Read gitonga 1 Samuweli 20 Bible Online

1 Samuweli 20 - gitonga bible

1 Samuweli 20

¹Khu hwane, Dhavhidhe a di thava khu Nayoti, tigoni ga Rama, aya ganela ni Jonatane a mu wudzisa, khuye: “Ginani nyi giridego? Khu wevbini nandru wangu? Gighoho muni nyi giredego nya gukala babe wago a vbweta gu nyi songa?”

²Jonatane a di hakha, khuye: “U nga pimisi isoso; uwe khu na songwa! Babe wangu kha na nga gira gilo nyamba phela khu gu nyi tivisa, ambari na siri gya lisima mwendro gya lisima. Khu ginani a na gu nyi sihelago isoso? Kha si kodzegi!”

³Khu guralo, Dhavhidhe a di gira gisambanyo a ganela, khuye: “Babe wago a ngu dziti gwadi gukhuye eni nyi manide wuwadi nya wukhongolo monyoni gwago, a di pimisa, khuye: Jonatane a nga siti esi gasi a si khuveki. Khu guralo, eni nyi ngu sambanya khu PFHUMU Nungungulu a vbanyago gukheni nyi womo ndzilani nya gufe.”

⁴Jonatane a di embela Dhavhidhe, khuye: “Nyi na gira esi u si wonago nari sadi.”

⁵Khavbo avbo, Dhavhidhe a di hakha, khuye: “Mindru, litshigu nya buzo nya gumege nya Ngima, nyi fanede guya lalela ni mufumeli; aholu nyi dige nyi ya sihala khabini kala li pfola lidambo nya litshigu nya wuraru.”

⁶Babe wago a gu nyi dilela, mu embele, khuwe: Dhavhidhe a nyi lombide gukhuye nyi mu dige a hongola Bhetlehema, dhoropani gwaye nya mavelego, kholu gu na ni khuwo nya mhamba nya mwaga wu girwago iyoyo nya lihundzu laye latshavbo.

⁷Uye a gukhuye: Ina, avbovbo githumi gyago gi na bani gi tiyide. Aholu uye a gu kala a khuveka ngudzu, uwe u ngu dzi kodza gu khodwa gukhuwe uye a dzi emisede gu nyi gira guvivba.

⁸Aholu dzi phare u gira wuhindzi ga githumi gyago, kholu hi giride gidzumeledzwano mbeli ga PFHUMU Nungungulu. Nya gu bani nyiri ni nandru, nyi songe uwe kamwe! Khu ginani u na nyi ningelago ga babe wago?

⁹Jonatane a di mu hakha, khuye: “U nga pimisi isoso! Nya gu si tugula gukheni babe wangu a dzi emisede gu gu songa, nyi na gu tivisa!”

¹⁰Dhavhidhe a di wudzisa Jonatane, khuye: “Khu mani a na gu nyi tivisa, babe wago a gu gu phindrula khu malito nya gulemele?”

¹¹Jonatane a di hakha, khuye: “Delu, hongole thembweni.” Va di hongola thembweni khu wuvili wawe.

¹²Jonatane a di embela Dhavhidhe, khuye: “Nyi ngu sambanya khu PFHUMU Nungungulu wa Israyeli, kheni nyi na vbwetedzela babe wangu, libwagewo, khu gikhati nya nga egi, nyi na tugula gukheni mipimiso yaye khyadi, mwendro khandri yadi avbo gwago, nyi na rumela mwango u ta tiviswa.

¹³Babe wangu a gu vbweta gu gu girela guvivba, eni nyi si gu tivisi, nyi si gu digi u hongola khu gurula, PFHUMU Nungungulu a na nyi tsayise khu tshivba ni tshivba. PFHUMU Nungungulu a na khale ni uwe kha nga idzo a khadego khidzo ni babe wangu.

¹⁴Nya gu bani nyi nga gu vbanya, u na yeyedza avbo gwangu wuhindzi wa PFHUMU Nungungulu, gasi nyi si songwi.

¹⁵ Gima u nga digi gutumbega ga ngamo yangu, ambari Pfhumu a gu mbembisa tigoni valala vatshavbo va Dhavhidhe.”

¹⁶Khu guralo, Jonatane a di gira gidzumeledzwano ni ndranga ya Dhavhidhe, a ganela, khuye: “Pfhumu a na rane valala va Dhavhidhe gasi a ta va lamula.”

¹⁷Jonatane a di gira Dhavhidhe a tiyisa gisambanyo gyaye nya wupari, kholu a diri pari yaye nya gutumbege.

¹⁸Khavbo avbo, Jonatane a di embela Dhavhidhe, khuye: “Mindru litshigu nya buzo nya gumege nya Ngima; Gu na dzi yeyedza gupwani u mwalo; kholu gikhalo gyago gi na khala liphanga.

¹⁹Libwagewo, gimbila ga wulanga u sihadego gikhati si phedego satshavbo sesi, indra u ya lindrela vbafuvbi ni giwindri gya Ezeli.

²⁰Nyi na khwandra siholoma siraru phuvbo gwaye, kha nga khwatshi nya gu hekha gilo nya gukari.

²¹Nyi na rumela lidzaha nya gukari, kheni: Indra vbweta siholoma. Nya gu huweta, kheni: Siholoma somo vbafuvbyana nago, si rese; uwe u ngu dzi kodza guta, khu guralo nyi ngu sambanya khu lina la PFHUMU Nungungulu a vbanyago gukheni, dzindzila dzago dzi na bani dzi agide; gu na bani guri mwalo mhango nya gukari.

²²Aholu nya gu huweta, kheni: Siholoma somo yoyo hwindzo; gimbila, kholu PFHUMU Nungungulu a gu gu ruma gu hongola.

²³Aholu khu gisambanyo gyathu, PFHUMU Nungungulu i fakazi vbakari ga eni ni uwe, kala gupindruga.”

²⁴Khavbo avbo, Dhavhidhe a di sihala thembweni. Na li vbohide litshigu nya buzo nya gumege nya Ngima, mufumeli a di ya khala vbamezatunu gasi gu hodza.

²⁵A di ya khala vbawulangatunu nya gihena, vbafuvbi ni ndzari, Jonatane a di khala a khedzisana ni mufumeli Abhineri a khala vbafuvbi ni Sawule, aholu wulanga wa Dhavhidhe wu di khala liphanga.

²⁶Ga litshigu lile, Sawule kha nga ganela gilo, a di pimisa gukhuye: “A gu dzina saye Dhavhidhe a di manana ni gunyenyeza nya gukari, gu na bani guri igyo givangelo.”

²⁷Khu litshigu li landrelago, litshigu nya wuvili nya buzo nya gumege nya ngima, wulanga wa Dhavhidhe wu di simama gu khala liphanga. Khavbo avbo, Sawule a di wudzisa mwanaye Jonatane, khuye: “Khu ginani mwamana wa Jese a gu mbata hodza, gukhugela vbanova ni muhuno?”

²⁸Jonatane a di hakha, khuye: “Dhavhidhe a nyi lombide, khu gu nyi gurumedza, gukhuye nyi mu dige a hongola Bhetlehema.

²⁹Uye a di nyi embela, khuye: Nyi dige nyi hongola, kholu va na gyathu va na ningela mhamba dhoropani, ndriyangu a leletede gukhuye nyi manege iyoyo. Nya gu bani nyi manide mathomo gwago, nyi dzumele nyi hongola nyi ya wona vandriyangu. Khidzo a ngambata dzi wonegisa khidzo vbamezatunu ya mufumeli.”

³⁰Sawule a di gorogela Jonatane, a mu embela, khuye: “Gyanana gya nyamayi nya guvivbedwe khu monyo ni gu yeyisa! Wari khuwe kha nyi dziti gukheni uwe u ngu phasedzela mwamana wa Jese gasi gu dzi thela dzitshoni uwe mune ni gu thela dzitshoni nya wumbwiri mayi wago, gani?

³¹Na nga gu vbanya mwamana wa Jese, uwe ambari ni mufumo wago kha si na tiya. Olu rumela vaya mu rana va mu resa avba gwago, kholu uye fanede gu songwa!”

³²Jonatane a di wudzisa babe waye, khuye: “Khu ginani uye a fanedego gu songwa? Ginani uye a giridego?”

³³Khavbo avbo, Sawule a di rinya litshari laye gasi gu songa Jonatane, khavbo Jonatane a wonidego gukhuye kamwe babe waye a dzi emisede gu songa Dhavhidhe.

³⁴Jonatane a di khuga vbamezatunu na gorogide ngudzu; uye kha nga hodza gilo ga litshigu lile nya wuvili nya buzo nya gumege Ngima, na khuvekide kholu babe waye a nga poyila Dhavhidhe.

³⁵Khu litshigu li landrelago, vbadzimindrutunu Jonatane a di duga a hongola thembweni gasi guya manana ni Dhavhidhe; a di hongola gumogo ni lidzaha nya gukari.

³⁶Khavbo avbo, a di embela lidzaha laye, khuye: “Gimbila tutuma u ya dzega siholoma nyi na gu si khwandra.” Lidzaha li di tutuma, Jonatane a di khwandra giholoma gimwegyo gi ya vbindra gi ya thega mbeli gwaye.

³⁷Avbo lidzaha li nga vbohago avbo gi nga thega giholoma, Jonatane a di huwata, khuye: “Giholoma gi mwalo ngudzu mbeli gwago, gani?”

³⁸Jonatane a di engedza, khuye: “Hongole! Vbiredza! U nga emi!” Lidzaha li di rola giholoma li bwelela ga mune waye.

³⁹Lidzaha kha la ngati gilo, vbavbandze ga Jonatane ni Dhavhidhe, khavo basi va nga bani va gu giti igyo va nga embeledzana.

⁴⁰Khavbo avbo, Jonatane a di dzega matshari yaye a ma ningela ga lidzaha a li embela, khuye: “Gimbila, dzega matshari yaya u bwelela nawo dhoropani.”

⁴¹Hwane nya gu na li hongode lidzaha, Dhavhidhe a di duga khu phuvbo ga Marandzi nya giwindri, a khidzima guraru a kuha mafu khu khovbe mbeli ga Jonatane. Khavbo avbo, va di vbanganana na va gu bhejarana vatshavbo va di lila; Dhavhidhe khuye a nga lila ngudzu guvbindra Jonatane.

⁴²Jonatane a di embela Dhavhidhe, khuye: “Gimbila khu gurula, kholu hi sambanyide hatshavbo khu lina la PFHUMU Nungungulu, gikhati hi nga khethu: PFHUMU Nungungulu a na khale fakazi yathu kala gupindruga vbakari gwathu ni vbakari nya melego wathu.”

⁴³Khavbo avbo, Dhavhidhe a di hongola, Jonatane a bwelela dhoropani.