Read gitonga 1 Samuweli 9 Bible Online

1 Samuweli 9 - gitonga bible

1 Samuweli 9

¹Gu diromo mwama moyo nya gudugele tigoni ga Bhejami, lina laye a nga bani na gu ranwa gupwani khuye Khisi, mwamana wa Abhiyeli, wa Zerori, wa Bhekorati, wa Afiyasi, wa na Bhejami, mwama nya gitetema ni guthavisega.

²A diri ni gyanana nya lidzaha gi nga bani gi gu ranwa khu lina la Sawule, lidzaha nya wumburi ngudzu, vbakari ga va na Israyeli a diri mwalo mumbe nya wumburi nya nga uye; gambe a di laphide guvbindra vatshavbo.

³Tshigu mwedo, babe waye Khisi, a di dzimeledwa khu dziburu dzaye. Khisi a di embela mwanaye Sawule, khuye: “Nya guvbweta gukheni u dzege madzaha mavili nya sithumi, mu nyi landrela dziburu dzangu.”

⁴Khavbo avbo, na va tsemakanyide gipandre nya sigomo sa Efrayimi ni litigo la Salisa, kha va nga dzi mana; khu hwane va di gimbilagimbila tigoni ga Sahalime; aholu dzi diri mwalo gambe mule; va di bela gambe tigoni ga Bhejami; iyoyo gambe kha va ngaya dzi mana.

⁵Avbo va nga vbohago tigoni ga Zufi, Sawule a di embela lidzaha laye, khuye: “Hongole hi bwelele; kholu gu nga gira gu babe wangu a si garadzegi gambe khu dziburu, aholu a garadzega khu kotani yathu.”

⁶Aholu githumi gi di mu phindrula, khigyo: “Dhoropani momu womo mwama moyo wa Nungungulu, a gu muthu nya guthavisege; satshavbo a profetago sa gu girega; olu hongole iyo gwaye, a gu dzina saye, a naya hi embela ndzila hi na gu bela khiyo.”

⁷Khu guralo, Sawule a di wudzisa lidzaha laye, khuye: “Ha gu hongola iyoyo, ginani hi na gu pharago guya ninga mwama wule? Kholu sibaba hi nga bani na hiri naso mikwamani gwathu si vbede, na hiri mwalo gilo nya guyele gu ninga muthu wa Nungungulu. Olu hi na khethu ginani?”

⁸Lidzaha li di engedza li embela Sawule, khilo: “Avba nyi ngari ni gipandre nya wu na nya sekeli nya parata, nyi naya gi ningela ga muthu wa Nungungulu, gasi a kodze gu hi yeyedza ndzila.”

⁹Matshiguni ya gale, tigoni ga Israyeli, wule aya wudzisago ga Nungungulu, a di gu olovela gu ganela, khuye: “Hongole hiya wonana ni mwama nya liwoni kholu vaprofeti va muhuno gale va di ranwa vama nya liwoni.”

¹⁰Khavbo avbo, Sawule a di embela lidzaha, khuye: “U ngu ganela gwadi. Olu hongole kala iyoyo.” Va diya dhoropani a nga bani na gu manegela umo muthu wa Nungungulu.

¹¹Na va gu gwela gu landrisela libhiyo nya lidhoropa, va di manana ni vanyamahegyane va nga bani va gwela guya rega mati, va va wudzisa, khavo: “Ina omu womo mwama nya liwoni, gani?”

¹²Avo va di va hakha, khavo: Ina kha mu mu woni wule mbeli gwanu; vbiredzani, muhuno dzude dhoropani; kholu a gu litshigu vathu vayago va ya ningela miphaso wulangani nya gigomo.

¹³Mwa gu bela dhoropani, mu na dzegela gu mu mana na si gu gweli wulangani nya gigomo gasi guya hodza; kholu vathu kha va na hodza na si gu vbohi, uye khuye a kategisago phaso, khu hwane, khavbo va hodzago vale va rambidwego. Gwelani khu guvbiredza, mu naya dzegela gu mu mana.

¹⁴Khu guralo, avo va di gwela dhoropani; na va nga gubela, Samuweli a di va khinga gasi gu gwela gigomoni.

¹⁵Na si gu vbohi Sawule, litshigu limwedo PFHUMU Nungungulu, a di girede giwoniso Samuweli, khuye:

¹⁶“Mindru, khu gikhati nya nga egi, nyi na gu rumela mwama moyo wa tigoni ga Bhejami, u na mu todza khu mafura gasi a khala muthangeli wa vathu vangu va Israyeli; uye a na tshudzisa vathu vangu mandzani ga Vafilisitiya; kholu nyi wuyiside maho yangu nyi khedza vathu vangu, huwa yawe yi vbohide kala eno gwangu.”

¹⁷Avbo Samuweli a nga wonago Sawule, PFHUMU Nungungulu, a di mu embela, khuye: “Oyu khu mwama wule nyi nga gu embelago. Khuye a na fumelago vathu vangu.”

¹⁸Sawule a di hidzimela ga Samuweli vbanyangwatunu, a mu wudzisa, khuye: “Nyi ngu gu lomba gukheni u nyi embela ya gu manegela hayi nyumba ya mwama nya liwoni?”

¹⁹Samuweli a di mu hakha, khuye: “Kheni kamwe mwama nya liwoni thanga mbeli hi gwele hiya gigomotunu; kholu muhuno mu na hodza ni eni; mindru dzimindrudzile, nyi na gu vbangana u hongola, satshavbo u gu naso monyoni gwago gu wudzisa, nyi na gu phindrula.

²⁰Gasi khu mahungu nya dziburu dzi dzimedego hwane nya matshigu mararu, u nga saniseki monyoni gwago khidzo, kholu dzi manegide. Gasi va na Israyeli ginani va kheviselago, na? Avo khandri va gu khevisela uwe ni ndranga yatshavbo ya babe wago, gani?”

²¹Sawule a di hakha a ganela, khuye: “Gasi eni khandri nyi wa na Bhejami, nyumba nya yidugwane ga vatshavbo va na Israyeli, gani? Nyumba yangu khandri iyo nya yi dugwane ga lihundzu latshavbo la na Bhejami, gani? Khu ginani u nyi embelago magana nya nga ayoyo?”

²²Khavbo avbo, Samuweli a di dzega Sawule gumogo ni lidzaha laye, va bela gumogo naye nyumbani nya guhodzele umo, aya va ninga wulanga nya wuzundzo vbakari nya avo va rambidwego va nga bani vari tengo nya magumararu vathu.

²³Khavbo avbo, Samuweli a di embela muphuli, khuye: “Resa gipandre gile nya nyama nyi nga gu ningago nyi gu embela, kheni: Gi vege phuvbo.”

²⁴Khu guralo, muphuli nya guhodza a di khuga aya dzega litundru nya nyama a nga bani nari nalo ata li vega mbeli ga Sawule. Samuweli a di khuye: Wona nyama yeyi khiyo u vegedwego; dzega u yi hodze, kholu yi vegedwe uwe gasi u ta yi hodza khu gikhati gegi nyi nga rambago vathu. Khu guralo, Sawule ni Samuweli va di hodza gumogo litshigu lolo.

²⁵Khu wuvili wawe, va di tshiga gumogo khu gigomoni vaya dhoropani, Samuweli ni Sawule va di bhula na va si gu lali na vari vbatshani nya langwe nya nyumba.

²⁶Va di wuga ni dzimindru, na li nga guduga lidambo, Samuweli a di rana Sawule khu vbalangwetunu, khuye: “Wuga, kholu nya guvbweta gu gu vbwelegedza.” Sawule a di wuga, va duga gumogo uye ni Samuweli

²⁷Avbo va nga bani na va gu relela guya vbinganoni nya lidhoropa, Samuweli a di embela Sawule, khuye: “Embela lidzaha li thanga mbeli gwathu a beni a hongola. Gasi uwe u na tshala avba gasi nyi gu embela mahungu ya Nungungulu.”