Read gitonga 1 Samuweli 5 Bible Online

1 Samuweli 5 - gitonga bible

1 Samuweli 5

¹Vafilistiya va di dusa Ngasa ya Nungungulu tigoni ga Ebhenizeri va yi yisa Asidhodhi.

²Vafilistiya va di dzega Ngasa ya Nungungulu va yi vega nyumbani ga Dhagoni, vbafuvbi ni gifananiso gyaye.

³Aholu, avbo va nga wugago vathu va Asidhodhi, ni mambagugya khu litshigu li landrelago, va di wona Dhagoni na thegide a tsitsa khu khovbe mafuni, mbeli nya Ngasa ya PFHUMU Nungungulu; va di mu wusa vaya mu vega gambe vbawulangani gwaye.

⁴Avbo va nga wuga ni mambagugya nya litshigu li landrelago, na gu ngari dzimindru, va di ya wona gambe Dhagoni na tsitside khu khovbe vbavbatshi a lala mbeli nya Ngasa ya PFHUMU Nungungulu; hungo wa Dhagoni ni mandza yaye ya mavili na ma pilegide, na siri vbavbatshi nya nvunvuri vbamwanyatunu; givili na gi tshade genga.

⁵Khidzo kharato, vaphasi nya mhamba va Dhagoni ni vatshavbo va belago nyumbani gwaye, tigoni ga Asidhodhi, kha va gandri nvunvuri nya nyumba ya Dhagoni kala na muhuno.

⁶Aholu mandza ya PFHUMU Nungungulu ma di tsayisa khu tshivba vathu va Asidhodhi; a va bayisa khu sithunya, dhoropani ga Asidhodhi gumogo ni tigoni gwaye gwatshavbo.

⁷Avbo vathu va Asidhodhi, va nga wonago nya gukhavo vomo kharato, va di ganela, khavo: “Hi nga khali ni Ngasa ya Nungungulu wa Israyeli; kholu mandza yaye ma ngu hi lemela ngudzu ma bwelo khavbo ma lemela ni Dhagoni, nungungulu wathu.”

⁸Khavbo avbo, va di rumela myango guya ramba manganagana yatshavbo nya Vafilisitiya, va ma wudzisa, khavo: “Hi na gira ginani khu Ngasa ya Nungungulu wa Israyeli?” Avo va di hakha, khavo: “Yi na dzegwe Ngasa ya Nungungulu wa Israyeli, yi yiswa Gati.” Va di rwala Ngasa ya Nungungulu wa Israyeli, va vbindra khu lidhoropa ni lidhoropa, kala va yi vbohisa Gati.

⁹Hwane nya gu bani va yi vbohiside iyoyo, mandza ya PFHUMU Nungungulu, ma di wugela lidhoropa lile; gu di dugelela dzimhango nya dzikhongolo ngudzu dzi sasela vathu va dhoropani mule, gukhugela nya vadugwane kala vakhongolo, vatshavbo va di dwala khu sithunya.

¹⁰Khavbo avbo, va di rumela Ngasa ya Nungungulu tigoni ga Ekroni. Khu guralo, gu di girega gu, na yi vbohide tigoni mule, vathu va Ekroni va di samala va ganela, khavo: “Va di resa eno gwathu Ngasa ya Nungungulu wa Israyeli, gasi guta songa ethu gumogo ni va na gyathu.”

¹¹Khavbo avbo, va di rumela myango, va tombanisa manganagana yatshavbo nya Vafilisitiya, khavo: “Bweledzani Ngasa ya Nungungulu wa Israyeli, mu yi yisa wulanga waye, gasi yi si hi songi ethu gumogo ni va na gyathu.” Kholu yi diromo nyenganyenga nya lufu dhoropani gwatshavbo, gyandza gya Nungungulu gi di tsayisa khu tshivba ni tshivba dhoropani mule.

¹²Avo va nga bani va si manwi khu lufu, va di tshaniswa khu sithunya; huwa ya dhoropani mule yi di gwela kala ndzadzini.