Read gitonga Rute 4 Bible Online

Rute 4 - gitonga bible

Rute 4

¹Khavbo avbo, Bhowazi a di gwela tandralani nya lidhoropa aya khala umo. A di wona mwama yoyu nya nongo a nga mu ganelago na guta; a di mu embela, khuye: “A ma sawu, nga ndreya u ta eno, khala avba.” Uye a di thendregedza a ta khala.

²Khavbo avbo, Bhowazi a di rana likhumi madhota ya dhoropani, a ma embela, khuye: “Nga khalani avba!” Avo va di khala.

³A embela nongo waye, khuye: “Nowemi, oyu a widego khu tigoni ga Mowabhi, a ngu rengisa gipandre gile nya gipeto gi nga bani giri gya ndriyathu Elimeleki.

⁴Khu guralo, eni nyi wonide gukheni nyi gu tivisa gasi u gi dzegisa mbeli ga vatshavbo vavbanyi ni mbeli nya madhota ya tigoni gwathu. Wa gu vbweta gu gi dzegisa, gi dzegise! Gasi wa gumba gina nyi embele gasi nyi dziti, kholu mwalo mumbe a fanedego gu gi dzega vbavbandze gwago. Kholu eni nyi nandra.” Uye a di hakha, khuye: “Nyi na gi dzegisa.”

⁵Khavbo avbo, Bhowazi a di khuye: “Litshigu u na gu gi dzegisago, gi dzegise gambe mandzani ga Nowemi, bwelo khavbo u gi renga gambe mandzani ga Rute, nya lifumbu la Mowabhi, ngadza lifutu, gasi u kodza gu wusa lina laye thombani gwaye.”

⁶Khavbo avbo, oyu mwama nya nongo a di khuye: “Eni kha nyi na dzi kodza gu gi dzegisa, kholu nyi nga luzekedwa khu thomba yangu.[3] Dzega uwe fanelo yangu nya gu gi dzegise, kholu eni kha nyi na dzi kodza gu gi dzegisa.”

⁷Gale tigoni ga na Israyeli gu diri ni gihena nya gu muthu a gu diga thomba a di tiyisa mahungu yakone khu gu tshula gilato gyaye a ningela ndriyaye. Uwowo wu diri wufakazi nya gutiye wa na Israyeli.

⁸ Oyu mwama nya nongo a di embela Bhowazi, khuye: “Gi dzegise uwe.” A di tshula gilato gyaye.

⁹Bhowazi a di ganela ga madhota ni ga vathu vatshavbo, khuye: “Enu muhuno mu khade dzifakazi nya gukhenu nyi dzegiside khu mandzani ga Nowemi, satshavbo iso si nga bani si lumba Elimeleki, Khiliyoni ni Maloni;

¹⁰nyi ngu dzega gambe Rute, nya lifumbu la Mowabhi, ngadza Maloni a khala mwangadzi wangu, gasi nyi wusa lina laye thombani gwaye, gasi lina laye li si fuvi vbakari ga vandriyaye, ni vbakari nya tshangano nya vandruye; enu muhuno mu dzifakazi.”

¹¹ Vathu vatshavbo va nga bani varomo vbatshanganotunu, gumogo ni madhota va di hakha, khavo: “Ethu hi dzifakazi, PFHUMU Nungungulu, a na gire nyamayi yoyo a belago muhuno nyumbani gwago, kha nga Rakeli ni Liya, khu wuvili wawe va vbahidego nyumba ya Israyeli. Khu guralo, uwe Bhowazi tiya longo omu Ewufrate, ni lina lago li na dhumiswe omu Bhetlehema.

¹² Nyumba yago yi na fanane ni nyumba ya Peresi, oyu Tamari a nga velegago ni Judha, PFHUMU Nungungulu a na gire kharato khu ga mbiri yeyi avbo gwago.”

¹³Khu guralo, Bhowazi a di dzegana ni Rute, a tshangana naye, PFHUMU Nungungulu a di mu gira a hakha mimba, a velega gyanana nya gikhwathana.

¹⁴Vanyamayi va di ganela ga Nowemi, khavo: “A na dhumiswe PFHUMU Nungungulu a si vbwetigo gu gu diga nyambana tugulu a na khalago mutshudzisi wago, lina laye li na manege ni wudhumo vbakari ga va na Israyeli.

¹⁵A na khala mutangadzisi nya guvbanye gwago, ni musayisi muwukhosaneni gwago. Kholu oyu a nga velegwago khu ngadzamwane wago nya gu gu gole ngudzu, uye a ngu vbindra livbandre na sivili sikhwathana.”

¹⁶Nowemi a di dzega gyanana a gi wugarela, a khala musayisi waye.

¹⁷Vaakelane vaye nya vanyamayi, va di gi riya lina, khavo: “Nowemi velegide gyanana, va gi rana khavo khu Obhedhi. Oyu khu babe wa Jese, babe wa Dhavhidhe.”

¹⁸Owu khu longoloko nya situgulwana sa Peresi: Peresi, a di velega Esiromi,

¹⁹Esiromi, a di velega Rahamu, Rahamu, a velega Aminadhabhi,

²⁰Aminadhabhi, a velega Nahasomi, Nahasomi, a velega Salimoni,

²¹Salimoni, a velega Bhowazi, Bhowazi, a velega Obhedhi,

²²Obhedhi, a velega Jese, Jese, a velega Dhavhidhe.