Read gitonga 1 Samuweli 19 Bible Online

1 Samuweli 19 - gitonga bible

1 Samuweli 19

¹Sawule a di ganela ga mwanaye Jonatane ni ga vathumegeli vaye vatshavbo khu gikungu gyaye nya guvbwete gu songa Dhavhidhe. Aholu Jonatane mwamana wa Sawule, a di gu gola ngudzu Dhavhidhe.

²Uye a di ya lembedza Dhavhidhe, a mu embela, khuye: “Babe wangu, Sawule, a ngu vbweta gu gu songa; khu guralo, mindru dzimindrudzile dzi wonele, vbweta wulanga nyamba tidwa u sihala avbo.

³Eni nyi na duga gumogo ni babe wangu hita ema vbafuvbi ni khabini u na gu bani u sihade umo. Nyi na ganela khu mahungu yago, esi nyi na gu si pwago khavbo gwaye nyi na gu tivisa.”

⁴Khavbo avbo, Jonatane a di ganela khu wuwadi wa Dhavhidhe, a embela babe waye Sawule, khuye: “Mufumeli, u nga tshuki u ghohela githumi gyago Dhavhidhe, kholu uye gimwalo a gu ghohedego, ni sigiro a giridego avbo gwago si na ni lisima ngudzu.”

⁵Kha nga thava gufa, a di sasela Vafilisitiya, PFHUMU Nungungulu a tshudzisa va na Israyeli vatshavbo; uwe kamwe u si wone bwelo khavbo u nengela khiso; olu khu ginani u vbwetago gu ghoha khu gu vbaladza novba nyambana nandru, khu gu songa Dhavhidhe vbavbandze nya gighoho.

⁶Sawule a di yingisa magana ya Jonatane, a sambanya, khuye: “Nyi ngu sambanya khu PFHUMU Nungungulu a vbanyago, gukheni gima kha na ngafa.”

⁷Khavbo avbo, Jonatane a di rana Dhavhidhe, a mu embeledzela magana yatshavbo a nga bhulago, a mu yisa ga Sawule; Dhavhidhe a di simama gu thumela Sawule kha nga matshigu ya hwane.

⁸Gu di simama gu manega nyimbi, Dhavhidhe aya dwana ni Vafilisitiya a va sasela ngudzu, va thava va tutuma mbeli gwaye.

⁹Aholu liphuvbo nya guvivbe, nya gute khiyo ga PFHUMU Nungungulu, li di bwelo li bela gambe ga Sawule; uye a di khade nyumbani gwaye nari ni litshari mandzani, Dhavhidhe na gu womba gitendre gyaye.

¹⁰Sawule a di zama gu mu paya vbandzaritunu, aholu uye a di vhika gupaywa khuye, litshari li ya paya ndzari; ni wutshigu wowo kamwe, Dhavhidhe a di khuga a tutuma a vbulugisa guralo.

¹¹Aholu Sawule a di rumela vathu guya ghadha ndrangani ga Dhavhidhe, gasi a mu songa vbadzimindrutunu; aholu Dhavhidhe, a di embedwa khu mwangadzi waye Mikali, khuye: “Wa gumba thava wutshigu wowu gasi guvbulugisa womi wago, mindru u nafa.”[2]

¹²Khavbo avbo, Mikali a di dusa Dhavhidhe khu gihogo, a mu reledza a thava a vbulugisa guralo.

¹³Mikali a di dzega gifananiso nya nungungulu nya guvatwe mwendro gupwani (Terafi), a gi ladzisa vbadawutunu, a gi vega mihungotunu gikhuledzo nya mawoya nya phongo, a gi fenengedza khu volo.

¹⁴Avbo va nga vbohago vathu va nga rumedwa khu Sawule gasi guta mola Dhavhidhe, Mikali a di va embela, khuye: “A gu dwala.”

¹⁵Khavbo avbo, Sawule a diya bweledza vama vale guta ga Dhavhidhe, a va embela, khuye: “Mu rwaleni mu wuya naye eno gasi nyita mu songa.”

¹⁶Avbo va nga wuyago vama vale, va di ta mana vbadawutunu, gifananiso nya nungungulu nya guvatwe, ni gikhuledzo nya mawoya nya phongo khu mihungoni.

¹⁷Khavbo avbo, Sawule a di wudzisa Mikali, khuye: “Khu ginani u nga nyi kanganyisago u diga nala wangu a thava?” Mikali a di phindrula Sawule, khuye: “Uye a di khuye va gumba nyi diga nyi thava, nyi na gu songa.”

¹⁸Khu kharati, Dhavhidhe, a di vbuluga a thava ata ga Samuweli, dhoropani ga Rama, a ta mu embeledzela satshavbo a nga giredwago khu Sawule; va khala ndrangani ga vaprofeti.

¹⁹A di embedwa Sawule gupwani: “Dhavhidhe womo ndrangani ga vaprofeti dhoropani ga Rama.”

²⁰Khavbo avbo, Sawule a di rumela vathu guya mola Dhavhidhe, na va vbohide va di wona tsawa nya vaprofeti na va gu guprofeta, na va guthangedwa khu Samuweli; Liphuvbo la Nungungulu li dita ga vale va nga rumwago khu Sawule, avo navo va guprofeta.

²¹Avbo a nga tiviswago esi, Sawule a di rumela vambe vathu, avo navo va di guprofeta; khavbo avbo Sawule a di rumela gambe tsawa nya wuraru, avo navo diya guprofeta.

²²Khu guhegisa a di hongola nuye abune dhoropani ga Rama, avbo a ngaya vboha namboni nya wukhongolo wu nga bani na wuri mwalo mati, a di wudzisa, khuye: “Vomo hayi Samuweli ni Dhavhidhe?” Va di mu embela, khavo: “Vomo dhoropani ga Rama, ndrangani ga vaprofeti.”

²³Khavbo avbo, a di hongola ndrangani ga vaprofeti, dhoropani ga Rama; nari ndzilani a di bedwa khu Liphuvbo la Nungungulu, a phela gu guprofeta kala a vboha ndrangani ga vaprofeti, dhoropani ga Rama.

²⁴ Uye nuye a di tshula ngandzu yaye, a guprofeta mbeli ga Samuweli, a thega vbavbatshi, nyamba ambala gilo litshigu latshavbo ni wutshigu watshavbo; esi si ganedwago pwani: “Ina Sawule nuye moyo nya vaprofeti, gani?”