Read gitonga Gutuledwa 10 Bible Online

Gutuledwa 10 - gitonga bible

Gutuledwa 10

¹Khavbo avbo, nyi di wona yimbe ngilozi nya tshivba na yi gu tshiga khu ndzadzini, na yi ambade lipfhi; hungoni gwaye wu diromo wulaho wa ndzadzini, khovbe yaye yi di fanana ni lidambo, mawundru yaye kha nga siguni nya nilo.

²Yi di pharide mandzani libhuku na li tudwe. Yi di gandra phwani khu ngondro wa nyamudye, khu ngondro wa nyambade yi gandra mafuni,

³yi di khusedza lito khu tshivba gu fanana ni nghala ya gu bani yi ngurangura. Gikhati yi khusedzidego lito, gu di pwala malito nya livbandre na mavili mabara.

⁴Ga gikhati gile, nyi di vbweta gu lova, aholu nyi dipwa lito nya gute khu ndzadzini li nyi embela, khilo: “Vegedza sihaloni iso si nga ganedwago khu livbandre na mavili mabara. U nga lovi gilo.”

⁵Khavbo avbo, ngilozi nyi nga yi wona na yi emide yi gandra phwani ni mafuni, yi di khusedza libogo la nyamudye yi nonedza ndzadzini,

⁶yi gu sambanya khu lina la wule a vbanyago kala gupindruga, a gu uye muvangi nya ndzadzi ni satshavbo si guromo umo; ni mafu ni satshavbo si guromo umo; ni yiphwa ni satshavbo si guromo umo, khiyo: “Gikhati gi vbede!

⁷ Aholu ya gu kala yi womba pundru ngilozi nya livbandre na dzimbili, khavbo yi na gu tadzisegago misihalo ya Nungungulu, iyo a nga yi tivisago ga sithumi saye, a gu vaprofeti.”

⁸Lito lile la ndzadzini nyi nga lipwa, li di wuya li nyi embela gambe, khilo: “Indra uya dzega gibhukwana nya gutudwe gi guromo mandzani ga ngilozi yile yi emidego, yi gandra yiphwa ni mafu.”

⁹Eni nyi di hongola ga ngilozi nyi ya yi lomba libhuku. Ngilozi yi di nyi embela, khiyo: “Li dzege u li hodza; kanani gwago li na lombela kha nga wulombe, aholu li na gu vava girumbuni gwago.”

¹⁰ Nyi di hakha libhuku mandzani ga ngilozi nyi li hodza, kanani gwangu li di lombela nga wulombe, aholu, na nyi li midzide, ndrani gwangu gu di vava.

¹¹Khavbo avbo, nyi di embedwa gambe, pwani: “Gu vbwetega u simame gu profeta, u thuledza mafumbu nya mangi, u laye mayigo, malimi ni vafumeli.”