Read gungbe PSALM 115 Bible Online

PSALM 115 - gungbe bible

PSALM 115

¹A gare ka kaɗai, ya Ubangiji, A gare ka kaɗai, ba a gare mu ba, Dole a girmama ka, Sabili da madawwamiyar ƙaunarka da amincinka.

²Me ya sa sauran al'umma suke tambayarmu, “Ina Allahnku?”

³Allahnmu yana Sama, Yana aikata yadda yake so.

⁴Amma nasu alloli na azurfa da zinariya ne, Da hannu aka siffata su.

⁵Suna da baki, amma ba sa magana, Suna da idanu, amma ba sa gani.

⁶Suna da kunnuwa, amma ba sa ji, Suna da hanci, amma ba sa jin ƙanshi.

⁷Suna da hannuwa, amma ba sa iya riƙon kome, Suna da ƙafafu, amma ba sa iya tafiya. Ba su da murya sam.

⁸Ka sa waɗanda suka yi su, Da dukan masu dogara gare su, Su zama kamar gumakan da suka yi!

⁹Ku dogara ga Ubangiji, ya ku jama'ar Isra'ila! Shi yake taimakonku, yana kiyaye ku.

¹⁰Ku dogara ga Ubangiji, ya ku firistoci na Allah! Shi yake taimakonku, yana kiyaye ku.

¹¹Ku dogara ga Ubangiji, dukanku waɗanda kuke tsoronsa! Shi yake taimakonku, yana kiyaye ku.

¹²Ubangiji yana tuna da mu, zai kuwa sa mana albarka, Zai sa wa jama'ar Isra'ila albarka, Da dukan firistoci na Allah.

¹³Zai sa wa dukan waɗanda suke tsoronsa albarka. Babba da yaro.

¹⁴Ubangiji ya ba ku 'ya'ya, Ku da zuriyarku.

¹⁵Ubangiji, wanda ya yi sama da ƙasa Ya sa muku albarka!

¹⁶Samaniya ta Ubangiji ce kaɗai, Amma ya ba mutane duniya.

¹⁷Matacce ba ya yabon Ubangiji, Ko wanda ya gangara zuwa cikin kabari.

¹⁸Amma mu da muke rayayyu, za mu yi masa godiya. A yanzu da har abada. Yabo ya tabbata ga Ubangiji!