Read gitonga 1 Samuweli 26 Bible Online

1 Samuweli 26 - gitonga bible

1 Samuweli 26

¹Vavbanyi va dhoropani ga Zifi va dita Gibheya ga Sawule vata mu embela, khavo: “Dhavhidhe khuye wule a sihadego gigomoni gya Hakila, gi nga khedzanago ni giwula gya Jesimoni.”

²Khavbo avbo, Sawule a di khuga a relela giwulani gya Zifi, nari ni magumararu mazana (3.000) vama nya gu hathedwe vbakari ga va na Israyeli, gasi guya vbweta Dhavhidhe.

³Sawule a diya zumba gigomoni gya Hakila, gi khedzanago ni giwula gya Jesimoni, aholu Dhavhidhe a di simama gu khala giwulani, na gu dziti gukhuye Sawule a guta mule gasi guta mu vbweta,

⁴a di rumela vasoli vaya mana lisine nya gupwani khu lisine kamwe Sawule vbohide.

⁵Khavbo avbo, Dhavhidhe a di khuga a hongola avbo a nga bani na gu ghovide avbo Sawule, aya wona avbo a nga bani na lade Sawule ni Abhineri, mwamana wa Neri, Muthangeli nya masotshwa. Sawule a di lade lizumboni na randredwe khu masotshwa.

⁶Dhavhidhe a di embela Ayimeleki, nya Muhiti, ni Abhisayi, mwamana wa Zeruwa, ndruye wa Jowabhi, khuye: “Khu mani a dzinago gu relela ni eni ga Sawule, lizumboni?” Abhisayi a di hakha, khuye: “Eni nyi na relela nago.”

⁷Khavbo avbo, Dhavhidhe ni Abhisayi va dita ni wutshigu wowo lizumboni, Sawule a di lade, na zimide litshari laye mafuni khu mihungotunu; Abhineri ni masotshwa va di lade va mu randrela.

⁸Khavbo avbo, Abhisayi a di embela Dhavhidhe, khuye: “Nungungulu muhuno ningede mandzani gwago nala wago, nyi dige nyi mu paya gumogo khu litshari nyi li vbondzisa mafuni; kha gu na vbwetega gu mu engedza gambe.”

⁹Aholu Dhavhidhe a di hakha Abhisayi, khuye: “U nga mu songi, kholu khu mani a kodzago gu khusa gyandza gyaye a songa uye a todzidwego khu Nungungulu a si mani nandru?”

¹⁰Dhavhidhe a di engedza gambe, khuye: “Nyi ngu sambanya khu PFHUMU Nungungulu a vbanyago, kheni Uye Pfhumu Nungungulu a na mu songa, mwendro la gu vboha litshigu laye a nafa, mwendro a gu hongola nyimbitunu a naya songwa.

¹¹ PFHUMU Nungungulu a na ndreyise gu khusa gyandza gyangu nyi songa uye a todzidwego khu mafura khu Nungungulu; gasi olu, dzega litshari li khadego mihungoni gwaye gumogo ni ngoto nya mati, hi hongole.”

¹²Khu guralo Dhavhidhe a di dzega litshari ni ngoto nya mati si nga bani si romo mihungoni ga Sawule, va hongola; mwalo a nga mu wona, gu mupwa, ambari gu khendzuga, kholu vatshavbo va di gulade, kholu PFHUMU Nungungulu, a di va rumede ligovbe nya likhongolo.

¹³Avbo Dhavhidhe a nga vbohago khu limbe liphuvbo, a di ema khu vbatshani nya gigomo, khu hwindzo na va hambanide khu pfhukha nya khongolo.

¹⁴Dhavhidhe di huwata ga masotshwa ni ga Abhineri, mwamana wa Neri, khuye: “Khu nyi hakhi gani Abhineri?” Khavbo avbo, Abhineri, a di wudzisa, khuye: “Khuwe mani, u huwatago mufumeli?”

¹⁵Khavbo avbo, Dhavhidhe a di embela Abhineri, khuye: “Ina kamwe u mwama uwe? Khu mani a fananago nago omu tigoni ga Israyeli? Ina ka, khu ginani u ngamba wonelela mufumeli mune wago? Kholu, womo a dzudego wa vbakari nya vathu gasi guta songa mufumeli a gu mune wago.

¹⁶Khwa gira iso nya sadi; nyi ngu sambanya khu PFHUMU Nungungulu a vbanyago gukheni mu ngu yela gu songwa, kholu kha mwa wonelela mune wanu, muthu a todzidwego wa PFHUMU Nungungulu; olu wona lomo hayini litshari la mufumeli ni ngoto nya mati, si nga bani na si romo mihungoni gwaye?”

¹⁷Khavbo avbo, Sawule a dipwa lito la Dhavhidhe, a ganela, khuye: “Ina khandri lito lago lolo uwe mwanangu Dhavhidhe, gani?” Dhavhidhe a di hakha, khuye: “Ina lito langu mufumeli, mune wangu.”

¹⁸Dhavhidhe a di engedza gambe, khuye: “Mune wangu, wa gu lundra githumi gyago khu kotani nya ginani? Ginani nyi ghohidego? Gihoso muni u gi manidego mandzani gwangu?

¹⁹Gasi olu, uwe mufumeli mune wangu, nyi ngu gu lomba u yingise magana ya githumi gyago; a gu bani nari Pfhumu a gu kutsedzelago gu dwana ni eni, Uye a na dzumele nyi mu girela ningelo nya phaso nya guhodza; aholu a gu bani nari vathu, va na vadwe mbeli ga PFHUMU Nungungulu; kholu avo muhuno va nyi tutumiside gasi eni nyi si hakhi gipandre nya thomba ya PFHUMU Nungungulu, va nyi embela, khavo: Indra uya thumela vambe vanungungulu.

²⁰Gasi olu, u nga vbaladzi novba wangu hwindzo nya litigo leli la PFHUMU Nungungulu; kholu mufumeli wa Israyeli, dugide gasi guya sota tshowane, gu fanana ni muthu a lundrago tshugwa sigomoni.”

²¹Khavbo avbo, Sawule, a di hakha, khuye: “Nyi ghohide, wuya mwanangu Dhavhidhe, kholu kha nyi na engedza gambe gu gu girela iso nya guvivbe; kholu muhuno u wonide womi wangu na wuri ni lisima mahoni gwago. Esi nyi si giride khu wupumbu, nyi gira gighoho nya gikhongolo!”

²²Khavbo avbo, Dhavhidhe a di hakha, khuye: “Mufumeli, litshari lago khu li woni eli; rumela moyo nya madzaha ata li dzega.

²³PFHUMU Nungungulu a na bweledzele moyo ni moyo mayelano khu gutumbega gwaye ni gululama gwaye; kholu PFHUMU Nungungulu, muhuno a di gu gu ningede mandzani gwangu, aholu eni kha nya dzina gu khusa mandza nyi songa uye a todzidwego khu PFHUMU Nungungulu.

²⁴Kha nga muhuno, guvbanya gwago gu manidego lisima mahoni gwangu, kharato nugo, womi wangu wu na mane lisima mahoni ga PFHUMU Nungungulu, a nyi vbulugisa gu sanisekani gwangu gwatshavbo.”

²⁵Khavbo avbo, Sawule a di embela Dhavhidhe, khuye: U na kategiswe uwe mwanangu Dhavhidhe, kholu u girago silo nya sikhongolo, u dugelela ngudzu. Khavbo avbo, Dhavhidhe a di simama ni ndzila yaye, Sawule a bwelela wulanga waye.