Read gitonga 1 Samuweli 1 Bible Online

1 Samuweli 1 - gitonga bible

1 Samuweli 1

¹Gu diromo mwama moyo nya lihundzu la Efrayimi, nya gupwani khu Elikana, mwamana wa Jeyoramo, mwamana wa Eliyu, gyanana gya Towu, mwamana wa Sufi a nga bani a vbanyela dhoropani ga Rama ga gipandre nya gigomo gya Efrayimi.

²Elikana a diri ni vagadzi vavili, moyo nya gupwani khu Ana, mumbe nya gupwani khu Penina. Penina a diri ni sanana; aholu Ana a diri mwalo naso.

³Mwama yoyu, myaga yatshavbo a di gu duga khu dhoropani gwaye a hongola Silo, gasi guya khozela PFHUMU Nungungulu nya Tshivba Yatshavbo ni gu Mu girela miphaso. Avbovbo si diromo sanana sivili sa Eli, Hofini ni Finiyasi, va diri vaphasi nya mhamba va PFHUMU Nungungulu.

⁴Elikana gikhati gyatshavbo a nga bani a gu ningela phaso, a di gu ninga gipandre gi yelago mwangadzi waye Penina, gimbe gipandre a ninga sanana saye satshavbo nya sikhwathana ni sagadzyana.

⁵Aholu a di gu ningela gipandre nya guvbindrise ga Ana, kholu a di gu mu haladza ngudzu, ambari oluPFHUMU Nungungulu a nga bani a mu giride gyumba.

⁶Gu diga nya isoso, kwawe Penina a di mu tsorodzela ngudzu, na gu mu tshanisa, khu kotani PFHUMU Nungungulu a nga mu gira gyumba.

⁷Esi si di girega myaga yatshavbo gikhati Ana a gwelago Nyumbani ga PFHUMU Nungungulu; Ana a di khala khu gulila, a si hodzi gilo.

⁸Tshigu mwedo, mwama waye Elikana, a di mu wudzisa, khuye: “Ana, khu ginani u lilago? Khu ginani u si hodzigo gilo? Khu ginani u khuvekago gikhati gyatshavbo? Ina eni kha nyi sizi avbo gwago guvbindra likhumi sanana, gani?”

⁹Tshigu mwedo, na va vbedzide gu hodza ni gu sela tigoni ga Silo, Ana a di khuga a ema; muphasi nya mhamba Eli, a di khade vbagikhalotunu gwaye, vbafuvbi ni mwanya nya Tshatsha nya Guage.

¹⁰Khu vbale, Ana, a di khuga na khuvekide, a di lombelela ga PFHUMU Nungungulu na gu lila khu wuvi waye watshavbo.

¹¹ A di gira gisambanyo a ganela, khuye: “Ama PFHUMU Nungungulu nya Tshivba Yatshavbo, nari gukhwatshi wa gu wona tshanisa ya githumi gyago, nari pwani nya gu mana wuhigo nya gu nyi ninge gyanana nya gikhwathana, eni nyi di hadza gu gi phasela ga PFHUMU Nungungulu matshigu yatshavbo nya guvbanye gwaye, ni ndzudzu waye, wu di hadza gumba gaywa khu gisingwana.”

¹²Ana a di wuyedzela dzinyondro nya dzingi gu lombelela mbeli ga PFHUMU Nungungulu; Eli a di khedzisela sigundru saye si nga bani si khuthakhutha.

¹³Khu guralo, Ana a di gu ganela khu monyoni gwaye, sigundru khiso basi si nga bani si gu khuthakhutha, nyamba pwala magana nya gukari. Eli a di pimisa gukhuye a di leva,

¹⁴a di mu wudzisa, khuye: “Kala lini nu nga levide? Diga gu sela wadwa!”

¹⁵Aholu Ana a di hakha, khuye: “Ahihi mune wangu, eni nyi nyamayi nyi tshanisekago ngudzu hefemuloni; kha nya sela vbinyu mwendro wadwa nya guvave; aholu nyi dzude gasi guta phofumula wuvi wangu mbeli ga PFHUMU Nungungulu.

¹⁶U nga alakanyeli gukhuwe, eni githumi gyago nyi nyamayi moyo nyambana mapimo! Kholu gyatshavbo gikhati gegi, nyi di phofumula guvbisega nya monyo wangu nyi nga gu ganelago kala ni olu.”

¹⁷Khavbo avbo, Eli a di mu hakha, khuye: “Indra khu gurula, Nungungulu wa Israyeli a na gu ninge gilombo u mu lombidego.”

¹⁸Uye a di mu hakha, khuye: “Githumi gyago gi na mane wuhigo mbeli gwago.” Khavbo avbo, uye a diya hodzanyana gilogyo, kholu monyo waye wu di vbevbugide vbadugwana.

¹⁹Khu mindru gakone, va di wuga ni mambagugya, vaya lombelela mbeli ga PFHUMU Nungungulu, va di bwelela gaya gwawe Rama. Elikana a di tivana ni mwangadzi waye Ana, PFHUMU Nungungulu a di mu alakanya,

²⁰uye a di khura mimba, avbo gi nga vboha gikhati gyaye, a di velega gyanana nya gikhwathana, a gi riya lina la Samuweli, kholu a di ganela, khuye: “Nyi mu lombide ga PFHUMU Nungungulu.”

²¹Mwama waye Elikana, a di khuga gumogo ni ndranga yaye, aya ningela ga PFHUMU Nungungulu, ningelo nya phaso nya mwaga, a tadzisa gisambanyo gyaye.

²²Aholu, Ana kha nga hongola, a di ganela, khuye: “Avbo nyi na gu digisago libele gyanana, nyi na hongola naye gasi gi kodza guya bikedwa mbeli ga PFHUMU Nungungulu, gi khala iyoyo matshigu yatshavbo nya guvbanye gwaye.”

²³Mwama waye Elikana a di mu hakha, khuye: “Gira esi u si wonago na siri sadi; khala gaya kala u digisa libele gyanana; kala Pfhumu a tiyise magana yaye.” Khu guralo, nyamayi a di khala gaya a dandrisa gyanana kala gu enedza matshigu nya gu gi digise libele.[1]

²⁴Hwane nya gu na lumude gyanana, a di gi dzega gumogo ni gimombyana nya myaga miraru, ni ndrengo nya wuguvbi ni liboteri nya vbinyu, aya si bikela Nyumbani ga PFHUMU Nungungulu, dhoropani ga Silo. Aholu gyanana gi di bani gi ngari gidugwana ngudzu.

²⁵Va di songa gimombyana, va bikela gyanana ga Eli.

²⁶Ana a di mu embela, khuye: “Yingisa mune wangu, nyi ngu sambanya khu womi wago, eni kheni nyamayi wule nyi nga bani nyi lombelela ga PFHUMU Nungungulu vbafuvbi nago.

²⁷Nyi di lombelela ga PFHUMU Nungungulu khu gyanana gegi; Uye a nyi ninga gilombo nyi nga mu lombago.

²⁸Khu guralo, nyi ngu gi resa nyi gi bweledza ga PFHUMU Nungungulu, guvbanyani gwaye gwatshavbo; kholu nyi gi lombide ga PFHUMU Nungungulu.” Khavbo avbo, va di lombelela vbale ga PFHUMU Nungungulu.