Read gitonga 1 Samuweli 13 Bible Online

1 Samuweli 13 - gitonga bible

1 Samuweli 13

¹Sawule, a di vbedza mwaga moyo na gufumela Israyeli. Khu mwaga nya wuvili nya gu bani na gufumela va na Israyeli,

²a di hatha vbakari ga na Israyeli magumararu mazana (3.000) vama; magumavili mazana (2.000) gasi aya khala navo dhoropani ga Makimasi, musigomoni ga Bheteli, likhumi mazana (1.000) va khala ni Jonatane dhoropani ga Gibheya ga Bhejami; avo va nga tshala a va bweledza, muthu ni muthu a hongola gaya gwaye.

³Jonatane a di sasela gikwata nya Vafilisitiya va nga bani na va ghovide dhoropani ga Gibheya, Vafilisitiya va di pwadzedwa mahungu yaya; avbo Sawule a nga womba pundru tigoni gwatshavbo, a ganela, khuye: “Vahebheru va na yingise mahungu yaya.”

⁴Khu guralo, va na Israyeli va dipwa nya gupwani Sawule sasede gikwata nya vafilisitya, ni gupwani Israyeli giride livengo ga Vafilisitiya. Khu guralo, va na Israyeli va di rambwa guya tombana ga Sawule, dhoropani ga Giligali.

⁵Vafilisitiya va di tombanisa magumararu mazana (3.000) dzikareta ni livbandre na limwedo magumi mazana (6000) vakhileli ni vathu nya gidzemo nya nga mafu ya funguni, gasi vaya dwana ni Israyeli; va di khuga vaya zumba dhoropani ga Makimasi, Khugadambo wa Bheti-Avheni.

⁶Avbo va na Israyeli va nga wona gukhavo, va randredwe khu maphuvbo yatshavbo, va di sihala mudziphagoni, ni mavbalani, sirangalabwani, siwindrini ni milamboni.

⁷Vambe va di tshatuga Joridhani va hongola Gadhi ni Gileyadhi, gasi avo va nga bani na vari ni Sawule Gileyadhi, va di tala khu hwanga.

⁸Sawule a di virela livbandre na mavili matshigu, aya ma nga bani ma emisidwe khu Samuweli, avbo va nga wona nya gukhavo, Samuweli kha vbohi Giligali, va di phalalega khu mule.

⁹Khavbo avbo, Sawule a di ganela, khuye: “Nyi reseleni miphaso nya guvbiswe ni miningelo nya gurule, uye a di ningela phaso nya guvbiswe.”

¹⁰Me ni gu vbedza gu ningela phaso nya guvbiswe, a di vboha Samuweli; Sawule a di mu khinga gasi guya mu losa.

¹¹Samuweli a di mu wudzisa, khuye: “Ginani u giridego?” Sawule a di hakha, khuye: Khu gu wona gukheni vathu va ngu phalalegela, ni gu wona gukheni uwe khu vbohi khu matshigu hi ma vegidego, ni gu Vafilisitiya va di tombanide dhoropani ga Makimasi,

¹²nyi di ganela khu monyoni, kheni: “Olu Vafilisitiya va na relela Ghiligali va ta nyi dwanisa, na nyi si gu mani wuhigo wa PFHUMU Nungungulu; Khu guralo, khu gu wona mhango nyi di gurumedzwa gu ningela phaso nya guvbiswe.”

¹³Khavbo avbo, Samuweli a di embela Sawule, khuye: U thumide wupumbu khu gumba landrisa nayo u ningidwego khu PFHUMU Nungungulu wago, naripwani u di yingiside, PFHUMU Nungungulu a di hadza gutiyisa mufumo wago ga va na Israyeli kala gupindruga.

¹⁴Olu mufumo wago kha wu naya mbeli. PFHUMU Nungungulu a dzi hathede muthu a tsakiswago khuye, gambe a mu vegide gu khala muthangeli wa vathu vaye, kholu uwe khwa landrisa esi PFHUMU Nungungulu a gu leletedego.

¹⁵Khavbo avbo, Samuweli a di khuga khu Ghiligali a gwela Gibheya wa Bhejami. Sawule a di dzegela gusaya vathu a nga bani nari navo, a diri ni gipimo nya livbandre na limwedo mazana (600) vama.

¹⁶Sawule ni mwanaye Jonatane, gumogo ni vathu a nga bani nari navo, va diya Zumba Gibheya wa Bhejami; aholu Vafilisitiya va di zumbide Makimasi.

¹⁷Vaphangi va di duga khu lizumboni la Vafilisitiya na vari mitsawa miraru; moyo nya iyo wu dzega ndzila nya guhongole Ofira, tigoni ga Suwali;

¹⁸wumbe wu dzega ndzila nya guhongole Bheti-Horoni; uwo nya wuraru, wu bela khu ndzila nya vbingano nya kova wa Zebhoyimi, wu thonona giwulani.

¹⁹Khu gikhati gyogyo, tigoni gwatshavbo ga Israyeli, gu diri mwalo mupfhuli nya dzisimbi, kholu Vafilisitiya va di ganede, khavo: “Vahebheru va na gire matshari mwendro sighalala.”

²⁰Khu guralo, va na Israyeli va guvbweta gu lodza mavbadza yawe, mabhewula mwendro bhera wawe, va di yela gu relela ga Vafilisitiya.

²¹Vafilisitiya va di hengisa va na Israyeli gikhaba nya sipandre sivili nya wuraru nya sekeli, gasi gulodza tshokha nya liphadza nya dzimombe ni mavbadza, gipandre nya wuraru nya sekeli gasi gulodza sibhewula ni dzigarifi.

²²Avbo li nga vboha litshigu nya gudwane nyimbi, vatshavbo va nga bani na va gu landrela Sawule ni mwanaye, va diri mwalo matshari mandzani gwawe; Khu guralo, ma di manega ni Sawule gumogo ni mwanaye Jonatane.

²³Vafilisitiya va di rumela tsawa nya masotshwa gasi guya vhikela Makimasi.