Read gitonga Gutuledwa 5 Bible Online

Gutuledwa 5 - gitonga bible

Gutuledwa 5

¹ Khavbo avbo, nyi di wona libhuku mandzani ga nyamudye ga wule a khadego vbagikhalotunu nya wufumu; li di lovidwe khu ndrani ni vbavbandze, li lemwa khu livbandre na sivili sifungo.

²Nyi di wona gambe ngilozi nya tshivba ya Nungungulu, na yi gu huwelela khu lito nya gukhugege, khiyo: “Khu mani a gu ni fanelo nya gutule libhuku, a namula sifungo saye?”

³Aholu kha manega ni moyo basi ndzadzini, ambari mafuni, ambari vbavbatshi nya mafu,[18] a nga kodzago gu tula libhuku mwendro gu li khedza.

⁴Eni nyi di lila ngudzu, kholu mwalo a nga manwago nari ni fanelo nya gutule, mwendro gu hevbula, mwendro gu li khedza.

⁵ Limwedo nya madhota yale li di nyi degudzela, khilo: “U nga lili; kholu Nghala[19] nya lihundzu la Judha a gu Melego wa Dhavhidhe, yi pade, yi ngu kodza gu tula libhuku ni gu namula sifungo saye satshavbo nya livbandre na sivili.”

⁶ Khavbo avbo, nyi di wona Nvutana na yi emide, vbakari nya gikhalo nya wufumu, nga khwatshi yi di songwa, na yi randredwe khu sirengo sile sa sina ni madhota. Yidiri ni livbandre na dzimbili dzikheho, ni livbandre na mavili maho, a gu livbandre na mavili Maphuvbo ya Nungungulu ma rumedwego mafuni gwatshavbo.

⁷Khavbo avbo, Nvutana yi di ta hakha libhuku khu mandzani ga nyamudye ga wule a khadego vbagikhalotunu nya wufumu.

⁸ Na gu hakha libhuku, sirengo sile sa sina ni madhota yale nya magumavili na mana ma di khidzima mbeli ga Nvutana, mari ni sitendre ni sikombe nya gugirwe khu ndralama na si tade khu libani, a gu milombelo nya sihathwa.

⁹ Ma di gu emba ndzimo nya yiphya, khayo: “U na ni fanelo nya gu hakhe libhuku ni gu namula sifungo saye, kholu u songidwe; khu novba wago, u dzegiside vathu nya mahundzu, malimi, mafumbu, ni mayigo yatshavbo. U gu va ningela ga Nungungulu.

¹⁰ U va giride vafumeli ni vaphasi nya mhamba ya Nungungulu wathu; avo va na fuma mafuni.”

¹¹ Khavbo avbo, nyi di wona ni gupwa lito nya mwandra nya dzingilozi dzi nga bani dzi randrede gikhalo nya wufumu, ni sirengo sile sa sina ni madhota; tengo wa kona a diri makhulukhulu ni makhulukhulu ni mazanazana.

¹²Va di gu emba khu lito nya gukhugege, khavo: “Nvutana yi nga songwago yi fanede gu ningwa mufumo, wurendra, guti, tshivba, rungudzo, gidhumo ni wuzundzo.”

¹³Sivangwa satshavbo sa ndzadzini, sa mafuni, ni vbavbatshi nya mafu niso sa matini nyi di sipwa satshavbo na si gu khiso: “Wuzundzo ni rungudzo, ni wufumu ni tshivba kala gupindruga ga wule a khadego vbagikhalotunu nya wufumu ni ga Nvutana.”

¹⁴Sirengo sile sa sina si di hakha, khiso: “Amen!” Gasi madhota nya magumavili na mana ma di khidzima ma gu khozela wule a vbanyago kala gupindruga.