Read gitonga Gutuledwa 16 Bible Online

Gutuledwa 16 - gitonga bible

Gutuledwa 16

¹Eni nyi dipwa lito nya likhongolo na li gu duga khu Nyumbani ga Nungungulu, li gu embela dzingilozi dza Nungungulu, khilo: “Indrani mu ya vbaladza tigoni sikombe satshavbo nya livbandre na sivili si tadego khu likhulo la Nungungulu.”

²Yi di khuga ngilozi nya guhegule yiya vbaladza gikombe gyaye tigoni. Va di tedwa khu silondra nya guvbise nya guthise ngudzu, vathu vale va nga bani va vegidwe gifungo nya girengo, ni vale va nga khozelago gifananiso gyaye.

³Ngilozi nya wuvili yi di vbaladza gikombe gyaye linene, li vbindrugedza li khala novba khwatshi khwa muthu nya gufe. Si difa sivangwa satshavbo sa linene.

⁴ Ngilozi nya wuraru yi di vbaladza gikombe gyaye mitsongoni ni sifefeni nya mati. Si vbindrugedza si khala novba.

⁵Khavbo avbo, nyi dipwa ngilozi yi fumago matini na yi gu ganela, khiyo: “U lulamide uwe, Pfhumu, u guromo, u nga bani u romo! Gambe u Agide kholu u lamude silo sesi.

⁶U va sedziside novba, kholu va vbaladzide novba wa va nya gukatega ni vaprofeti, va fanedwe khu tsayiso yoyo.”

⁷Nyi dipwa gambe lito khu giluveloni na li gu ganela, khilo: “Khu lisine, Pfhumu Nungungulu nya Tshivba Yatshavbo, gulamula gwago khwa lisine, gu lulamide.”

⁸Ngilozi nya wu na yi di vbaladza gikombe gyaye damboni, yi ningwa tshivba nya guvbise vathu khu nilo.

⁹Vathu va di hahudwa khu lihani nya likhongolo, va vbya nya guthise, va gu vala lina la Nungungulu, a gu ni tshivba nya gu rumele sitsayiso sesi; aholu, kha va dzi kodza gu vbindrugedza, va rungudza Nungungulu.

¹⁰ Ngilozi nya livbandre yi di vbaladza gikombe gyaye vbatshani nya gikhalo nya wufumu nya girengo, mufumo wa iyo wu di fenengedzwa khu gidema. Vathu va di dzi hodzedzela malimi khu wuvi.

¹¹Va di vala Nungungulu wa Ndzadzini, khu kotani nya gutshaniseke gwawe khu silondra. Aholu kha va dzi kodza gu vbindrugedza va diga mithumo yawe nya guvivbe.

¹² Ngilozi nya livbandre na mweyo yi di vbaladza gikombe gyaye tsongoni nya khongolo wa Ewufrate, mati yaye ma di banga gasi gu tulega ndzila nya guvbindre vafumeli va Khugadambo.

¹³Khavbo avbo, nyi di wona maphuvbo mararu nya guvivbe nya gufanane ni vanyakhele na ma gu duga khu kanani ga mwamilambo, ni kanani ga girengo, ni kanani ga muprofeti nya malipha.

¹⁴Aya khu maphuvbo nya mandriki ma girago siliwugiso, ma yago ga vafumeli vatshavbo va mafuni gasi gu va tshanganisa vata dwana nyimbi nya Litshigu Likhongolo la Nungungulu nya Tshivba Yatshavbo.

¹⁵ (Khalani na mu dzi dongisede kholu nyi na vboha kha nga mbafa; kategide wule a lirelago na vegiside dzingandzu dzaye gasi a si gimbili wumbwiri, dzitshoni dzaye dzi gu wonwa khu vathu).

¹⁶ Maphuvbo ya mararu ma di tshanganisa vafumeli wulangani wu ranwago khu Gihebheru pwani “Harimagedoni.”

¹⁷Ngilozi nya livbandre na wuvili yi di vbaladza gikombe gyaye ndrengelengeni. Gu di duga lito nya likhongolo khu vbagikhalotunu nya Wufumu ndrani nya Nyumba ya Nungungulu, khilo: “Satshavbo si tadzisegide.”

¹⁸ Khavbo avbo, gu di lasa, gu pwala dzihuwa, gu dzuma mabara, gu handzamedza girevareva nya gu gima na gima gi di si gu wonwi khu muthu; a diri girevareva nya gikhongolo ngudzu.

¹⁹ Lidhoropa nya likhongolo li di pandrega khu sipandre siraru, madhoropa ya va nya mayigo ma gu khungumuga. Nungungulu a di dundruga Bhabhiloni nya gukhongolo a gu sedza gikombe nya guvile khu vbinyu nya likhulo laye.

²⁰ Sidwa satshavbo si di thava, sigomo si di mwalalega.

²¹ Khavbo avbo, khu ndzadzini gu di thega maralala kha nga siwindri nya gulemele pimo nya taleta mweyo. Vathu va di vala Nungungulu khu kotani nya gitsayiso nya maralala kholu gi diri gikhongolo ngudzu.