Read gitonga Gutuledwa 8 Bible Online

Gutuledwa 8 - gitonga bible

Gutuledwa 8

¹Gikhati Nvutana yi nga namulago gifungo nya livbandre na sivili, gu di gira tsadego ndzadzini gipimo nya gyadi.

²Khavbo avbo, nyi di wona dzingilozi dzile nya livbandre na dzimbili dzi guromo mbeli ga Nungungulu, na dzi gu ningwa livbandre na mivili mipundru.

³ Yimbe ngilozi yi dita ema vbafuvbi ni giluvelo, na yi pharide gifugwana nya guwumbwe khu ndralama, na gi tade khu libani. Va yi ningide libani nya lingi gasi gu li vbisa gumogo ni milombelo nya sihathwa satshavbo vbagiluvelotunu nya ndralama gi guromo mbeli nya gikhalo nya wufumu.

⁴Wutshi nya libani wu di gwela khu mandzani nya ngilozi gumogo ni milombelo nya sihathwa wu hongola ga Nungungulu.

⁵ Khavbo avbo, ngilozi yi di dzega gifugwana nya libani, yi tadza khu magala nya nilo wa vbagiluvelotunu, yi rinya tigoni. Gukhugela avbovbo, gu di dzuma mabara, gu lasa, bwelo khavbo gu manega girevareva.

⁶Dzingilozi dzile nya livbandre na dzimbili dzi di dzi dongisela gasi gu womba mipundru dzi nga bani dzi pharide mandzani.

⁷ Ngilozi nya guhegule yi di womba pundru. Khavbo avbo, gu di thega maralala ni nilo tigoni, na si patidwe ni novba. Gu divbya gipandre nya wuraru nya litigo ni misimbo yakone, mwasi watshavbo nya guvbanye wu di tsagamiswa khu luvbya.

⁸Ngilozi nya wuvili yi di womba pundru. Gilogyo nya gufanane ni gigomo nya gikhongolo nya gungangamele nga nilo gi di rinywa linene. Khavbo avbo, gipandre nya wuraru nya yiphwa yi di vbindrugedza yi khala novba.

⁹Gipandre nya wuraru nya sivangwa si vbanyago phwani si difa ni gipandre nya wuraru nya dzingalava dzi di mbemba.

¹⁰ Ngilozi nya wuraru yi di womba niyo pundru waye, nyeledzi nya yikhongolo yi di thega khu ndzadzini, na yi gu dzura kha nga mwenge. Yi thegede gipandre nya wuraru nya mitsongo ni sifefe nya mati.

¹¹ Nyeledzi yoyo ya gu ranwa gupwani khiyo “Guvava.” Gipandre nya wuraru nya mati ma di vbindrugedza ma vava. Vathu nya vangi va fude khu kotani nya mati, ma nga vbindrugedza ma gu vava.

¹² Ngilozi nya wu na yi di womba pundru, khavbo avbo, gipandre nya wuraru nya lidambo, nigyo nya ngima, nigyo nya dzinyeledzi, si di thapedwa niso; si gu tshimega. Gipandre nya wuraru nya mihani nigyo nya wutshigu si di khala gidemani.

¹³Nyi di wona ngilozi na yi gu vbuvba ndzadzini, nyi yipwa na yi gu huwelela khu tshivba, khiyo: “Wowe! Wowe! Libango la vale va vbanyago mafuni, gikhati gu na pwalago gudzuma nya mipundru nya dzingilozi dza dzitharu dzi nga tshadego gu womba.”