Read gitonga 1 Samuweli 12 Bible Online

1 Samuweli 12 - gitonga bible

1 Samuweli 12

¹Khavbo avbo, Samuweli a di embela va na Israyeli vatshavbo, khuye: Wonani nya gukhenu nyi yingiside gilombo gyanu nya satshavbo iso mu nga nyi lombani, nyi mi emisede mufumeli.

²Khu guralo, olu, khuye oyu mufumeli a na gu mi gimbidzisago. A gu bani nari eni, nyi gumbide nyi agide hungo khu dzinvi, sanana sangu somo vbakari gwanu; nyi khade muthangeli wanu gukhugela wudzahani wangu kala na muhuno.

³Kheni oyu, nya gu bani nyi mi hosede ganelani mbeli ga PFHUMU Nungungulu ni mbeli ga uye a mu todzidego khu mafura; mombe ya mani nyi dzegidego? Buru ya mani nyi dzegidego? Khu mani nyi mu kanganyisidego? Khu mani nyi mu tshanisidego? Nyi hakhide khu mandzani ga mani dzitsapawu nya gurengeledwe gasi nyi sega likana? A gu bani na romo a na ganele, gasi nyi mu bweledzela.

⁴Khavbo avbo, va di hakha, khavo: “Gimwalo u hi kanganyisidego, ambari gu hi tshanisa, ambari gu dzega gilo khu mandzani ga muthu.”

⁵Uye a di va embela, khuye: “PFHUMU Nungungulu a na khale fakazi vbakari gwanu, gumogo ni ga a todzidwego waye khu mafura, uye muhuno i fakazi nya gukhuye, kha mwa mana nandru mandzani gwangu.” Vathu vatshavbo va di tiyisa, khavo: “Nungungulu a na khale fakazi.”

⁶ Khavbo avbo, Samuweli a di embela vathu, khuye: “PFHUMU Nungungulu, khuye a hathidego Mosi ni Aroni a dusa vababe vanu khu tigoni ga Egipito.”

⁷Gasi olu, khugani mu eme gasi nyi kodza gulamulana nanu mbeli ga PFHUMU Nungungulu, khu gu mi alakanyisa khu mithumo yatshavbo nya gululame eyi a mi vbulugisidego khiyo avbo gwanu ni ga vababe vanu.

⁸ Avbo Jakobe a nga belago tigoni ga Egipito, vababe vanu va di lila ga PFHUMU Nungungulu, PFHUMU Nungungulu a va rumela Mosi ni Aroni, vata va dusa khu tigoni ga Egipito, va va resa ga wulanga wowu.

⁹ Aholu, avo va di divaledwa khu PFHUMU Nungungulu wawe; khavbo avbo, uye a di va ningela mandzani ga Sisera, muthangeli nya nyimbi ya Hazori, ni mandzani ga Vafilisitiya, ni mandzani ga mufumeli wa Mowabhi, avo va nga va saselago.

¹⁰Va di lila ga PFHUMU Nungungulu, khavo: “Hi ghohide, kholu hi nga diga Nungungulu hi ya khozela vanungungulu nya Vabhahali ni sifananiso sa Asitaroti (nungungulu nya nyamayi), gasi olu, hi vbulugise mandzani ga valala vathu, hi na ta gu khozela.”

¹¹ PFHUMU Nungungulu a di va rumela Jerubhahali, Bharaki, Jefeti ni Samuweli; va ta mi vbulugisa mandzani ga valala vanu ava va mi randredego khu maphuvbo yatshavbo, gasi mu vbanya khu gurula.

¹² Avbo mu nga wona nya gukhenu Nahasi, mufumeli wa na Amoni, a nguta mu sasela, ambari mu nga bani mu dzitini gukhenu PFHUMU Nungungulu khuye Pfhumu yanu, mu di nyi embela, khenu: Ha gu lomba mufumeli nya gu hi fume;

¹³gasi olu, mufumeli mu nga mu emisago ni gu mu lomba, khuye oyu; wonani nya gukhenu, PFHUMU Nungungulu a mi ningide mufumeli.

¹⁴Mwa gu ningani githawo PFHUMU Nungungulu, mu mu khozela, ni gu yingisa lito laye, mu si kanyisi sileletelo saye, mu landrela PFHUMU Nungungulu wanu, enu gumogo ni mufumeli a fumago vbakari gwanu, satshavbo si na mi dugela gwadi.

¹⁵Aholu, mwa gumba yingisa lito la PFHUMU Nungungulu, mu hambana ni sileletelo saye, gyandza gya PFHUMU Nungungulu, gi na mi wugela kha nga idzo a nga wugelago khidzo vababe vanu.

¹⁶Gasi olu, emani avba, muta wona sisamadziso nya sikhongolo PFHUMU Nungungulu a na girago mbeli nya maho yanu.

¹⁷Ina olu khandri gikhati nya guvbwere tirigu, gani? Olu nyi na lombelela ga PFHUMU Nungungulu, a resa mabara ni ndzadzi. Khavbo mu na gu dzitigo ni gu wona wugulu nya gighoho gyanu mbeli ga PFHUMU Nungungulu, kholu mu nga lombani mufumeli.

¹⁸Khavbo avbo, Samuweli a di lombelela ga PFHUMU Nungungulu, ni PFHUMU Nungungulu litshigu lile a di resa ndzadzi ni mabara; avbo vathu vatshavbo va nga ninga githawo nya gikhongolo ga PFHUMU Nungungulu ni ga Samuweli

¹⁹Vathu vatshavbo va di embela Samuweli, khavo: “Lombelela khu ethu sithumi sago ga PFHUMU Nungungulu wago; gasi hi sifi, kholu hi engedzedego sighoho sathu ni wuvivbi wathu, khu gu lomba mufumeli.”

²⁰Khavbo avbo, Samuweli a di embela vathu khuye: “Mu nga khali hwanga; ambari olu mu giridego guvivba nya gukhongolo! Igyo gi vbwetegago, khu gu mu si hambani ni PFHUMU Nungungulu, aholu, mu thumela PFHUMU Nungungulu khu monyo wanu watshavbo.

²¹Mu nga ndreyi, mu landra vanungungulu nya malipha gilo, si si phasigu gilo, ambari gu mu vbanyisa, kholu silo si si mi phasigo.

²²Kholu, khu kotani nya lina laye nya likhongolo, PFHUMU Nungungulu, kha na dzudzuga vathu vaye, kholu si nengedziside PFHUMU Nungungulu, gu mi hathani mu khala vathu vaye.

²³Gasi a gu bani nari eni, gima kha nyi na nga dzumela nyi ghoha khu gumba mi lombelelani ga PFHUMU Nungungulu; aholu, nyi na mi hevbudzani guti ndzila nya yadi ni gululama.

²⁴Igyo gi vbwetegago, ningani githawo PFHUMU Nungungulu, mu mu thumela na mu tumbegide khu monyo wanu watshavbo; kholu, mu wonide silo sesi nya sikhongolo a giridego.

²⁵Aholu, mwa gu simama gu gira guvivba, mu nafa, enu gumogo ni mufumeli wanu.