Read gungbe PSALM 111 Bible Online

PSALM 111 - gungbe bible

PSALM 111

¹Yabo ya tabbata ga Ubangiji! Zan yi wa Ubangiji godiya da zuciya ɗaya, A cikin taron jama'arsa.

²Abubuwan banmamaki ne Ubangiji yake aikatawa! Duk waɗanda suke murna da su Suna so su fahimce su.

³Dukan abin da yake yi, Cike yake da girma da ɗaukaka, Adalcinsa har abada ne.

⁴Ubangiji ba zai bar mu mu manta da ayyukansa masu banmamaki ba, Shi mai alheri ne, mai jinƙai kuma.

⁵Yakan tanada wa masu tsoronsa abinci, Bai taɓa mantawa da alkawarinsa ba.

⁶Ya nuna ikonsa ga jama'arsa Saboda ya ba su ƙasashen baƙi.

⁷Iyakar abin da yake yi duka, da aminci da adalci ne. Dukan umarnansa, abin dogara ne.

⁸Sukan tabbata har abada, Da gaskiya da adalci aka ba da su.

⁹Ya kawo wa jama'arsa ceto, Ya kuma yi musu madawwamin alkawari. Mai Tsarki ne shi, Maɗaukaki!

¹⁰Hanyar samun hikima, ita ce tsoron Ubangiji, Yakan ba da kyakkyawar ganewa Ga dukan waɗanda suke bin umarnansa, Sai ku yabe shi har abada!