Read gungbe PSALM 139 Bible Online

PSALM 139 - gungbe bible

PSALM 139

¹Ya Ubangiji, ka jarraba ni, ka san ni.

²Ka sa dukan abin da nake yi, Tun daga can nesa ka gane dukan tunanina.

³Kana ganina, ko ina aiki, ko ina hutawa, Ka san dukan ayyukana.

⁴Tun kafin in yi magana Ka riga ka san abin da zan faɗa.

⁵Kana kewaye da ni a kowane sashe, Ka kiyaye ni da ikonka.

⁶Yadda ka san ni ya fi ƙarfin magana, Ya yi mini zurfi, ya fi ƙarfin ganewata.

⁷Ina zan tafi in tsere wa Ruhunka? Ina zan gudu in tsere maka?

⁸Idan na hau cikin samaniya kana can, In na kwanta a lahira kana can,

⁹In na tashi sama, na tafi, na wuce gabas, Ko kuma na zauna a can yamma da nisa,

¹⁰Kana can domin ka bi da ni, Kana can domin ka taimake ni.

¹¹Da na iya roƙon duhu ya ɓoye ni, Ko haske da yake kewaye da ni Ya zama dare,

¹²Amma har duhun ma, ba duhu ba ne a gare ka, Dare kuwa haskensa kamar na rana ne. Duhu da haske, duk ɗaya ne gare ka.

¹³Kai ne ka halicci kowace gaɓa ta jikina, Kai ne ka harhaɗa ni a cikin mahaifiyata.

¹⁴Ina yabonka gama kai abin tsoro ne, Dukan abin da ka yi sabo ne, mai banmamaki. Da zuciya ɗaya na san haka ne.

¹⁵Ka ga lokacin da ƙasusuwana suke siffatuwa, Sa'ad da kuma ake harhaɗa su a hankali A cikin mahaifiyata, Lokacin da nake girma a asirce.

¹⁶Ka gan ni kafin a haife ni. Ka ƙididdige kwanakin da ka ƙaddara mini, Duka an rubuta su a littafinka, Tun kafin faruwar kowannensu.

¹⁷Ya Allah, tunaninka suna da wuyar ganewa a gare ni, Ba su da iyaka!

¹⁸In na ƙirga su, za su fi tsabar yashi, Sa'ad da na farka, har yanzu ina tare da kai.

¹⁹Ya Allah, da yadda nake so ne, da sai ka karkashe mugaye! 'Yan ta da zaune tsaye kuma sai su rabu da ni!

²⁰Suna ambaton mugayen abubuwa a kanka, Suna faɗar mugayen abubuwa gāba da sunanka.

²¹Ya Ubangiji, ga yadda nake ƙin waɗanda suke ƙinka, Da yadda nake raina waɗanda suke tayar maka!

²²Ƙiyayyar da nake yi musu ta kai intaha, Na ɗauke su, su abokan gābana ne.

²³Jarraba ni, ya Allah, ka san tunanina, Gwada ni, ka gane damuwata.

²⁴Ka bincike, ko akwai wani rashin gaskiya a gare ni, Ka bi da ni a madawwamiyar hanya.