Read gitonga 1 Samuweli 2 Bible Online

1 Samuweli 2 - gitonga bible

1 Samuweli 2

¹Ana a di lombelela a ganela, khuye: “Monyo wangu wu ngu nengela ga PFHUMU Nungungulu, ni hefemulo wangu, wu ngu rungudza PFHUMU Nungungulu; likana langu, li ngu hega valala vangu, kholu nyi ngu tsakela guvbanyisa gwago.

²Mwalo a lulamidego kha nga PFHUMU Nungungulu; kholu mwalo mumbe vbavbandze ga Uwe; gi mwalo Giwindri gi tiyidego, nya gufanane ni Nungungulu wathu.

³Mu nga engedzeli gu ganela khu matshandza. Gu nga dugi khu kanani gwanu magana nya guvale; kholu PFHUMU Nungungulu a tigo satshavbo Uye khuye basi a kodzago gu tugula mithumo ya vathu.

⁴Wulaho wa va nya tshivba wu fanyeledzedwe, avo va khunguvanyidego va tadzidwe khu tshivba.

⁵Avo va nga bani va khuride, olu va gu thumela guhodza, aholu khuriside vandzale; ambari gyumba gi velegide livbandre na sivili sanana, ni uye a nga bani ari ni sanana nya singi, rerekide.

⁶PFHUMU Nungungulu khuye a songago ni gu ninga womi; a ngu kodza gu reledza vathu thowoni ni gu va dusa khumo.

⁷PFHUMU Nungungulu a ngu vanga wusiwana ni gu gira gitetema, a ngu thesa vbavbatshi ni gu khusedza.

⁸A ngu khusa gisiwana umo nya kudzudzwane ni gu dusa wusiwanani muhamugi, gasi gu va khadzisa gumogo ni dzipfhumu; ni gu va ninga thomba nya gikhalo nya wudhumo; kholu siseketelo nya mafu khya PFHUMU Nungungulu, vbatshani nya iso, handzegide litigo.

⁹Uye a ngu tiyisa migondro ya va nya gululama vaye, aholu va nya guvivbedwa khu myonyo va na mbemba gidemani; kholu mwalo muthu a nga palago khu tshivba yaye.

¹⁰ Valala va Nungungulu va na pandreledwa; vbatshani gwawe, gu na pandra mabara khu ndzadzini. PFHUMU Nungungulu a na lamula mahegiso nya litigo; Uye a na ninga tshivba mufumeli waye, a na khusedza tshivba ya gihathwa gyaye.”

¹¹Khu hwane nya esi, Elikana a di bwelela gaya gwaye, tigoni ga Rama; aholu, gyanana gi di khala gi thumela PFHUMU Nungungulu, na gi gu phasedzedwa khu muphasi nya mhamba Eli.

¹²Sanana sa Eli, si diri sanana nya guvivbedwe khu monyo; si di si khathali khu PFHUMU Nungungulu;

¹³khu guralo, giguruvedzo gya vaphasi nya mhamba a diri gya gu, gikhati muthu nya gukari a ningelago miphaso, gu dita githumi gya muphasi nya mhamba, gikhatini gu nga bani gu phudwa nyama, ni giponi nya miba miraru mandzani gwaye,

¹⁴gi ta paya nyama umo nya litindzalo, mwendro umo nya gikalango, nya khali mwendro umo nya libhota; satshavbo iso a nga bani a gu si mola khu giponi, a di si dusa gasi si lumba muphasi nya mhamba. Va di gu gira kharati ga vatshavbo va na Israyeli va nga bani va ta vbale dhoropani ga Silo.

¹⁵Na va si gu vbisi mafura, gi dita githumi gya muphasi nya mhamba gi ta embela muphari nya thumo nya wuphasi, khigyo: “Nyi ninge nyama yi lumbago muphasi nya mhamba, gasi nyi ya vawula, kholu uye kha na nga dzumela nyama nya gu bani yi phudwe, aholu a gu vbweta basi nyama nya yimbihu.”

¹⁶Mwama a di mu phindrula, khuye: “Guvbwetega guhegula ma vbiswe mafura; khu hwane u na dzega iyo u na gu yi vbweta.” Githumi gya muphasi nya mhamba gi di mu embela, khigyo: “Vbiredza gu nyi ninga, sa gumba girega nyi na dzega khu kanu.”

¹⁷A diri gighoho nya gikhongolo gya madzaha yaya mahoni ga PFHUMU Nungungulu, kholu avo va di si ningi githawo miningelo yi giredwago PFHUMU Nungungulu.

¹⁸Khavbo avbo, Samuweli a di gu thuma mbeli ga PFHUMU Nungungulu, na ambade keka nya seda nya wuphasi nya mhamba na ngari lidzaha.

¹⁹Mayi waye a di mu lugela gibhadzyana, khu mwaga ni mwaga a dita mu ninga gikhati a tago ni mwama waye va ta gira miphaso nya mwaga ni mwaga.

²⁰Eli a di kategisa Elikana ni mwangadzi waye, a ganela, khuye: “PFHUMU Nungungulu a na gu ninge sanana ga nyamayi yoyu, kha nga tshatshazelo nya giningwa a mu giredego!” Khu hwane nya ugo, va di bwelela gaya gwawe.

²¹PFHUMU Nungungulu a di kategisa Ana, uye a di khura mimba nyaluphye, a velega sanana siraru nya sikhwathana ni sivili nya sagadzyana. Khu guralo mwamana Samuweli, a di dandra na gu thumela PFHUMU Nungungulu.

²²Eli, na gumbide ngudzu, a di gupwa satshavbo iso sanana saye si nga bani si gu gira ga va na Israyeli vatshavbo ni gu va di gu lala ni vanyamayi va nga bani va thumela vbamwanyatunu nya Tshatsha nya Tshangano.

²³A di va wudzisa, khuye: Khu ginani mu girago kharati? Khu ginani mu girago wughevenga wowo nya guthise, vathu va wu ganelago?

²⁴Mu nga girini kharati, vanavangu; sitiviso si vbohago avbo gwangu na si gu ganela khu enu, khandri sadi. Mwa gu dzuwungela vathu va PFHUMU Nungungulu.

²⁵Muthu a gu ghohela muthu kwawe, Nungungulu a ngu mu emela; aholu uye a gu ghohela PFHUMU Nungungulu, khu mani a na gu mu lombelelago? Aholu kha va ngapwa lito la babe wawe, kholu PFHUMU Nungungulu a di fungide gu va songa.

²⁶ Mwamana Samuweli a di dandra, na gu salalegisa PFHUMU Nungungulu gumogo ni vathu gambe.

²⁷Tshigu mwedo, muthu wa Nungungulu, a dita ga Eli a ta mu embela, khuye: “PFHUMU Nungungulu wari, khuye: Ina kha nya dzi wonegisa nya dzadi ga ndranga la babe wago, gikhati va nga bani vari tigoni ga Egipito, na va gu fumwa khu Faro, gani?

²⁸ Nyi mu hathide vbakari nya mahundzu yatshavbo ya na Israyeli, gasi a khale muphasi wangu nya mhamba, a gira miphaso vbagiluvelotunu gwangu, a vbisa libani nya gunungele, a ambala Efodhe mbeli gwangu. Nyi ningide ga ndranga la babe wago, gipandre gimwegyo nya miphaso yatshavbo nya guvbiswe, yi vbiswago khu sanana sa Israyeli.

²⁹Khu ginani mu yeyisago miphaso yangu nya guvbiswe ni miningelo yangu eyi nyi leletedego gu ta ningedwa nyumbani gwangu? U zundzide sanana sago guvbindra Eni, u si enisa khu miningelo yatshavbo nya yadi ya vathu vangu va na Israyeli.

³⁰Khu kotani nya isoso, upwani esi a ganelago PFHUMU Nungungulu wa Israyeli, wari, khuye: Eni nyi di ganede ga ndranga ya babe wago ni ndranga yago, gukheni va na nyi thumela kha nga vaphasi nya mhamba kala gupindruga. Olu PFHUMU Nungungulu a ngu ganela, khuye: Kha si na simama. Kholu avo va nyi zundzago, nyi na va zundza neni, aholu avo va nyi kanyisago va na thedwa dzitshoni.

³¹Wona, ma nguta matshigu, aya nyi na pilago libogo lago ni libogo la ndranga ya babe wago, gasi gu si tshali ni lidhota limwedo ndrangani gwago.

³²U na khedza khu lidiwo iso nya sadi nyi na girelago Israyeli, gasi ndrangani gwago, gima kha li na nga manega ni lidhota limwedo.

³³Khu guralo, moyo nya situgulwana sago, nyi na mu tshiyago vbagiluvelotunu gwangu, a na tshima maho yago gasi gu tshanisa hefemulo wago; aholu vathu vatshavbo va ndrangani gwago va nafa na va si gu gumbi.

³⁴ Iso si na giregago ga sanana sago, Hofini ni Fineya, si na bani siri giyeyedzo gwago; vatshavbo va nafa litshigu limwedo, gasi u khodwa gukhuwe esi nyi ganedego lisine.

³⁵Eni nyi na emisa muphasi nya mhamba a tumbegidego, a na girago satshavbo si na godwago khu monyo wangu ni hefemulo wangu; nyi na mu girela nyumba nya gutiye, uye a na vbanya gikhati gyatshavbo mbeli ga uye a todzidwego khu mafura yangu kala gupindruga.

³⁶Avo va na tshalago va ndrangani gwago, va na khidzima mbeli gwaye, gasi va mane gingerengere nya parata mwendro gipandre nya gibaba, va mu embela, khavo: Hi ngu gu lomba, hi dzumedzise hi khala vaphasi nya mhamba gasi hi kodza gu mana gilogyo nya guhodze.”