Read gitonga Rute 3 Bible Online

Rute 3 - gitonga bible

Rute 3

¹Nasale waye Nowemi a di mu embela, khuye: “Mwanangu, nyi na ni fanelo gu gu vbwetela wulanga, gasi u kodza gu khala, u tangala avbo.”

²Gambe Bhowazi, mune nya sithumi sile nya vanyamayi u nga bani u gimbila naso, nongo wathu. Wutshigu wowu a nata vbevberela tirigu yaye vbagithalatunu.

³Khu guralo, hamba u tola mafura, u ambala guambala gwago nya gwadi, u relela githalatunu; aholu u nga dzi tugudzisi gwaye, na si gu vbedzi gu hodza ni gu sela.

⁴Gasi gikhati a na hongolago aya lala, khedzisela gwadi wulanga a na guya lala avbo; u hongola u ya bela u funungula mawundru yaye, u lala nuwe avbovbo. Uye a na gu embela iso u yelago gu gira.

⁵Rute a di mu hakha, khuye: “Nyi na gira satshavbo u nyi embelago.”

⁶Khavbo avbo, Rute a di hongola githalatunu aya gira satshavbo a nga leletedwago khu nasale waye.

⁷Hwane nya gu Bhowazi na hodzide, a sela a khura monyo waye na wu tangade, a mu wona na guya lala vbafuvbi ni avbo gu nga wungedzedwago dzimbewu, Rute a dita kha gwadi, a ta funungula mawundru ya Bhowazi a lala avbovbo.

⁸Ni vbakari nya wutshigu, mwama yoyu a di khendzuga khu guthava, a thendregedza a wona nyamayi a nga bani na lade mawundruni gwaye.

⁹Uye a di mu wudzisa, khuye: “Gasi khuwe mani?” Rute a di hakha, khuye: “Kheni githumi gyago Rute. Fenengedza githumi gyago khu mwendra wago, kholu uwe u nongo u yelago gu nyi hambela.”

¹⁰Bhowazi a di mu embela, khuye: “PFHUMU Nungungulu a na gu kategise mwanangu, u yeyedzide wuwadi avbo gwangu guvbindra guhegulani, kha wa vbweta madzaha, sisiwana mwendro va nya gufuma.

¹¹Gasi olu mwanangu, u nga khali hwanga; satshavbo iso u ganedego nyi na gu girela, kholu vathu vatshavbo va dhoropani gwangu va ngu guti gukhavo u nyamayi nya guyele.

¹² Khidzo, lisine nyi nongo wago, aholu womo uye a gu wa lisine ngudzu guvbindra eni.

¹³Wutshigu wowu lala avba! Ga gugya mindru, uye a gu dzina guta gu hambela, ma tshambide; aholu a guta bomba gu gu hambela, eni nyi ngu sambanya khu PFHUMU Nungungulu a vbanyago gukheni nyi na gu hambela. Lala avba kala mindru.”

¹⁴Rute a di lala mawundruni gwaye kala gugya, a vindrugela gu wuga gu ngari dzimindru ngudzu, kholu Bhowazi, a di si dzini gukhuye a tidwa khu muthu gupwani a di dzude nyamayi a ta lala githalatunu.

¹⁵A mu embela gambe, khuye: “Resa mwendra yoyo u fenengedego, wu pharedzele.” Nyamayi a di wu pharedzela, Bhowazi a pima livbandre na moyo mipimo nya mala a mu rwega a bwelela naso dhoropani.

¹⁶Na vbohide gaya, nasale waye a di mu wudzisa, khuye: “Mwanangu si gu gimbilede kharini.” Uye a di mu embeledzela satshavbo iso mwama wule a nga gira avbo gwaye.

¹⁷A engedza gambe, khuye: “Mipimo yeyi nya livbandre na moyo nya mala, a di nyi ninga na gukhuye: U nga bweleli ga nasale wago nyambana gilo.”

¹⁸Khavbo avbo, Nowemi a di khuye: “Mwanangu, khala na wu rude, kala gu vboha mahegiso nya mahungu yaya; kholu mwama wule, kha na mana gurula na si gu lulamisi mahungu yaya muhuno.”