Read gitonga Gutuledwa 22 Bible Online

Gutuledwa 22 - gitonga bible

Gutuledwa 22

¹ Khavbo avbo, ngilozi yi di nyi yeyedza tsongo nya mati nya womi, nya gukhedzige nga libona nya kristali, na ma gu duga khu vbagikhalotunu nya wufumu wa Nungungulu ni wa Nvutana.

² Vbakari nya tendrela waye, khu maphuvbo ya mavili nya tsongo womo simbo nya womi wu velegago mihandro, likhumi na dzimbili dzinyondro, khu ngima ni ngima, gu velega. Gasi mahagane yakone rendre nya guhawulugise vathu vatshavbo.

³ Gima kha gu na manega gambe guvala, kholu gi na bani giromo umo gikhalo nya wufumu wa Nungungulu ni wa Nvutana. Sithumi saye si na mu thumela.

⁴Va na wona khovbe Yaye ni lina laye li na lowa siwomboni gwawe.

⁵ Gima kha gu na manega gambe wutshigu; kha gu na vbwetega safa nya mwenge, ambari guwenengedza nya lidambo, kholu Pfhumu Nungungulu a na wenengedza vbatshani gwawe, avo va na fuma khu gupindruga nya gupindruge.

⁶Ngilozi yi di nyi embela, khiyo: “Magana yaya ma tumbegide, khya lisine, kholu Pfhumu Nungungulu a ningago maphuvbo vaprofeti, rumede ngilozi yaye gu ya yeyedza ga sithumi saye silo si guromo vbafuvbi ni gu dugelela.

⁷Wonani, nyi nguta nugunugu. Kategide oyu a vegisago magana nya wuprofeti nya libhuku leli.”

⁸Eni, Johane, kheni nyi gu fakazi nyi nga si pwago ni gu si wona silo sesi. Na nyi si wone ni gu sipwa nyi di khidzima migondroni nya ngilozi yi nga nyi yeyedza silo sesi nyi fela gu yi khozela.

⁹Aholu, ngilozi yi di nyi himbedzela, khiyo: “Ahihi, u nga giri isoso, eni nyi githumi kha nga uwe ni vandriyago, ni vaprofeti, ni vatshavbo vale va vegisago magana nya libhuku leli. Khozela Nungungulu.”

¹⁰Yi di nyi embela gambe, khiyo: “U nga lemi magana nya wuprofeti nya libhuku leli, khaguva gikhati gyomo vbafuvbi ni gu vboha.

¹¹ Muthu nyambana ndruda a na simame ni mithumo yaye nya guwegele, muthu nya gunyenyeze a na simame ni gu dzi nyenyezisa gwaye, muthu nya gululame a na simame ni mithumo nya gululame gwaye. Ni uye a agidego a na simame gu dzi agisa.

¹²“Wonani, eni nyi nguta khu gu vbiredza, nyi resa tshatshazelo wa muthu ni muthu gukhedza khu mithumo yaye.

¹³ Eni kheni Alfa ni Omega! Oyu nya Guhegule ni uye nya Guhegise. Guphela ni Guhegisa.

¹⁴ Va kategide vale va handzago dzingandzu dzawe novbani ga Nvutana, va fela gu mana fanelo nya guhodze simbo nya womi gasi va kodze gu bela khu myanya ya dhoropani.

¹⁵Va na tshala vbavbandze dzimbwa, dzindroyi, va nya wubhayi, va nya gu khozela sikwembu ni vanungungulu nya malipha, sighevenga ni vatshavbo vale va golago ni gu thuma mithumo ya malipha.

¹⁶ “Eni Jesu, nyi rumede ngilozi yangu umo nya mabandla,[37] gasi guta mi fakazela silo sesi. Eni nyi Khamba ni Mbewu nya lihundzu la Dhavhidhe, nyi Thandra nya Wuronga nya guwenengedze ngudzu.”

¹⁷ Liphuvbo ni ngadza Nvutana, vari, khavo: “Delu!” Ni wule a pwago a na ganele nuye, khuye: “Delu!” Wule a gu ni lidora a nate. Oyu a dzinago a na hakhe mahala mati nya guvbanye.

¹⁸Ga vatshavbo va pwago magana nya wuprofeti nya libhuku leli nyi ngu tivisa, gukheni: A gu kala muthu a engedzela gilogyo ga magana yaya, Nungungulu a na mu engedzela sitsayiso si lovidwego libhukuni momu.

¹⁹ A gu kala muthu a vbungula magana nya wuprofeti nya libhuku leli, Nungungulu a na dusa gipandre gyaye simboni nya womi ni Dhoropani nya Guage, si tiviswago libhukuni momu.

²⁰Oyu a gu fakazi nya silo sesi wari, khuye: “Ina, nyi nguta nugunugu!” Amen. Delu Pfhumu Jesu!

²¹Pfhumu Jesu a na tshise wuhigo waye ga enu mwatshavbo. Amen!