Read gitonga Gutuledwa 4 Bible Online

Gutuledwa 4 - gitonga bible

Gutuledwa 4

¹Hwane nya silo sesi, nyi di tula maho, nyi wona lidimba na li tudwe Ndzadzini: Lito nya guphele nyi nga lipwago na li ganela gwangu, kha nga pundru, li di, khilo: “Lita uta eno, gasi nyi gu yeyedze iso si na giregago hwane nya esi:”

²Khavbo avbo, nyi di dzegela gu beledwa khu Liphuvbo, nyi di wona gikhalo nya wufumu ndzadzini, na khade avbo muthu nya gukari;

³ uye a nga bani a khade avbo, a di khedziga kha nga giwindri nya jasiperi [16] nigyo nya saridhoniya. Gikhalo gyogyo gi diromo khu vbakari nya wulaho wa ndzadzini, nya gukhedzige kha nga giwindri nya esmeralidha.

⁴Na si randrede gikhalo gegi nya wufumu, si diromo magumavili na sina sikhalo nya wufumu, avbo gu nga bani gu khade magumavili na mana madhota,[17] ma na ambade dzingandzu nya guage ni sihugu nya wufumu, nya gugirwe khu ndralama.

⁵ Gikhalo gegi gi di lasa ni gudzumadzuma, ni gu pandra mabara. Khu mbeli yi di khondrisidwe livbandre na mivili myenge, a gu livbandre na mavili maphuvbo ya Nungungulu.

⁶ Mbeli nya gikhalo nya wufumu gi diromo gilo nya gufanane ni yiphwa nya mati nya gugyendze kha nga libona. Khu vbakari, avbo nya gikhalo gegi ni mudzibambe gakone si diromo sirengo sina nya gutale khu maho hwane ni mbeli.

⁷ Girengo nya guhegule gi di gu fanana ni nghala, egi nya wuvili, ni mombe, egi nya wuraru, gi diri ni khovbe nya nga muthu; egi nya wu na gi di gu fanana ni lighama la gu bani li gu vbuvba.

⁸ Gimwegyo ni gimwegyo nya sirengo sesi gi na ni livbandre na limwedo mambapi nya gutale gwatshavbo khu maho, khu ndrani ni vbavbandze. Wutshigu ni mihani sa gu embelela nyamba garala, khiso: “U agide, U agide, U agide, Pfhumu Nungungulu nya Tshivba Yatshavbo, wule a nga bani ari uye, wule a gu uye, wule a na tago.”

⁹Gikhati sirengo sesi si dhumisago ni gu rungudza ni gu bonga wule a khadego vbagikhalotunu nya wufumu, a gu uye a vbanyago kala gupindruga,

¹⁰madhota yatshavbo nya magumavili na mana ma gu khidzima mbeli ga wule a khadego vbagikhalotunu nya wufumu, gasi gu khozela wule a vbanyago kala gupindruga, va gu tshula sihugu sawe nya wufumu va si vega mbeli nya gikhalo nya wufumu, na va gukhavo:

¹¹“Pfhumu Nungungulu wathu, u ngu yedwa khu gu hakha gidhumo, ni rungudzo ni tshivba, kholu khuwe Muvangi nya silo satshavbo; khu gudzina gwago u si vangide ni gu si tumbulugisa.”