Read gungbe PSALM 102 Bible Online

PSALM 102 - gungbe bible

PSALM 102

¹Ka ji addu'ata, ya Ubangiji, Ka ji kukana na neman taimako!

²Kada ka ɓoye mini sa'ad da nake shan wahala! Ka ji ni, ka amsa mini da sauri sa'ad da na yi kira!

³Raina ya ɓace kamar hayaƙi, Jikina yana ƙuna kamar wuta.

⁴An tattake ni kamar busasshiyar ciyarwa, Ba ni da marmarin cin abinci.

⁵Ina nishi da ƙarfi, Ba abin da ya ragu gare ni, In banda ƙashi da fata.

⁶Ni kamar tsuntsu nake cikin hamada, Kamar mujiya a kufai.

⁷Kwana nake ba barci, Na zama kamar tsuntsun da yake fama da kewa A bisa kan ɗaki.

⁸Maƙiyana suna cin mutuncina dukan yini. Waɗanda suke mini ba'a, Suna la'antarwa da sunana.

⁹Toka ce abincina, Hawayena kuwa sun gauraya da abin shana,

¹⁰Sabili da fushinka da hasalarka. Ka ɗauke ni, ka jefar da ni.

¹¹Raina kamar inuwar maraice yake, Kamar busasshiyar ciyawa nake.

¹²Amma kai, ya Ubangiji, sarki ne kai har abada, Dukan zamanai masu zuwa za su tuna da kai.

¹³Za ka tashi ka ji tausayin Sihiyona, Lokaci ya yi da za ka yi mata jinƙai, Wannan shi ne lokacin!

¹⁴Bayinka suna ƙaunarta, Ko da yake an hallakar da ita, Suna jin tausayinta, Ko da yake ta zama kufai.

¹⁵Sauran al'umma za su ji tsoron Ubangiji, Dukan sarakunan duniya za su ji tsoron ikonsa.

¹⁶Sa'ad da Ubangiji ya sāke gina Sihiyona Zai bayyana girmansa.

¹⁷Zai saurari jama'arsa wadda ya rabu da ita, Zai kuwa ji addu'arta.

¹⁸Ku rubuta abin da Ubangiji ya aikata don zamani mai zuwa, Don waɗanda ba a haife su ba tukuna, Su ma su yabe shi.

¹⁹Ubangiji ya duba ƙasa Daga Sama, tsattsarkan wurinsa, Daga Sama ya dubi duniya,

²⁰Don ya ji nishin ɗaurarru, Don ya saki waɗanda aka yanke musu hukuncin kisa.

²¹Saboda wannan mutane za su yi shelar sunan Ubangiji a Sihiyona, Za su yi masa godiya a Urushalima,

²²Sa'ad da sauran al'umma da mulkoki suka taru Don su yi wa Ubangiji sujada.

²³Tun ina ƙaramin yaro Ubangiji ya sa na rasa ƙarfi, Ya gajerta kwanakina.

²⁴Ya Allahna, kada ka ɗauke ni a yanzu, Tun da yake ban tsufa ba tukuna! Ya Ubangiji har abada kake.

²⁵Ka halicci duniya tun tuntuni, Da ikonka ne ka yi sammai.

²⁶Su za su ɓace duka, amma kai za ka dawwama, Za su ƙare kamar yadda tufafi suke ƙarewa, Za ka sāke su kamar tufafi, za su kuwa ɓace.

²⁷Amma kai, kana yadda kake kullayaumin, Har abada kake.

²⁸'Ya'yanmu za su yi zaman lafiya, Zuriyarsu kuma za su zauna cikin kiyayewarka kullayaumin.