Read gungbe PSALM 106 Bible Online

PSALM 106 - gungbe bible

PSALM 106

¹Ku yabi Ubangiji! Ku yi wa Ubangiji godiya, gama nagari ne shi, Ƙaunarsa madawwamiya ce.

²Wa zai iya faɗar dukan manya manyan ayyuka da ya yi? Wa zai iya yi masa isasshen yabo?

³Masu farin ciki ne waɗanda suke biyayya da umarnansa, Waɗanda kullayaumi suke aikata abin da yake daidai!

⁴Ka tuna da ni sa'ad da za ka taimaki jama'arka, ya Ubangiji! Ka sa ni cikinsu, sa'ad da za ka cece su.

⁵Ka yardar mini in ga wadatar jama'arka, In yi tarayya da jama'arka da farin cikinsu, In yi farin ciki tare da waɗanda suke murna ta fāriya domin su naka ne.

⁶Mun yi zunubi yadda kakanninmu suka yi, Mugaye ne, mun aikata mugunta.

⁷Kakanninmu a Masar Ba su fahimci ayyukan Allah masu banmamaki ba, Sau da yawa sukan manta da irin ƙaunar da ya nuna musu, Suka tayar wa Mai Iko Dukka a Bahar Maliya.

⁸Amma duk da haka ya cece su, kamar yadda ya alkawarta, Domin ya nuna ikonsa mai girma.

⁹Ya tsauta wa Bahar Maliya, ta ƙafe, Har ya bi da jama'arsa su haye Kamar a bisa busasshiyar ƙasa.

¹⁰Ya cece su daga maƙiyansu, Ya ƙwato su daga wurin abokan gābansu.

¹¹Ruwa ya cinye maƙiyansu, Ba wanda ya tsira.

¹²Sa'an nan jama'arsa suka gaskata alkawarinsa, Suka raira yabo gare shi.

¹³Amma nan da nan, suka manta da abin da ya yi, Suka aikata, ba su jira shawararsa ba.

¹⁴Suka cika da sha'awa cikin hamada, Suka jarraba Allah,

¹⁵Sai ya ba su abin da suka roƙa, Amma ya aukar musu da muguwar cuta.

¹⁶Can cikin hamada suka ji kishin Musa Da Haruna, bayin Ubangiji, tsarkaka,

¹⁷Sai ƙasa ta buɗe ta haɗiye Datan, Ta binne Abiram da iyalinsa.

¹⁸Wuta ta sauko bisa magoya bayansu, Ta ƙone mugayen mutanen nan.

¹⁹Suka ƙera ɗan maraƙi da zinariya a Horeb, Suka yi masa sujada.

²⁰Suka musaya ɗaukakar Allah Da siffar dabba mai cin ciyawa.

²¹Suka manta da Allah wanda ya cece su, Ta wurin manyan ayyuka da ya yi a Masar.

²²Kai, Allah ya aikata abubuwa masu ban al'ajabi a can! Ga kuma abubuwa masu banmamaki da ya aikata a Bahar Maliya!

²³Saboda wannan Allah ya ce zai hallaka jama'arsa, Amma Musa, zaɓaɓɓen bawansa, ya yi godo ga Allah, Allah kuwa ya huce, bai hallaka su ba.

²⁴Sai suka ƙi ƙasan nan mai ni'ima, Saboda ba su gaskata alkawarin Allah ba.

²⁵Suka zauna cikin alfarwansu suna ta gunaguni, Sun ƙi su saurari Ubangiji.

²⁶Saboda haka ya yi musu kakkausan kashedi, Cewa shi zai sa su duka su mutu a jejin,

²⁷Zai warwatsa zuriyarsu a cikin arna, Ya bar su su mutu a baƙuwar ƙasa.

²⁸Sai jama'ar Allah suka taru suka shiga yi wa Ba'al sujada, a Feyor, Suka ci hadayun da aka miƙa wa matattun alloli.

²⁹Suka tsokani Ubangiji, ya yi fushi saboda ayyukansu, Mugawar cuta ta auka musu,

³⁰Amma Finehas ya tashi, ya yanke hukunci a kan laifin, Aka kuwa kawar da annobar.

³¹Tun daga lokacin nan ake ta tunawa da shi, Saboda abin da ya yi. Za a yi ta tunawa da shi a dukan zamanai masu zuwa.

³²Jama'ar Ubangiji suka sa ya yi fushi. A maɓuɓɓugan Meriba, Musa ya shiga uku saboda su.

³³Suka sa Musa ya husata ƙwarai, Har ya faɗi abubuwan da bai kamata ya faɗa ba.

³⁴Suka ƙi su kashe arna, Yadda Ubangiji ya umarta,

³⁵Amma suka yi aurayya da su, Suka kwaikwayi halayen arnan.

³⁶Jama'ar Allah suka yi wa gumaka sujada. Wannan kuwa ya jawo musu hallaka.

³⁷Suka miƙa 'ya'yansu mata da maza hadaya ga allolin arna.

³⁸Suka karkashe mutane marasa laifi, Wato 'ya'yansu mata da maza. Suka miƙa su hadaya ga gumakan Kan'ana, Suka ƙazantar da ƙasar saboda kashe-kashenkan da suke yi.

³⁹Ta wurin ayyukansu, suka ƙazantar da kansu, Suka zama marasa aminci ga Allah.

⁴⁰Saboda haka Ubangiji ya yi fushi da jama'arsa, Ransa bai ji daɗinsu ba.

⁴¹Sai ya bar su ƙarƙashin ikon arna, Abokan gābansu suka mallake su.

⁴²Abokan gābansu suka zalunce su, Suka tilasta su, su yi musu biyayya.

⁴³Sau da yawa Ubangiji yakan ceci jama'arsa, Amma sun fi so su yi masa tawaye, Suna ta nutsawa can cikin zunubi.

⁴⁴Duk da haka Ubangiji ya ji su sa'ad da suka yi kira gare shi, Ya kula da wahalarsu.

⁴⁵Saboda su ne ya tuna da alkawarinsa, Ya sāke ra'ayinsa saboda ƙaunarsa mai yawa.

⁴⁶Ubangiji ya sa waɗanda suka kama su Su ji tausayinsu.

⁴⁷Ka cece mu, ya Ubangiji Allahnmu, Ka komo da mu daga cikin sauran al'umma, Domin mu yabi sunanka mai tsarki, Mu kuma yi murna mu yi maka godiya.

⁴⁸Sai mu yabi Ubangiji, Allah na Isra'ila, Mu yabe shi yanzu da har abada kuma! Dukan jama'a za su amsa su ce, “Amin! Amin!” Ku yabi Ubangiji!