Read gitonga Gutuledwa 13 Bible Online

Gutuledwa 13 - gitonga bible

Gutuledwa 13

¹ Khavbo avbo, nyi di ema khu funguni nyi wona gambe girengo na gi tumbuluga khu linene. Girengo gyogyo gi diri ni livbandre na mivili mihungo ni likhumi dzikheho, kheho ni kheho yi di ambade gihugu nya wufumu. Mihungoni gwaye gu di lovidwe malina nya guvale Nungungulu.

² Girengo nyi nga gi wonago gi di gu fanana ni likhamba. Sandza nya migondro yaye khwatshi khesi nya yingwe, likana li di gu fanana neli nya nghala. Mwamilambo a di gi ninga tshivba yaye, ni gikhalo gyaye, ni wufumu nya wukhongolo.

³Moyo nya mihungo nya girengo wu di pandridwe phandza nya guhadza gufa. Aholu, phandza yakone yi di vbode. Litigo latshavbo li di liwuga li gu landrisela girengo.

⁴Vathu va di khozela mwamilambo a nga ningago tshivba nya yikhongolo girengo. Va wuya va khozela girengo, khavo: “Khu mani a dzi kodzago gu palisana tshivba ni girengo, khu mani a na gu dzi kodzago gu dwana nagyo?”

⁵Girengo gi di dzumedziswa gu ganela magana nya gulemele, nya guvale Nungungulu, gipimo nya magumana na mivili migima.

⁶ Girengo gi di tula likana gi gu vala Nungungulu ni lina laye, ni wulangani gwaye nya guage ni vatshavbo va vbanyago ndzadzini.

⁷ Gi ningidwe tshivba nya gu dwanise nyimbi gi pala sihathwa sa Nungungulu, ni tshivba nya gufume mafumbu yatshavbo, ni malimi, ni mayigo yatshavbo.

⁸ Vathu vatshavbo va mafuni va di khozela girengo, vale malina yawe ma nga mba lowa libhukuni nya womi li vegisidwego khu Nvutana yi payidwego gukhugela nya guvangwe litigo.

⁹Wule a gu ni dzindzeve a napwe.

¹⁰ Oyu a yisago vakwawe wugumbini, a na yiswa nuye wugumbini, oyu a songago khu litshari a nafa nuye khu litshari. Khigyo egi gikhati nya wundrena ni gutumbege nya vakhodwa.

¹¹Khu hwane nya iso nyi di wona gimbe girengo na gi gu tumbuluga khu tigoni, gi diri ni dzikheho dzimbili kha nga nvuta aholu gi di ganela kha nga mwamilambo.

¹²Girengo gegi khigyo gi gimbidzisago mufumo watshavbo nya girengo nya guhegule kha nga gyandza gyaye; khigyo gi rumago litigo ni vathu vatshavbo va vbanyago ga ilo va khozela girengo nya guhegule, egi nya phandza nya guvbole.

¹³Girengo gegi nya wuvili gya gu gira siliwugiso nya sikhongolo. Gi ngu dzi kodza gu tshisa mafuni nilo wa ndzadzini wu wonwa khu vathu.

¹⁴Gi ngu pengisa vathu va tigoni khu siliwugiso gi ningidwego gu gira khu tshivba nya girengo nya guhegule. Gya gu senga vathu va tigoni va gira gifananiso nya gudhumise girengo nya gukokwe phandza khu litshari gi wuya gi vbanya.

¹⁵Gi ningidwe gambe tshivba nya guninge hefemulo gifananiso nya girengo, gasi gi kodza gu ganela ni tshivba nya gusonge vatshavbo vale va si khozeligo githombe nya girengo.

¹⁶ Gi di ruma vatshavbo vathu, sanana ni vakhongolo, sitetema ni sisiwana, va nya gutshulega ni dzikhumbi, vatshavbo gu vbweta va vegwe gifungo mandzani ya nyamudye, mwendro vbagiwombotunu.

¹⁷Khu guralo, vale va gu ni gifungo, mwendro lina nya girengo, mwendro sayo nya lina la igyo khavo basi va dzumedziswago gu renga mwendro gu rengisa silo.

¹⁸Isoso gu vbwetega wugengeli! Wule a gu ni mapimo a na tshamusele sayo nya girengo, kholu khuwo sayo[29] nya muthu. Sayo wakone khawo: Livbandre na limwedo mazana, ni livbandre na limwedo magumi ni livbandre na mweyo (666).