Read gitonga 1 Samuweli 11 Bible Online

1 Samuweli 11 - gitonga bible

1 Samuweli 11

¹Nahasi, nya Muamoni, a di wusa nyimbi aya dhumela lidhoropa la Jabhesi-Gileyadhi; khavbo avbo, vama vatshavbo va Jabhesi va di embela Nahasi, khavo: “Hongole hi gira gidzumeledzwano nago, ethu hi na gu thumela.”

²Aholu Nahasi, nya Muamoni, a di va hakha, khuye: “Nyi na gira nanu gidzumeledzwano mwa gu dzumela guphela khu gu mu rumbula liso la nyamudye la moyo ni moyo nya enu, nyi vega kharati givalo tigoni gwatshavbo ga Israyeli.”

³Khavbo avbo, madhota ya Jabhesi ma di mu hakha khayo: “Hi ninge livbandre na mavili matshigu hi kodze gu rumela myango mivbinganoni gwatshavbo gwa Israyeli, a gumba manega ni moyo nya gu hi vbulugise, khavbo, hi nata dzi ningelago gwago.”

⁴Myango yi di vboha kala Gibheya iyo a nga bani na gu manegela iyo Sawule, va di tivisa mahungu yaya ga vathu va tigoni. Khavbo avbo, vathu va di lila va womba dzihuwa.

⁵Khu gikhati gyogyo, Sawule a di gu wuya khu gundze, na gu ghula dzimombe, a di wudzisa, khuye: “Gasi ginani gi nga dugelela ga vathu, va lilago?” Khavbo avbo, va di mu tshamusela magana ya vathu va Jabhesi.

⁶Avbo Sawule a ngapwago mahungu yoyo, a di tala khu liphuvbo la Nungungulu, a goroga ngudzu.

⁷A di dzega mipatwa mivili nya dzimombe, a dzi songa, a pilela nyama yakone khu sitsuwu, a si ningela mandzani nya myango, a rumela ga vatshavbo vavbanyi va tigoni ga Israyeli, a va embela, khuye: “Dzi na girwe kharati dzimombe dza wule a na gumba landrela Sawule ni Samuweli.” Khu guralo, vathu vatshavbo, va di thava PFHUMU Nungungulu, va duga na va hunganide khu monyo moyo.

⁸Sawule a diya va sayela dhoropani ga Bhezeki; sanana sa Israyeli, si diri tengo nya mazana mararu magumi mazana (300.000); va na Judha, va diri magumararu magumi mazana (30.000).

⁹Khavbo avbo, va di embela avo va nga resago myango, khavo: Indrani muya va embela kharati vama va Jabhesi-Giliyadhi, khenu: “Mindru vbamihanitunu, mu na bani mu tshudzisidwe.” Avbo yi nga wuyago myango, yi ta tivisa vathu va Jabhesi, avo va di nengela,

¹⁰va embela va na Amoni, khavo: “Mindru hi na duga hi ta dzi ningela avbo gwanu; enu mu na gira satshavbo khu ethu khidzo mu dzi golago khidzo.”

¹¹Khu litshigu li landrelago, Sawule a di kabanisa vathu vaye khu mitsawa miraru, va bela lizumboni la na Amoni na gu ngari dzimindrudzile, va sasela va na Amoni kala guvbisa lihani. Avo va nga vbulugago gufa, va di phalalega, muthu ni muthu a phara yaye ndzila.

¹²Khavbo avbo, va na Israyeli va di embela Samuweli, khavo: “Khu vamani vale va nga bani va ganela, khavo: Sawule kha na hi fumela? Va rese eno, hita va songa.”

¹³Aholu Sawule a di va hakha, khuye: “Muhuno, mwalo a na songwago, kholu litshigu la muhuno, PFHUMU Nungungulu vbanyiside vathu vaye va na Israyeli.”

¹⁴Samuweli a di embela vathu, khuye: Deluni, hi hongole Giligali, hi naya tiyisa iyoyo mufumo.

¹⁵Vathu vatshavbo va tigoni va di hongola Giligali, iyo va ngaya emisa mufumeli wawe Sawule, mbeli ga PFHUMU Nungungulu, va di ningela miphaso nya gurule ga PFHUMU Nungungulu; Sawule a di nengela ngudzu gumogo ni vatshavbo va na Israyeli.