Read gitonga 1 Samuweli 15 Bible Online

1 Samuweli 15 - gitonga bible

1 Samuweli 15

¹ Samuweli a di embela Sawule, khuye: “PFHUMU Nungungulu a nyi rumede guta gu todza u khala mufumeli wa vathu vaye va na Israyeli. Khu guralo, yingisa magana ya PFHUMU Nungungulu.

² PFHUMU Nungungulu nya Tshivba Yatshavbo a ngu ganela kharati, khuye: Nyi na lamula Amaleki khu esi a giredego Israyeli liendroni gwaye nya gute khu Egipito.

³Olu indra uya sasela Amaleki, u mu pfhungumulela muphelo ni satshavbo si mu lumbago nyamba mu tsetsa; khu guralo, u na songetela vanyamayi, ni sanana niso sa beleni, dzimombe ni dzinvuta, dzingameriya ni dziburu.”

⁴Sawule a di tivisa esi ga vathu, a ramba tshangano a sayela vathu dhoropani ga Telayimi, a mana tengo yoyu: Mazana mavili magumi mazana (200.000) vama nya gugimbile khu mawundru ni likhumi magumi mazana (10.000) vama va Judha.

⁵Sawule a di hongola kala dhoropani ga Amaleki, vaya sihala kovani.

⁶A di embela va na Kini, khuye: “Dugani, hambanani ni Vaamaleki, gasi nyi si mu saseli gumogo navo, kholu enu mu giride wuwadi ga sanana sa Israyeli, avbo si nga bani si duga khu tigoni ga Egipito.” Khu guralo, va na Kini va di hambana ni Vaamaleki.

⁷Khavbo avbo, Sawule a di sasela Vaamaleki, gukhugela Havhila kala gu vboha Suri, a khadego gukhedzana ni Egipito.

⁸A di mola Agagi na nga gu vbanya, mufumeli wa Vaamaleki, a songetela vathu vatshavbo khu matshari.

⁹Aholu, Sawule gumogo ni masotshwa yaye, va di diga Agagi nyamba mu songa, gumogo gambe ni mitshambi yaye nya dzinvuta ni dzimombe nya migadzi, sifuyo nya guene, sinvutana ni satshavbo si nga bani si romo nya sadi, ni gimwegyo nya iso kha va nga vbweta gu si mbembisa. Va di pfhungumula basi iso nyamba khalega ni gumba na lisima.

¹⁰Khavbo avbo, ma dita magana ya PFHUMU Nungungulu ga Samuweli, a mu embela, khuye:

¹¹“Nyi ngu dzi laya kholu nyi nga emisa Sawule gu khala mufumeli, kholu a nyi wugede, a si landrisi sileletelo sangu.” Samuweli a di vbisega ngudzu, wutshigu watshavbo a lila ga PFHUMU Nungungulu.

¹²Samuweli a di vindruga gu ngari dzimindru gasi guya manana ni Sawule, aholu va di ya mu embela, khavo: “Sawule hongode Karimelo, a dzi vbahede vbale gialakanyiso nya gu mu lumbe; a vbindra a relela a hongola Giligali.”

¹³Samuweli, a di hongola ga Sawule; Sawule a mu embela, khuye: “U na bongwe uwe khu PFHUMU Nungungulu; nyi yingiside magana ya PFHUMU Nungungulu.”

¹⁴Khu guralo, Samuweli a di mu embela, khuye: “Ligwaha muni nya dzinvuta lolo nyi lipwago mudzindzeveni gwangu ni gu emba nya dzimombe nyi gupwago?”

¹⁵Sawule a di mu hakha, khuye: “Hi diya phanga Vaamaleki, kholu vathu va di tsetsa iso nya sadi nya dzinvuta ni dzimombe, gasi gu gira khiso miphaso ga PFHUMU Nungungulu wago; gasi esi simbe ethu hi di si mbembisela muphelo.”

¹⁶Khavbo avbo, Samuweli a di mu embela, khuye: “Nga degula, upwa iso nyi nga embedwa khu PFHUMU Nungungulu wutshigu wowu.” Sawule a di mu phindrula, khuye: “Ganela.”

¹⁷Samuweli a di engedza a mu embela, khuye: “Ambari ulo u nga bani u dzi wona kha nga gyanana guwonani gwago, ina khwa khala muthangeli nya mahundzu yatshavbo ya na Israyeli, ni gu todzwa khu PFHUMU Nungungulu gu khala mufumeli wawe, gani?”

¹⁸PFHUMU Nungungulu a gu rumede ga ndzila yeyi, a gu embela, khuye: “Indra u ya mbembisela muphelo sighohi sile Vaamaleki, u dwana navo, kala u va fuvisa.

¹⁹Khu ginani u ngamba yingisa lito la PFHUMU Nungungulu, aholu u dzi ningela basi umo nya miphango, u gira ugo gu vivbidego mahoni ga PFHUMU Nungungulu?”

²⁰Khavbo avbo, Sawule a di hakha Samuweli, khuye: Eni nyi yingiside lito la PFHUMU Nungungulu, nyi gimbide khu ndzila uye a nyi nonedzidego; nyi reside Agagi, mufumeli wa Vaamaleki, Vaamaleki nyi va mbembiside muphelo;

²¹aholu masotshwa ma di phanga dzinvuta ni dzimombe, ni satshavbo esi nya lisima si nga bani si emisedwe gumbembiswa, aholu hi di wuya naso gasi guta gira khiso phaselo ga PFHUMU Nungungulu wago, dhoropani ga Giligali.

²²Khavbo avbo, Samuweli a di mu embela, khuye: “Ina PFHUMU Nungungulu a gu tsakiswa khu miphaso nya guvbiswe ni dzimhamba guvbindra gu yingisa magana yaye, gani? Gu yingisa i tshukwana guvbindra miphaso, ni gu sayisa lito la PFHUMU Nungungulu, guvbindra mafura nya dzinvuta.

²³Gumba yingisa, nandru nya wukhongolo, nya gufanane ni wuloyi, ni gu ganedza gwa gu fanana ni gukhozela sifananiso. Kholu, u nyenyide gupwa magana ya PFHUMU Nungungulu, uye nuye a ngu gu nyenya ni gu gu dzegela wufumu.”

²⁴Khavbo avbo, Sawule a di embela Samuweli, khuye: “Nyi ghohide kholu nyi nga ndragago nayo wa PFHUMU Nungungulu, ni magana yago; Kholu nyi di thava masotshwa nyi yingisa magana yawe.

²⁵Gasi olu, nyi ngu gu lomba u nyi tsetselela gighoho gyangu hi bwelele hatshavbo, gasi hi ya khozela PFHUMU Nungungulu.”

²⁶Aholu Samuweli a di embela Sawule, khuye: “Nyi na bwelela nago; kha nga olu u kanyisidego magana ya PFHUMU Nungungulu, olu uye nuye a gu digide, gasi u si khali gambe mufumeli wa Israyeli.”

²⁷Avbo Samuweli a nga thendregedza gasi a bwelele, Sawule a di mu mola khu tshoka nya gifenengelo, gi pferuga.

²⁸ Samuweli a di mu embela, khuye: “Muhuno PFHUMU Nungungulu pferude mufumo wago gasi gu a wu ningela ga mumbe nya wadi guvbindra uwe.

²⁹Wudhumo wa Israyeli wu mwalo malipha ambari gu vbindrugedza, kholu khandri muthu nya gukhuwe a na dzi laya.”

³⁰Sawule a di hakha, khuye: “Nyi ghohide; nyi ngu lomba u nyi zundza, vbakari nya vasingalagadzi nya vathu vangu ni mbeli ga va na Israyeli; bwelela gumogo ni eni, gasi hi ya khozela PFHUMU Nungungulu wago.”

³¹Khu guralo, Samuweli a di hongola ni Sawule, Sawule a di ya khozela PFHUMU Nungungulu.

³²Samuweli a di ganela, khuye: “Nyi reseleni Agagi, mufumeli wa Vaamaleki.” Agagi a di hidzimela na tangade, na gu alakanya gukhuye: “Khu lisine guvbisega nya gufe gu vbindride.”

³³Samuweli a di mu embela, khuye: “Kha nga olu litshari lago li nga songetela sanana sa vanyamayi nya vangi, Olu mayi wago nuye, a na tshala nyambana uwe.” Samuweli a di dzegela gu mu songa mbeli ga PFHUMU Nungungulu, dhoropani ga Giligali.

³⁴Khavbo avbo, Samuweli a di bwelela Rama, Sawule a hongola nuye gaya gwaye Gibheya wa Sawule.

³⁵Samuweli kha nga tshuka na wonanide gambe ni Sawule kala litshigu nya gufe gwaye. Kholu Samuweli a di gu saniseka khu kotani ya Sawule. PFHUMU Nungungulu a di dzi laya khu gu emisa Sawule gu khala mufumeli wa Israyeli.