi, livbandre na dzimbili dzikandriya dza gu tshamusela livbandre na mavili mabandla.[4]