Read gungbe PSALM 119 Bible Online

PSALM 119 - gungbe bible

PSALM 119

¹Masu farin ciki ne, marasa laifi cikin zamansu, Waɗanda suke zamansu bisa ga dokar Ubangiji.

²Masu farin ciki ne waɗanda suke bin umarnansa, Waɗanda suke yi masa biyayya da zuciya ɗaya.

³Hakika ba su yin laifi, Sukan yi tafiya a hanyoyin Ubangiji.

⁴Kai ka ba mu dokokinka, Ka kuwa faɗa mana mu kiyaye su da aminci.

⁵Na sa zuciya zan yi aminci, Game da kiyaye dokokinka!

⁶Idan na kula da dukan umarnanka, To, ba zan kasa kaiwa ga burina ba.

⁷Zan yabe ka da tsattsarkar zuciya, A sa'ad da na fahimci ka'idodinka masu adalci.

⁸Zan yi biyayya da dokokinka, Ko kusa kada ka kashe ni!

⁹Ƙaƙa saurayi zai kiyaye ransa da tsarki? Sai ta wurin biyayya da umarnanka.

¹⁰Da zuciya ɗaya nake ƙoƙarin bauta maka, Ka kiyaye ni daga rashin biyayya da umarnanka!

¹¹Na riƙe maganarka a zuciyata, Don kada in yi maka zunubi.

¹²Ina yabonka, Ya Ubangiji, Ka koya mini ka'idodinka!

¹³Zan ta da murya, In maimaita dukan dokokin da ka bayar.

¹⁴Ina murna da bin umarnanka, Fiye da samun dukiya mai yawa.

¹⁵Nakan yi nazarin umarnanka, Nakan kuma yi bimbinin koyarwarka.

¹⁶Ina murna da dokokinka, Ba zan manta da umarnanka ba.

¹⁷Ka yi mini alheri, ni bawanka, Domin in rayu in yi biyayya da koyarwarka.

¹⁸Ka buɗe idona Domin in ga gaskiyar shari'arka mai banmamaki.

¹⁹Zamana a nan duniya na ɗan lokaci kaɗan ne. Kada ka ɓoye mini umarnanka!

²⁰Zuciyata ta ƙosa saboda marmari, A kowane lokaci ina so in san hukuntanka.

²¹Kakan tsauta wa masu girmankai, La'anannu ne waɗanda suka ƙi bin umarnanka.

²²Ka kuɓutar da ni daga cin mutuncinsu da raininsu, Domin na kiyaye dokokinka.

²³Ko da sarakuna za su taru Su shirya mini maƙarƙashiya, Duka da haka, ni bawanka, Zan yi nazarin ka'idodinka.

²⁴Umarnanka suna faranta mini rai, Su ne mashawartana.

²⁵Ina kwance cikin ƙura, an yi nasara da ni, Ka wartsakar da ni kamar yadda ka alkawarta!

²⁶Na hurta dukan abin da na aikata, ka kuwa amsa mini, Ka koya mini ka'idodinka!

²⁷Ka koya mini yadda zan yi biyayya da dokokinka, In kuma yi nazarin koyarwarka mai banmamaki.

²⁸Ɓacin rai ya ci ƙarfina, Ka ƙarfafa ni, kamar yadda ka alkawarta.

²⁹Ka kiyaye ni daga bin muguwar hanya, Ta wurin alherinka, ka koya mini dokarka.

³⁰Na yi niyya in yi biyayya, Na mai da hankali ga ka'idodinka.

³¹Na bi umarnanka, ya Ubangiji, Kada ka sa in kasa ci wa burina!

³²Ina ɗokin yin biyayya da umarnanka, Gama za ka ƙara mini fahimi.

³³Ka koya mini ma'anar dokokinka, ya Ubangiji, Zan kuwa yi biyayya da su a kowane lokaci.

³⁴Ka fassara mini dokarka, ni kuwa zan yi biyayya da ita, Zan kiyaye ta da zuciya ɗaya.

³⁵Ka bishe ni a hanyar umarnanka, Domin a cikinsu nakan sami farin ciki

³⁶Ka sa ni in so yin biyayya da ka'idodinka, Fiye da samun dukiya.

³⁷Ka kiyaye ni daga mai da hankali ga abin da yake marar amfani, Ka yi mini alheri kamar yadda ka alkawarta.

³⁸Ka tabbatar da alkawarin da ka yi mini, ni bawanka, Irin wanda kakan yi wa waɗanda suke tsoronka.

³⁹Ka kiyaye ni daga cin mutuncin da nake tsoro, Ka'idodinka suna da amfani ƙwarai!

⁴⁰Ina so in yi biyayya da umarnanka, Gama kai mai adalci ne, Ka yi mini alheri!

⁴¹Ka nuna mini yawan ƙaunar da kake yi mini, ya Ubangiji, Ka cece ni bisa ga alkawarinka.

⁴²Sa'an nan zan amsa wa waɗanda suke cin mutuncina, Domin na dogara ga maganarka.

⁴³Ka ba ni iko in iyar da saƙonka na gaskiya a kowane lokaci, Gama sa zuciyata tana ga hukuntanka.

⁴⁴Kullum zan yi biyayya da dokarka har abada abadin!

⁴⁵Zan rayu da cikakken 'yanci, Gama na yi ƙoƙari in kiyaye ka'idodinka.

⁴⁶Zan hurta umarnanka ga sarakuna, Ba kuwa zan ji kunya ba.

⁴⁷Ina murna in yi biyayya da umarnanka, Saboda in ƙaunarsu.

⁴⁸Ina girmama umarnanka, ina kuwa ƙaunarsu, Zan yi ta tunani a kan koyarwarka.

⁴⁹Ka tuna da alkawarin da ka yi mini, ni bawanka, Ka ƙarfafa zuciyata.

⁵⁰Ko ina shan wahala, ana ta'azantar da ni, Saboda alkawarinka yana rayar da ni.

⁵¹Masu girmankai suna raina ni, Amma ban rabu da dokarka ba.

⁵²Na tuna da koyarwar da ka yi mini a dā, Sukan kuwa ta'azantar da ni, ya Ubangiji.

⁵³Haushi ya kama ni sosai, Sa'ad da na ga mugaye suna keta dokarka.

⁵⁴Ina zaune can nesa da gidana na ainihi, Sai na ƙago waƙoƙi a kan umarnanka.

⁵⁵Da dare nakan tuna da kai, ya Ubangiji, Ina kuwa kiyaye dokarka.

⁵⁶Wannan shi ne farin cikina, In yi biyayya da umarnanka.

⁵⁷Kai kaɗai nake so, ya Ubangiji, Na yi alkawari in yi biyayya da dokokinka.

⁵⁸Ina roƙonka da zuciya ɗaya, Ka yi mini jinƙai kamar yadda ka alkawarta!

⁵⁹Na yi tunani a kan ayyukana, Na yi alkawari in bi ka'idodinka.

⁶⁰Ba tare da ɓata lokaci ba, Zan gaggauta in kiyaye umarnanka.

⁶¹Mugaye sun ɗaure ni tam da igiyoyi, Amma ba zan manta da dokarka ba.

⁶²Da tsakar dare nakan farka, In yabe ka saboda hukuntanka masu adalci.

⁶³Ina abuta da duk waɗanda suke bauta maka, Da duk waɗanda suke kiyaye dokokinka.

⁶⁴Ya Ubangiji, duniya ta cika da madawwamiyar ƙaunarka, Ka koya mini umarnanka!

⁶⁵Kana cika alkawarinka, ya Ubangiji, Kana kuwa yi mini alheri, ni bawanka.

⁶⁶Ka ba ni hikima da ilimi Domin ina dogara ga umarnanka.

⁶⁷Kafin ka hore ni nakan yi kuskure, Amma yanzu ina biyayya da maganarka.

⁶⁸Managarci ne kai, mai alheri ne kuma, Ka koya mini umarnanka!

⁶⁹Masu girmankai sun faɗi ƙarairayi a kaina, Amma da zuciya ɗaya nake biyayya da ka'idodinka.

⁷⁰Waɗannan mutane ba su da ganewa, Amma ni ina murna da dokarka.

⁷¹Horon da aka yi mini ya yi kyau, Domin ya sa na koyi umarnanka.

⁷²Dokar da ka yi Muhimmiya ce a gare ni, Fiye da dukan dukiyar duniya.

⁷³Kai ne ka halicce ni, ka kuma kiyaye ni lafiya, Ka ba ni ganewa, don in koyi dokokinka.

⁷⁴Waɗanda suke tsoronka za su yi murna sa'ad da suka gan ni, Saboda ina dogara ga alkawarinka.

⁷⁵Na sani ka'idodinka na adalci ne, ya Ubangiji, Ka hore ni, domin kai mai aminci ne.

⁷⁶Ka sa madawwamiyar ƙaunarka ta ta'azantar da ni, Kamar yadda ka alkawarta mini, ni bawanka.

⁷⁷Ka yi mini jinƙai, zan rayu, Saboda ina murna da dokarka.

⁷⁸Ka kunyatar da masu girmankai Saboda sun ba da shaidar zur a kaina, Amma ni, zan yi tunani a kan ka'idodinka.

⁷⁹Ka sa waɗanda suke tsoronka su zo gare ni, Da waɗanda suka san umarnanka.

⁸⁰Ka sa in yi cikakkiyar biyayya da umarnanka, Sa'an nan zan tsere wa shan kunyar faɗuwa.

⁸¹Na tafke, ya Ubangiji, jira nake ka cece ni, Na dogara ga maganarka.

⁸²Idanuna sun gaji da zuba ido ga alkawarinka. Roƙo nake, “Sai yaushe za ka taimake ni?”

⁸³Na zama marar amfani kamar salkar ruwan inabi wanda aka jefar da ita, Duk da haka ban manta da umarnanka ba.

⁸⁴Har yaushe zan yi ta jira? Yaushe za ka yi wa waɗanda suke tsananta mini hukunci?

⁸⁵Masu girmankai, waɗanda ba su biyayya da dokarka, Sun haƙa wushefe don su kama ni.

⁸⁶Umarnanka duka, abin dogara ne, Mutane suna tsananta mini da ƙarairayi, Ka taimake ni!

⁸⁷Sun kusa ci wa burinsu na su kashe ni, Amma ban raina ka'idodinka ba.

⁸⁸Saboda madawwamiyar ƙaunarka, ka yi mini alheri, Domin in yi biyayya da dokokinka.

⁸⁹Maganarka tabbatacciya ce, ya Ubangiji, A kafe take a Sama.

⁹⁰Amincinka ya tabbata har abada, Ka kafa duniya a inda take, tana nan kuwa a wurin.

⁹¹Dukan abubuwa suna nan har wa yau saboda umarninka, Domin su duka bayinka ne.

⁹²Da ba domin dokarka ita ce sanadin farin cikina ba, Da na mutu saboda hukuncin da na sha.

⁹³Faufau ba zan raina ka'idodinka ba, Gama saboda su ka bar ni da rai.

⁹⁴Ni naka ne, ka cece ni! Na yi ƙoƙari in yi biyayya da umarnanka.

⁹⁵Mugaye suna jira su kashe ni, Amma zan yi ta tunani a kan dokokinka.

⁹⁶Na koya cewa ba wani abu da yake cikakke, Amma umarninka ba shi da iyaka.

⁹⁷Ga yadda nake ƙaunar dokarka! Ina ta tunani a kanta dukan yini.

⁹⁸Umarninka yana tare da ni a kowane lokaci, Ya sa ni in yi hikima fiye da dukan maƙiyana.

⁹⁹Ganewata ta fi ta dukan malamaina, Saboda ina ta tunani a kan koyarwarka.

¹⁰⁰Na fi tsofaffi hikima, Saboda ina biyayya da umarnanka.

¹⁰¹Nakan guje wa halin mugunta Saboda ina so in yi biyayya da maganarka.

¹⁰²Ban raina koyarwarka ba Saboda kai ne ka koya mini.

¹⁰³Ɗanɗanon ka'idodinka akwai zaƙi, Har sun fi zuma zaƙi!

¹⁰⁴Na ƙaru da hikima daga dokokinka, Saboda haka ina ƙin dukan halin da yake ba daidai ba.

¹⁰⁵Maganarka fitila ce wadda za ta bi da ni, Haske ne kuma a kan hanyata.

¹⁰⁶Zan cika muhimmin alkawarina, In yi biyayya da koyarwarka mai adalci.

¹⁰⁷Azabaina, ya Ubangiji, suna da yawa, Ka rayar da ni kamar yadda ka alkawarta!

¹⁰⁸Ka karɓi addu'ata ta godiya, ya Ubangiji, Ka koya mini umarnanka.

¹⁰⁹Kullum a shirye nake in kasai da raina, Ban manta da umarninka ba.

¹¹⁰Mugaye sun kafa mini tarko, Amma ban yi rashin biyayya da umarnanka ba.

¹¹¹Umarnanka nawa ne har abada, Su ne murnar zuciyata.

¹¹²Na ƙudura zan yi biyayya da ka'idodinka, Har ranar mutuwata.

¹¹³Ina ƙin waɗanda ba su yi maka aminci, Amma ina ƙaunar dokarka.

¹¹⁴Kai ne kake kāre ni, kake kuma kiyaye ni, Ina sa zuciya ga alkawarinka.

¹¹⁵Ku rabu da ni, ku masu zunubi! Zan yi biyayya da umarnan Allahna.

¹¹⁶Ka ƙarfafa ni kamar yadda ka alkawarta, zan kuwa rayu, Kada ka bar ni in kasa ci wa burina!

¹¹⁷Ka riƙe ni, sai in zauna lafiya, Koyaushe zan mai da hankali ga umarnanka.

¹¹⁸Ka rabu da dukan waɗanda ba su biyayya da dokokinka, Dabarunsu na yaudara banza ne.

¹¹⁹Kakan yi banza da duk mai mugunta, Don haka ina ƙaunar koyarwarka.

¹²⁰Saboda kai, nake jin tsoro, Na cika da tsoro saboda shari'unka.

¹²¹Na yi abin da yake daidai mai kyau, Kada ka bar ni a hannun maƙiyana!

¹²²Sai ka yi alkawari za ka taimaki bawanka, Kada ka bar masu girmankai su wahalshe ni!

¹²³Idanuna sun gaji da duban hanyar cetonka, Ceton da ka alkawarta.

¹²⁴Ka bi da ni bisa ga tabbatacciyar ƙaunarka, Ka koya mini umarnanka.

¹²⁵Ni bawanka ne, don haka ka ba ni ganewa, Don in san koyarwarka.

¹²⁶Ya Ubangiji, lokaci ya yi da za ka yi wani abu, Saboda mutane sun ƙi yin biyayya da dokarka!

¹²⁷Ina ƙaunar umarnanka, fiye da zinariya, Fiye da zinariya tsantsa.

¹²⁸Saboda haka ina bin dukan koyarwarka, Ina kuwa ƙin dukan mugayen al'amura.

¹²⁹Koyarwarka tana da ban al'ajabi, Da zuciya ɗaya nake biyayya da su.

¹³⁰Fassarar koyarwarka takan ba da haske, Takan ba da hikima ga wanda bai ƙware ba.

¹³¹Ina haki da baki a buɗe, Saboda marmarin da nake yi wa umarnanka.

¹³²Ka juyo wurina ka yi mini jinƙai, Kamar yadda kakan yi wa masu ƙaunarka.

¹³³Kada ka bar ni in fāɗi kamar yadda ka alkawarta, Kada ka bar mugunta ta rinjaye ni.

¹³⁴Ka cece ni daga waɗanda suke zaluntata, Domin in yi biyayya da umarnanka.

¹³⁵Ka sa mini albarka da kasancewarka tare da ni, Ka koya mini dokokinka.

¹³⁶Hawayena suna malalowa kamar kogi, Saboda jama'a ba su biyayya da shari'arka ba.

¹³⁷Kai mai adalci ne, ya Ubangiji, Dokokinka kuma daidai ne,

¹³⁸Ka'idodin da ka bayar kuwa dukansu masu kyau ne, Daidai ne kuwa.

¹³⁹Fushi yana cina kamar wuta, Saboda maƙiyana ba su kula da umarnanka ba.

¹⁴⁰Alkawarinka ba ya tashi! Bawanka yana ƙaunar alkawarinka ƙwarai!

¹⁴¹Ni ba kome ba ne, rainanne ne, Amma ban ƙi kula da ka'idodinka ba.

¹⁴²Adalcinka zai tabbata har abada, Dokarka gaskiya ce koyaushe.

¹⁴³A cike nake da wahala da damuwa, Amma umarnanka suna faranta zuciyata.

¹⁴⁴Koyarwarka masu adalci ne har abada, Ka ba ni ganewa domin in rayu.

¹⁴⁵Ina kira gare ka da zuciya ɗaya, Ka amsa mini, ya Ubangiji, Zan yi biyayya da umarnanka!

¹⁴⁶Ina kira gare ka, Ka cece ni, zan bi ka'idodinka!

¹⁴⁷Tun kafin fitowar rana ina kira gare ka neman taimako, Na sa zuciya ga alkawarinka.

¹⁴⁸Dare farai ban yi barci ba, Ina ta bimbini a kan koyarwarka.

¹⁴⁹Ka ji ni, ya Ubangiji, bisa ga madawwamiyar ƙaunarka, Ka kiyaye raina bisa ga alherinka!

¹⁵⁰Mugayen nan waɗanda suke tsananta mini sun matso kusa, Mutanen da ba su taɓa kiyaye dokarka ba.

¹⁵¹Amma kana kusa da ni, ya Ubangiji, Dukan alkawaranka gaskiya ne.

¹⁵²Tuntuni na ji labarin koyarwarka, Ka sa su tabbata har abada.

¹⁵³Ka dubi wahalata, ka cece ni, Gama ban ƙi kulawa da dokarka ba.

¹⁵⁴Ka kāre manufata, ka kuɓutar da ni, Ka cece ni kamar yadda ka alkawarta!

¹⁵⁵Ba za a ceci mugaye ba, Saboda ba su yi biyayya da dokokinka ba.

¹⁵⁶Amma juyayinka yana da girma, ya Ubangiji, Saboda haka ka cece ni yadda ka yi niyya.

¹⁵⁷Maƙiyana da masu zaluntata, suna da yawa, Amma ban fasa yin biyayya da dokokinka ba.

¹⁵⁸Sa'ad da na dubi waɗannan maciya amana, Sai in ji ƙyama ƙwarai, Domin ba su yi biyayya da umarninka ba.

¹⁵⁹Ka dubi yadda nake ƙaunar koyarwarka, ya Ubangiji! Ka cece ni bisa ga madawwamiyar ƙaunarka.

¹⁶⁰Cibiyar dokarka gaskiya ce, Dukan ka'idodinka na adalci tabbatattu ne.

¹⁶¹Ƙarfafan mutane sun auka mini ba dalili, Amma maganarka ce nake girmamawa.

¹⁶²In farin ciki ƙwarai saboda alkawaranka, Farin cikina kamar na wanda ya sami dukiya mai yawa ne.

¹⁶³Ina ƙin ƙarairayi, ba na jin daɗinsu, Amma ina ƙaunar dokarka.

¹⁶⁴A kowace rana nakan gode maka sau bakwai, Saboda shari'unka masu adalci ne.

¹⁶⁵Waɗanda suke ƙaunar dokarka sun sami cikakken zaman lafiya, Ba wani abin da zai sa su fāɗi.

¹⁶⁶Ina jiranka ka cece ni, ya Ubangiji, Ina aikata abin da ka umarta.

¹⁶⁷Ina biyayya da ka'idodinka, Ina ƙaunarsu da zuciya ɗaya.

¹⁶⁸Ina biyayya da umarnanka da koyarwarka, Kana kuwa ganin dukan abin da nake yi.

¹⁶⁹Bari kukana yă kai gare ka, ya Ubangiji! Ka ganar da ni kamar yadda ka alkawarta.

¹⁷⁰Bari addu'ata ta zo gare ka, Ka cece ni kamar yadda ka alkawarta!

¹⁷¹Zan yabe ka kullayaumin Domin ka koya mini ka'idodinka.

¹⁷²Zan raira waƙa a kan alkawarinka, Domin umarnanka a gaskiya ne.

¹⁷³Kullum a shirye kake domin ka taimake ni, Saboda ina bin umarnanka.

¹⁷⁴Ina sa zuciya ga cetonka ƙwarai, ya Ubangiji! Ina samun farin ciki ga dokarka.

¹⁷⁵Ka rayar da ni don in yabe ka, Ka sa koyarwarka su taimake ni!

¹⁷⁶Ina kai da kawowa kamar ɓatacciyar tunkiya, Ka zo ka neme ni, ni bawanka, Saboda ban ƙi kulawa da dokokinka ba.