Read gitonga Gutuledwa 9 Bible Online

Gutuledwa 9 - gitonga bible

Gutuledwa 9

¹Ngilozi nya livbandre yi di womba pundru, khavbo avbo, nyi di wona nyeledzi[20] ndzadzini na yi thegide mafuni. Yi di ningwa pfhungulo nya liphala nya likhongolo ngudzu.

² Nyeledzi yi di tula liphala gu duga wutshi nya gufanane nuwo nya luvbya nya likhongolo ngudzu. Lidambo ni ndzadzini gu di sivbadzwa khu wutshi wakone.

³ Khu wutshini gu di duga mbasa[21] nya yingi yi phalalega ni litigo. Mbasa yakone si diri ni wuhungu kha nga nya dzihume.

⁴ Yi di leletedwa gumba sasela mwasi nya guvbanye wa khabini, mwendro sisimbwana satshavbo ni misimbo nya yikhongolo. Aholu, yi rumedwe basi gu sasela vathu vale va nga bani va sa vegwa gifungo gya Nungungulu vbagiwombotunu.

⁵Ambari ulo yi di laywa gumba songa vathu, aholu gu va sanisa ngudzu ndrani nya livbandre migima. Mahodzelo nya mbasa yoyo ma di vbisisa nya nga hume.

⁶ Ndrani nya migima yoyo, vathu va na dogorela gufa va gu hamuga, va na vbweta gufa, aholu, lufu li na va thava.

⁷ Mbasa yoyo yi di fanana ni dzikavalu dzi dongisedwego guya nyimbini. Khovbe kha nga muthu, hungoni yi di ambade kha nga gihugu nya wufumu nya gugirwe khu ndralama.

⁸ Yidiri ni ndzudzu nya gulaphe kha nga nya vanyamayi; magwaha yakone ma di gu fanana nayo nya nghala.

⁹ Yidiri ni givhikelo nya gikete vbakhanatunu, ligwaha nya mambapi yakone li di fana ni ligwaha nya dzikareta nya gundrindrwe khu dzikavalu nya dzingi nya gututumele nyimbini.

¹⁰Yidiri gambe ni ngila nya guhegise khu muba nga oyu nya hume. Ngilani gakone wu diromo wuhungu nya tshivba nya gusanise vathu ndrani nya livbandre migima.

¹¹Mbasa yatshavbo yi di gu thangedwa khu pfhumu mweyo a gu ngilozi ya phalani. Khu Gihebheru ya gu ranwa “Abhadhoni” khu Gigereki “Apollion” gu tshamusago gupwani “Mumbembisi.”

¹²Egi gitsayiso nya guphele gi vbindride. Aholu gu nga tshade gambe sitsayiso sivili hwane nya egi.

¹³ Khu hwane nya isoso, ngilozi nya livbandre na mweyo yi di womba pundru, khavbo avbo, nyi di pwa lito na li gu duga khu dzikehoni dza dzina nya giluvelo nya ndralama, gi guromo mbeli ga Nungungulu.

¹⁴Lito li di embela ngilozi nya livbandre na mweyo yi nga bani yi pharide pundru, khilo: “Tshula dzingilozi dza dzina dzi hungidwego bambe nya tsongo khongolo wa Ewufrate.”[22]

¹⁵Dzi di tshudwa dzingilozi dza dzina na dzi dongisede tshivba nya gusonge gipandre nya wuraru nya vathu khu gipitipiti, gikhati gegi, litshigu leli, ngima yoyu, ni mwaga yoyu.

¹⁶Tengo nya vama va khiledego dzikavalu nya nyimbi, va diri mazana mavili nya mazanazana (200.000.000) nya vama; nyi pwide tengo wawe.

¹⁷Nyi di woniswa kharati dzikavalu ni vama va dzi khiledego: Vakhileli va diri ni sighwabhata nya gungangamele nga nilo, nya gukhedzige ngudzu nga safira, nya guvbyuge nga sufula. Mihungo nya dzikavalu yi di gu fanana niyo nya dzi nghala. Khu maganani nya dzikavalu gu di duga nilo ni wutshi ni sufula.

¹⁸Khiyo eyi mitingu yeyi ya miraru: Nilo, wutshi ni sufula, si nga bani si duga khu kanani gwawe, si nga salela gipandre nya wuraru nya vathu va tigoni.

¹⁹Kholu tshivba nya dzikavalu dzakone yi diromo kanani ni vbamigilatunu gwawe. Migila yi di gu fanana ni dzinyoga, yi diri mihungo yi hodzago khiyo vathu.

²⁰ Ambari ga sigaradzo satshavbo sesi, vale va nga vbulugago, kha va dzi kodza gu vbindrugedza mavbanyelo, va nyenya sithombe nya guwumbwe khu mandza yawe, kha va diga gu khozela sikwembu ni sithombe[23] nya guwumbwe khu ndralama, khu parata, mwendro khu sugu ni misimbo. Va rana vanungungulu sithombe nyamba wona, nyamba pwa, nyamba gimbila.

²¹Kha va vbindrugedza mavbanyelo, gambe va di simama ni mithumo yawe nya guvivbe: A gu wughevenga, wuloyi, wubhayi ni wuvafa.