Read gitonga Gutuledwa 18 Bible Online

Gutuledwa 18 - gitonga bible

Gutuledwa 18

¹Khu hwane nya silo sesi, nyi di wona gambe yimbe ngilozi na yi gu tshiga khu ndzadzini ni tshivba nya yikhongolo ngudzu, ni litigo li di wenengedzwa khu gungangamela gwaye.

² Yi di huwata khu tshivba khu lito nya gukhugege, khiyo: “Thegide! Thegide Bhabhiloni nya khongolo,[33] gu vbindrugedzide gu khala wulanga nya madhimoni, phago nya maphuvbo yatshavbo nya guvivbe, ni wuthavelo nya sinyoni satshavbo nya gunyenyeze, si vengegago.

³ Kholu mayigo yatshavbo ma sede wuvasi nya vbinyu nya likhulo nya wubhayi waye. Vafumeli vatshavbo va tigoni va bhayide naye. Ambari va nya wugwewo va tigoni va fumide khu kotani nya wubhayi waye.”

⁴ Nyi dipwa gambe lito khu ndzadzini, na li gu ganela, khilo: “Dugani enu vathu vangu khu dhoropani momo, gasi mu si hengeli naye sighoho saye, mu patwa nenu sitsayisoni gwaye.

⁵ Kholu sighoho saye si wungedzelane kala si ya ghuma damboni, gambe Nungungulu dundrugide mithumo yaye nyambasi yadi.

⁶ Mu bweledzeleni guvbindrisa guvili, gukhedza khu guvivba a nga mi girelago. Omu nya gikombe a nga mi sedza khigyo, thelani sipimo sivili.

⁷Mu ningeni gutshaniseka ni wuvi nya guningane ni gidhumo, ni gutshamba a nga gu pwago, kholu khu monyoni gwaye wari, khuye: ‘Nyi khade vbagikhalotunu nya wufumu kha nga mufumeli, kha nyiri noni, gambe gima kha nyi napwa wuvi.’

⁸ Khu kharato, khu litshigu limwedo yi nata mitungu yaye khu gipitipiti: Gufa, gililo, ndzala; a na tsagamiswa khu nilo, kholu Pfhumu Nungungulu a mu lamudego, a na ni tshivba.”

⁹Vafumeli nya mayigo va nga girago naye wubhemba, va ghiya gumogo naye, va na mu lila va gu dzi laya, va gu wona wutshi nya guvbiswe gwaye.

¹⁰ Va na ema khu hwindzo khu gu thava gutshaniseka gwaye, khavo: “Libango! Libango lago uwe lidhoropa nya likhongolo la Bhabhiloni, lidhoropa nya gutale khu tshivba! Kholu u vbohedwe khu gikhati nya gutsayiswe gwago.”

¹¹ Va nya wugwewo va tigoni va mutigo va ngu mu lila va mu dilela kholu mwalo muthu a na gu va rengelago silo sawe va rengisago:

¹²Ndralama, parata, siwindri nya lisima, dziperola, myendra nya siwunguwungu, nya seda, nya gufuvile, ni mafumbu yatshavbo nya misimbo nya gunungele, ni sombo nya gugirwe khu magwaha nya dzindzofu, sombo nya guvatwe khu misimbo nya yadi ngudzu, ni sikete ni siwindri nya guage,

¹³ kinamomo, mafura nya gunungele, ni mafura nya gutole, ni libani, ni vbinyu, ni mafura nya guphule khayo, ni wuguvbi, ni tirigu, ni dzimombe, ni dziburu, ni dzinvuta, ni dzikavalu, ni dzikareta, ni dzikhumbi ni vathu.

¹⁴Va na embela lidhoropa, khavo: “Mihandro yile nya guvidzwe eyi hefemulo wago wu nga bani wu yi gola, yi gu thavide yi pengela hwindzo; satshavbo silo nya wufumu ni wurendra si dzimede vbafuvbi gwago, gima khu na nga si mana gambe.”

¹⁵ Varengisi vatshavbo nya silo sesi, vale va nga mana gufuma khu kotani nya lidhoropa, khu gu thava tsayiso waye, va na khalela hwindzo, va lila, khavo:

¹⁶“Libango! Libango lago uwe lidhoropa nya likhongolo, li nga bani li ambade myendra nya seda, nya siwunguwungu, nya gufuvile, nya gumburisedwe khu ndralama, ni siwindri nya lisima, ni dziperola. Kholu khu gikhatinyana nya gidugwana wu pfhungumugide wufumu nya wukhongolo ngudzu nya guvbindre tengo!”

¹⁷ Vagimbidzisi nya mataro ni vatshavbo va gimbilago khayo, vamarinyero ni vatshavbo vathu va manago guvbanya khu gu thumela phwani, va di ema khu hwindzo,

¹⁸ va di womba gimima khu gu wona wutshi nya luvbya laye, khavo: “Khu levbini limbe lidhoropa li nga bani li gu fanana ni lidhoropa leli nya likhongolo?”

¹⁹ Va di dzi thedzela nguma hungoni, na va gu dilela, va lila marongo, khavo: “Wowe! Wowe! Libango nya lidhoropa eli nya likhongolo li nga fumisago vatshavbo va nya mataro khu dzi thomba dzaye, li phalalegisidwe khu githugedza.”

²⁰Nengelani mu bhuma vbatshani gwaye, ndzadzi, ni enu mwatshavbo va nya gukatega, ni vapostoli, ni vaprofeti. Kholu Nungungulu lamude khu gu mi phodzela, khu gu tsayisa kharati lidhoropa leli.[34]

²¹ Khavbo avbo, ngilozi nya tshivba yi di khusa giwindri nya gikhongolo nya nga gitshindro yi gi rinya nondrwani, khiyo: “Khidzo kharati li na mbembiswago khidzo lidhoropa nya likhongolo la Bhabhiloni; mwalo a na li wonago gambe.

²² Gima kha dzi na pwala gambe umo dzindzimo nya vawombi nya mihwambi, ni vaembeleli, ni vawombi nya sitoliyo ni mipundru. Kha na manega ndrani gwago muvati mwendro meseri nya wevbini thumo, gima kha gu na pwala gambe gudzuma nya gitshindro ndrani gwago.

²³ Wenengedzo nya kandriya gima kha wu na wenengedza gambe ndrani gwago, kha li na pwala gambe dzinyumbani gwago lito la mwama ni ngadzi, khaguva vasundzi vago va diri vafumeli nya mayigo, kholu mafu yatshavbo ma pengisidwe khu wuloyi wago.”

²⁴Ndrani gwaye wu manidwe novba wa vaprofeti ni va nya gukatega, novba wa vatshavbo vathu va nga songwago mafuni.[35]