Read gitonga Gutuledwa 17 Bible Online

Gutuledwa 17 - gitonga bible

Gutuledwa 17

¹ Yi dita ngilozi mweyo nya dzile nya livbandre na dzimbili dzi nga bani dzi pharide livbandre na sivili sikombe, yita ganela ni eni, khiyo: “Delu eno, nyi gu nonedza gu lamudwa nya gibhayi gikhongolo[32] gi khalago wubambe nya mati nya linene,

² egi vafumeli va tigoni va nga bhayago nagyo, gi nga levisa vathu va tigoni khu wadwa nya wubhayi waye.”

³ Yi di nyi yisa giwulani khu liphuvbo. Nyi diya wona nyamayi na khilede girengo nya gufuvile, na gi lovetedwe malina nya guvale Nungungulu, giri ni livbandre na mivili mihungo ni likhumi dzikheho.

⁴ Nyamayi a di ambade mwendra nya giwunguwungu niyo nya gufuvile, na dzi mburisede khu ndralama, ni siwindri nya gukhedzige. Mandzani gwaye a di pharide gikombe nya ndralama nya gutale khu manyala ni ndzilo nya wubhayi waye.

⁵Vbagiwombotunu gwaye gu di lovidwe lina nya sihalo gupwani: “Bhabhiloni nya Khongolo, Melegi nya sibhayi ni Guvivba ga tigoni.”

⁶Nyi di wona nyamayi wule na gu levide khu novba wa va nya gukatega ni novba wa dzifakazi dza Jesu; na nyi mu wone nyi di liwuga ngudzu.

⁷Aholu ngilozi yi di nyi embela, khiyo: “Khu ginani u liwugago? Nyi na gu tshamusela sihalo nya nyamayi ni girengo gi mu rwalago, gi gu ni livbandre na mivili mihungo, ni likhumi dzikheho.

⁸ “Girengo u nga gi wona gi diromo, aholu gi mwalo gambe; gya gu duga khu phalani giya mbembiswa; vathu va tigoni, vale malina yawe ma sa lowago libhukuni nya womi, gukhugela nya gu vangwe litigo, va na samadziswa khu gu wona gukhavo girengo gi nga bani giromo, gi mwalo gambe, aholu gi na tumbuluga nyaluphye.

⁹“Esi gu vbwetega hungo nya guti ni mapimo. Livbandre na mivili mihungo yi thudwago, khu livbandre na sivili sigomo si khaledwego khu nyamayi.

¹⁰Gambe khu livbandre na vavili vafumeli: Livbandre nya avo va thegide, moyo a nga gu fuma, mumbe a si gu vbohi. Aholu a gu vboha a na fuma gikhatinyana nya gidugwana basi.

¹¹Girengo gi nga bani giromo, olu gi gu mwalo gambe, igyo nigyo gya gu tshamusela mumbe mufumeli nya livbandre na wuraru; a guromo tengoni nya vale nya livbandre na vavili vayago vaya mbemba.

¹²Likhumi dzikheho u nga dzi wona khu likhumi vafumeli vale va si gu hakhiswigo gidhumo nya wufumu, aholu, ndrani nya gikhatinyana va na kabana wufumu ni girengo.

¹³Vatshavbo va na ni mapimo mamowo, va na vega tshivba yawe nya wufumu mandzani nya girengo.

¹⁴Ava va na wugela Nvutana va yi dwanisa, aholu va na padwa khu Nvutana, kholu khiyo Pfhumu nya dzipfhumu, Mufumeli nya vafumeli. Gumogo Naye, vale va ranidwego, va khodwago, va khalago Naye, va na pala navo.”

¹⁵Ngilozi yi di nyi embela gambe, khiyo: “Mati u nga ma wona ma na khaledwe khu nyamayi nya gibhayi khu mafumbu, sidzemo ni mayigo ni malimi.

¹⁶Likhumi dzikheho u dzi wonego ni girengo, si na wugela nyamayi nya gibhayi si mu gira gisiwana si mu diga wumbwiri, si hodza nyama yaye, si yi vbisa niloni.

¹⁷ Kholu Nungungulu vegide myonyoni gwawe gasi gu gira guhaladza gwaye, va dzumela gu thumela girengo kala ma tadzisega magana ya Nungungulu.

¹⁸Nyamayi u mu wonego khu lidhoropa nya likhongolo li fumelago vbatshani nya vafumeli va tigoni.”