Read gitonga 1 Samuweli 10 Bible Online

1 Samuweli 10 - gitonga bible

1 Samuweli 10

¹Samuweli a di dzega gigasi nya mafura, a ma guhula hungoni ga Sawule, a mu bhejari a mu embela, khuye: “PFHUMU Nungungulu a gu todzide khu mafura gasi gu khala muthangeli vbakari nya thomba yaye, vathu va Israyeli!

²Muhuno avbo u na hambanago ni eni, u na manana ni vama vavili vbafuvbi ni lithowo la Rakeli, tigoni ga Bhejami, dhoropani ga Zeliza, va na gu embela, khavo: Dziburu nya migadzi u nga bani u dzi vbweta dzi manegide, khu guralo, babe wago kha garadzegi gambe khidzo, olu a gu garadzega khu kotani yanu, a ganela, khuye: Nyi na kheni ginani olu khu gyanana gyangu?

³Wa guvbindra vbale uya mbeli, u vboha simboni nya nguhu wa Tabhori; avbovbo u nata manwa khu vama vararu va gwelago gasi guya khozela Nungungulu tigoni ga Bheteli, moyo nari ni dziphongo dzitharu, mumbe ni sibaba siraru, ni mumbe nari ni gigasi nya vbinyu.

⁴Avo va na gu losa va gu ninga sibaba sivili, u na si hakhago khu mandzani gwago.

⁵Khavbo avbo, u na hongola gigomoni gya Nungungulu, avbo gu gu ni lizumbo nya vawoneleli va Vafilisitiya; gikhati u na belago dhoropani, u na tshangana ni tsawa nya vaprofeti na va gu tshiga khu gigomoni, na va thangedwe khu vawombi nya dzimbila, dzingoma, misengele ni sitendre, na va guprofeta.

⁶Uwe u na tala khu liphuvbo la PFHUMU Nungungulu, u na profeta gumogo navo, uwe u na vbindrugedzwa u khala mumbe muthu.

⁷Avbo u na dugedwago khu siwonegiso sesi, gira satshavbo si lombwago gu girwa khu gikhati gyogyo, kholu Nungungulu a na ni uwe.

⁸Aholu uwe u na thanga mbeli gwangu u hongola Giligali, eni neni nyi na relela iyoyo gwago, gasi guta gira phaso nya guvbiswe ni gu ningela miphaso nya gurule; u na khala livbandre na mavili matshigu u nyi virela, kala nyita wonana nago, nyi gu embela iso u yelago gu gira.”

⁹Avbo Sawule a nga hambana ni Samuweli, Nungungulu a di vbindrugedza monyo waye, satshavbo siwoniso si di girega gwaye khu litshigu lolo.

¹⁰Na va vbohide Gibheya, va di khingwa khu tsawa nya vaprofeti; Sawule a di tala khu liphuvbo la Nungungulu, a phela guprofeta vbakari gwawe.

¹¹Vatshavbo va nga bani va muti khu gale, khu gu mu wona na gu guprofeta gumogo ni vaprofeti, va di wudzisana khu gyawe, khavo: “Gasi ginani gi nga dugelelago ga mwamana wa Khisi? Ina Sawule nuye moyo nya vaprofeti, gani?”

¹² Khavbo avbo, mwama moyo a di wudzisa, khuye: “Gasi khu mani babe wa vale vambe vaprofeti?” Khavbo avbo, gu di duga mavingu ma gukhayo: “Ina Sawule womo nuye tsawani nya wuprofeti, gani?”

¹³Avbo Sawule a nga vbedza guprofeta a di hongola vbagiluvelotunu, mugimoni.

¹⁴Babe dugwane waye, a di wudzisa Sawule gumogo ni githumi gyaye, khuye: “Gasi mu di hongode hayi?” Sawule a di mu hakha, khuye: “Hi di landrelede dziburu nya migadzi, aholu avbo hi nga wona nya gukhethu kha hi dzi mani, hi diya ga Samuweli.”

¹⁵Babe dugwane wa Sawule, a di wudzisa Sawule, khuye: Nyi ngu gu lomba u nyi embela ginani a nga mi embelago Samuweli?

¹⁶Sawule a di hakha babe dugwane waye, khuye: “A hi embede nya gukhuye, dziburu dzi manegide.” Aholu, khu mahungu nya mufumo a ganedego khuwo Samuweli, kha nga mu embela gilo.

¹⁷Samuweli a di tombanisa vathu va na Israyeli ga PFHUMU Nungungulu, dhoropani ga Misipa,

¹⁸a ganela ga sanana sa Israyeli, khuye: “PFHUMU Nungungulu wa Israyeli, a ngu ganela kharati, khuye: Eni nyi mi duside khu tigoni ga Egipito, nyi mi vbulugiside mandzani ga Vagipiti ni mandzani ga mifumo yatshavbo yi nga bani yi mi tshanisa.

¹⁹Khu guralo, enu muhuno mu kanyiside Nungungulu wanu, a mi vbulugisidego guvivbani gwanu ni mithumoni yanu yatshavbo, mu mu embela, khenu: Hi emisele mufumeli. Khu guralo, tshanganani mbeli ga PFHUMU Nungungulu khu mahundzu yanu, khu sikwata sanu nya likhumi mazana (1.000).”

²⁰Samuweli na tshanganiside mahundzu yatshavbo ya Israyeli, solo yi di thegela lihundzu la Bhejami.

²¹Na sasamedzide lihundzu la na Bhejami khu dzindranga dzawe, solo yi di thegela nyumba ya Matiri; ga ilo gu di hathwa Sawule, mwamana wa Khisi. Aholu gikhati va nga mu vbweta kha va mu mana.

²²Khavbo avbo, va di engedza va wudzisa PFHUMU Nungungulu, khavo: Mwama wule dzude iyoyo, gani? PFHUMU Nungungulu, a di hakha, khuye: “Sihade iyoyo vbakari nya sombo.”

²³Va di tutuma vaya mu dzega. Na manegide vbakari nya gidzemo, uye a di laphide guvbindra vatshavbo khu magatani guya vbatshani.

²⁴Khavbo avbo, Samuweli a di embela vathu vatshavbo, khuye: Mu ngu mu wonani uye a hathidwego khu PFHUMU Nungungulu, gani? Kholu ga vathu vatshavbo mwalo a fananago naye. Khavbo avbo, vathu vatshavbo va di kulungela khu gutsaka, khavo: “A na vbanye mufumeli!”

²⁵Samuweli a di bikela dzifanelo nya mufumo, a dzi lova umo nya libhuku a li vega mbeli ga PFHUMU Nungungulu; khavbo avbo, Samuweli a di vbangana vathu vatshavbo muthu ni muthu a hongola gaya gwaye.

²⁶Sawule nuye a di bwelela gaya gwaye, tigoni ga Gibheya, na gu bangaladzwa khu vama nya masotshwa, avo myonyo yawe yi nga khumbwa khu Nungungulu.

²⁷Aholu vathu nya guvivbedwe khu monyo, va di ganela, khavo: “A na dzi kodza kharini gu hi vbulugisa mwama yoyu?” Va di mu kanyisa va si dzumeli gu dusa miningelo va mu luva. Aholu Sawule kha nga khathala khavo.