Read gungbe JOB 35 Bible Online

JOB 35 - gungbe bible

JOB 35

¹Elihu kuwa ya yi magana.

²“Ayuba, ba daidai ba ne, ka ce, Ba ka yi laifi a gaban Allah ba,

³Ka kuwa ce, ‘Wace riba na ci? Wane fifiko nake da shi fiye da idan na yi zunubi?’

⁴Zan ba ka amsa, kai da abokanka.

⁵Ka duba sama, Ka dubi gizagizai waɗanda suke can sama da kai.

⁶Idan ka yi zunubi, da me ka cuci Allah? Idan ka aikata laifofi da yawa, wace cuta ka yi masa?

⁷Idan kai adali ne da me ka ƙara masa, Ko kuwa me ya samu daga gare ka?

⁸Muguntarka ta shafi mutum ne kamarka, Haka kuma adalcinka ya shafi ɗan adam ne kawai.

⁹“Saboda yawan zalunci, jama'a sukan yi kuka, Suka nemi taimako, saboda matsin masu ƙarfi.

¹⁰Amma ba su juyo wurin Allah Mahaliccinsu ba, Wanda yakan sa a raira waƙa da dare,

¹¹Wanda yake koya mana fiye da namomin jeji da suke a duniya, Wanda ya sa muka fi tsuntsayen sama hikima.

¹²Suka yi kira don taimako, amma Allah bai amsa ba, Saboda suna da girmankan mugaye.

¹³Hakika Allah bai ji holoƙon kukansu ba, Allah Mai Iko Dukka kuwa bai kula da shi ba.

¹⁴“Ayuba, kai wane ne da za ka ce ba ka gan shi ba? Da kake cewa ƙararka tana gabansa, Jiransa kake yi?

¹⁵Yanzu fa saboda bai yi hukunci da fushinsa ba, Kamar kuma bai kula da laifi ba,

¹⁶Ayuba, maganarka marar ma'ana ce, Ka yi ta maganganu marasa hikima.”