Read gitonga Gutuledwa 19 Bible Online

Gutuledwa 19 - gitonga bible

Gutuledwa 19

¹Khu hwane nya satshavbo sesi, nyi dipwa nga lito nya lidhuma nya vathu na li gu tshiga khu ndzadzini, khilo: “Aleluya! Guvbanyisa, ni gidhumo, ni tshivba sa gu tumbuluga khu ga Pfhumu, Nungungulu wathu.

² Kholu gulamula gwaye khwa lisine ni gululama, khaguva tsayiside gibhayi gikhongolo gi nga mbembisa litigo khu wubhayi waye, gambe phodzede vbatshani ga igyo novba wa sithumi saye.”

³ Va di engedza, khavo: “Aleluya! Wutshi waye wa gu tuviga kala gupindruga.”

⁴Vale nya magumavili na mana madhota, ni sivangwa sile nya sina nya guvbanye, va di khidzima va khozela Nungungulu a khadego vbagikhalotunu nya wufumu, khavo: “Amen! Aleluya!”

⁵ Khu vbagikhalotunu nya mufumo gu di duga lito, khilo: “Rungudzani Nungungulu wathu, enu mwatshavbo sithumi saye, enu mu gu ni githawo gwaye, nya vadugwana ni vakhongolo.”

⁶ Nyi dipwa gambe nga lito nya likhongolo nya talo nya vathu, nga gudzuma nya talo nya mati, nga gudzuma nya libara, na va gukhavo: “Aleluya! Kholu Pfhumu, Nungungulu wathu nya Tshivba Yatshavbo a ngu fuma!

⁷Hongoleni hi tsake, hi nengela ni gu mu rungudza, kholu gi vbohide gikhati nya buzo wa Nvutana, mwangadzi waye gambe a dzi dongisede,

⁸ambagisedwe dzingandzu nya gumbure dzi handzidwego dzi agiswa gwadi.” Dzingandzu nya wumburi khu mithumo ya ndruda ya va nya gukatega.

⁹ Khavbo avbo, ngilozi yi di nyi embela, khigyo: “Lova, khuwe: Va kategide vale va ranidwego guta hodza buzo nya mutshadho wa Nvutana.” Yi di engedza yi nyi embela, khiyo: “Aya khu magana nya lisine ya Nungungulu.”

¹⁰Eni nyi di thega migondroni gwaye gasi gu yi khozela. Aholu, iyo yi di nyi embela, khiyo: “Ahihi! Wona gwadi! Eni nyi githumi kha nga uwe ni vandriyago vatshavbo va girago wufakazi wa Jesu. Nungungulu khuye basi a fanelago gu khozedwa.” Khu lisine, wufakazi wa Nungungulu khu liphuvbo nya wuprofeti.

¹¹ Nyi di wona gambe ndzadzini na gu tulegide, gu wonega kavalu nya guage. Oyu a yi khiledego a gu ranwa pwani khuye nya “Gutumbege,” nya “Lisine,” kholu khu gululama a di fuma ni gu dwana nyimbi.

¹² Maho yaye ma di ngangamela nga malavbelavbe nya nilo, hungoni gwaye a na ni sihugu nya singi. A na ni lina li lovidwego, nya gu mwalo a litigo, vbavbandze ga uye mune basi.

¹³A di ambade mwendra nya gunegwe novbani. Lina laye, khuye: “Lito la Nungungulu.”

¹⁴Mabutho ya Ndzadzini ma di mu landrela na ma ambade dzingandzu nya wumburi nya guage ngudzu, na ma khilede dzikavalu nya guage ngudzu.

¹⁵ Khu kanani gwaye gu di duga litshari nya guvbire gasi gu paya khilo mayigo. Uye a na ma fumela khu ndronga nya dzisimbi; a na gamela maphisoni vbinyu nya likhulo la Nungungulu nya Tshivba Yatshavbo.

¹⁶Vbatshokatunu nya mwendra wu fenengedzago giwunu gyaye, gu lovidwe pwani: “Pfhumu nya dzipfhumu; Mufumeli nya vafumeli.”

¹⁷Gu di handzamedza nyi wona ngilozi mweyo na yi emide vbatshani nya lidambo, na yi gu ganela khu tshivba ga sinyoni satshavbo si nga bani si gu vbuvba ndrengelengeni, khiyo: “Deluni; tshanganani buzoni nya khongolo wa Nungungulu,

¹⁸ gasi muta hodza nyama nya vafumeli, nyama nya vathangeli nya dzinyimbi, nyama nya dzindrena, nyama nya dzikavalu, ni ya vale va khiledego idzo, nyama nya mafumbu yatshavbo, va nya gutshulega ni dzikhumbi, nya vadugwana ni vakhongolo.”

¹⁹Khavbo avbo, nyi di wona girengo ni vafumeli nya mayigo ni mabutho yawe na va tshanganide gasi gu dwanisa wule a nga bani a khilede kavalu ni dzinyimbi dzaye.

²⁰ Aholu girengo gi di modwa gumogo ni muprofeti nya malipha, a nga girago siliwugiso tshivbani nya girengo, a gu pengisa vatshavbo ava va nga hakhago gifungo nya girengo ni va khozeli nya gifananiso gyaye. Va vavili va rinyidwe na va gu vbanya tsivani nya nilo wu dzurago na wu gu engedzedwa khu solufa.

²¹Ava vambe va nga tshalago va di songwa khu litshari li nga dugago khu kanani ga wule a nga bani a khilede kavalu. Ni sinyoni satshavbo si di khura khu nyama yawe.