Read gungbe PSALM 145 Bible Online

PSALM 145 - gungbe bible

PSALM 145

¹Zan yi shelar girmanka, ya Allahna, Sarkina, Zan yi maka godiya har abada abadin.

²Kowace rana zan yi maka godiya, Zan yabe ka har abada abadin.

³Ubangiji mai girma ne, dole ne a fifita yabonsa, Girmansa ya fi ƙarfin ganewa.

⁴Za a yabi abin da ka aikata daga tsara zuwa tsara, Za su yi shelar manya manyan ayyukanka.

⁵Mutane za su yi magana a kan darajarka da ɗaukakarka, Ni kuwa zan yi ta tunani a kan ayyukanka masu banmamaki.

⁶Mutane za su yi magana a kan manya manyan ayyukanka, Ni kuwa zan yi shelar girmanka.

⁷Za su ba da labarin girmanka duka, Su kuma raira waƙa a kan alherinka.

⁸Ubangiji mai ƙauna ne, mai jinƙai, mai jinkirin fushi, Cike da madawwamiyar ƙauna.

⁹Shi mai alheri ne ga kowa, Yana juyayin dukan abin da ya halitta.

¹⁰Ya Ubangiji, talikanka duka za su yabe ka, Jama'arka kuma za su yi maka godiya!

¹¹Za su yi maganar darajar mulkinka, Su ba da labarin ikonka,

¹²Domin haka dukan mutane za su san manyan ayyukanka, Da kuma darajar ɗaukakar mulkinka.

¹³Mulkinka, madawwamin mulki ne, Sarki ne kai har abada.

¹⁴Ubangiji, yakan taimaki dukan waɗanda yake shan wahala, Yakan ta da waɗanda aka wulakanta.

¹⁵Dukan masu rai suna sa zuciya gare shi, Yana ba su abinci a lokacin da suke bukata,

¹⁶Yana kuwa ba su isasshe, Yakan biya bukatarsu duka.

¹⁷Ubangiji mai adalci ne a abin da yake yi duka, Mai jinƙai ne a ayyukansa duka.

¹⁸Yana kusa da dukan waɗanda suke kira gare shi, Waɗanda suke kiransa da zuciya ɗaya.

¹⁹Yakan biya bukatar dukan waɗanda suke tsoronsa, Yakan ji kukansu, ya cece su.

²⁰Yakan kiyaye dukan waɗanda suke ƙaunarsa, Amma zai hallaka mugaye duka.

²¹A kullum zan yabi Ubangiji, Bari talikai duka su yabi sunansa mai tsarki har abada!