Read gitonga 1 Samuweli 16 Bible Online

1 Samuweli 16 - gitonga bible

1 Samuweli 16

¹PFHUMU Nungungulu a di embela Samuweli, khuye: “Kala lini nu nga gulila khu Sawule. Avbo eni nyi mu nyenyidego gasi a si fumeli gambe Israyeli? Olu tadza gigasi gyago khu mafura uta; nyi na gu rumela ga Jese wa Bhetlehema, kholu vbakari nya sanana saye, nyi hathide moyo gu khala mufumeli.”

²Samuweli a di hakha, khuye: “Nyi na hongola kharini? Kholu Sawule a gu dziti a na nyi songa.” Khavbo avbo, PFHUMU Nungungulu a di ganela, khuye: “Dzega gimombyana u hongola nagyo u ya mu embela, khuwe: Nya guta ningela phaso ga PFHUMU Nungungulu.

³U na ramba Jese u hongola naye phasotunu; eni nyi na gu yeyedza iso u yelago guya gira, u naya nyi todzela wule nyi na gu yeyedzago.”

⁴Khu guralo, Samuweli a di gira iso a nga embedwago khu PFHUMU Nungungulu, a ta Bhetlehema. A di khingwa khu madhota ya dhoropani, na va gu ndrendremela va mu wudzisa, khavo: “Guta gwago khwa gurula, gani?”

⁵Samuweli a di va hakha, khuye: “Khwa gurula; nya guta phasela PFHUMU Nungungulu. Dzi agiseni nyi hongole nanu miphasotunu.” A di dzi agisa uye nuye, Jese gumogo ni sanana saye, a va ramba guta phasotunu.

⁶Avbo va nga bani na va bela, a di wona Eliyabhi a ganela khu monyoni, khuye: Khu lisine oyu khuye a todzidwego wa PFHUMU Nungungulu.

⁷Aholu, PFHUMU Nungungulu a di embela Samuweli, khuye: U nga tsakiswi khu wumburi waye, ambari khu giyemo gyaye, kholu kha nya mu hatha; PFHUMU Nungungulu kha woni kha nga mawonelo nya vathu. Muthu a gu wona iso sa vbavbandze, aholu, PFHUMU Nungungulu a gu wona monyo.

⁸Khavbo avbo, Jese a di rana Abhinadhabhi, a mu bikela ga Samuweli, a mu embela, khuye: “Oyu nuye kha hathwa khu PFHUMU Nungungulu.”

⁹Khavbo avbo, Jese a di mu yisela Sama, Aholu uye a di khuye: Oyu nuye kha hathwa khu PFHUMU Nungungulu.

¹⁰Khu guralo Jese a di resa sanana saye satshavbo nya livbandre na sivili a si resa ga Samuweli, aholu uye a di khuye: “PFHUMU Nungungulu kha va hatha ava.”

¹¹Samuweli a di wudzisa Jese, khuye: “Khiso esi satshavbo sanana sago, gani?” Uye a di phindrula, khuye: “Gi nga tshade gimwegyo nya nandra gi havisago dzinvuta.” Samuweli a di embela Jese, khuye: “Rumela gu, vaya mu rana, kholu kha hi na khala vbamezatunu hi hodza uye na si gu vbohi.”

¹²Khavbo avbo, a di rumela gu vaya mu rana va mu embela a bela. A diri lidzaha nya mburi ni maho nya gutsakise ni ndzudzu nya gufuvilanyane. PFHUMU Nungungulu a di embela Samuweli, khuye: “Khuga u mu todza, kholu khuye oyu.”

¹³Samuweli a di dzega gigasi nya mafura a mu todza vbakari ga vandriyaye; gukhugela litshigu lile guya mbeli Liphuvbo la PFHUMU Nungungulu li di mbaka ga Dhavhidhe. Khavbo avbo, Samuweli a di khuga a hongola Rama.

¹⁴Liphuvbo la PFHUMU Nungungulu li di duga ga Sawule, a tshala a tshaniswa khu liphuvbo nya guvivbe, na li gu rumedwa khu PFHUMU Nungungulu.

¹⁵Dzindruna dza Sawule dzi di mu embela, khidzo: “Wona, olu, liphuvbo nya guvivbe li rumedwego khu Nungungulu li ta gutshanisa.

¹⁶Khu guralo, mune wathu, rumela sithumi sago si manegago avba, gasi si gimbila si vbweta mwama a kodzago gu womba gitendre; avbo liphuvbo nya guvivbe na li gu rumedwa khu Nungungulu li gu vbohelago, uye a na womba gitendre, u kodza gu khala tshukwana.”

¹⁷Sawule a di hakha sithumi saye, khuye: “Vbwetani mwama a kodzago gwadi gu womba, mu mu rese avba.”

¹⁸Moyo nya dzindruna a di hakha, khuye: “Nyi nguti gyanana gimwegyo gya Jese wa Bhetlehema, gi kodzago gu womba gitendre. Uye mudwani ni ndrena nya nyimbi, a ngu kodza gu ganela gwadi, a na ni giyemo nya gukhalege gambe PFHUMU Nungungulu a na ni uye.”

¹⁹Khavbo avbo, Sawule a di rumela myango ga Jese ni magana yaya: “Nyi rumele mwanago Dhavhidhe, a havisago dzinvuta.”

²⁰Jese a di mola buru a yi rwega sibaba, ni gigasi gimwegyo nya vbinyu, gumogo ni phongo mweyo, a si rumela ga Sawule khu mandzani ga Dhavhidhe, mwanaye.

²¹Dhavhidhe a diya dzi bikela ga Sawule, a mu thumela. Sawule a di mu gola ngudzu, Dhavhidhe a di khala muphari waye nya matshari.

²²Khavbo avbo, Sawule a di rumela magana yaya ga Jese, khuye: “Mu dige Dhavhidhe a simama gu nyi thumela, kholu nyi tsakide khuye.”

²³Gikhati gyatshavbo liphuvbo nya guvivbe nya gurumedwe khu Nungungulu li nga bani li kutsunga Sawule, Dhavhidhe a di dzega gitendre a womba. Khu guralo, Sawule a di khala tshukwana, liphuvbo nya guvivbe li gu mu diga.