Read gungbe PSALM 18 Bible Online

PSALM 18 - gungbe bible

PSALM 18

¹Ina ƙaunarka ƙwarai, ya Ubangiji! Kai ne mai kāre ni.

²Ubangiji ne Mai Cetona, Shi ne garkuwata mai ƙarfi. Allahna, shi ne yake kiyaye ni, Lafiya nake sa'ad da nake tare da shi, Yana kiyaye ni kamar garkuwa, Yana kāre ni, ya ba ni lafiya.

³Na yi kira ga Ubangiji, Yakan cece ni daga magabtana, Yabo ya tabbata ga Ubangiji!

⁴Mutuwa ta ɗaure ni kam da igiyoyinta, Halaka ta auko mini a kai a kai.

⁵Mutuwa ta ɗaure ni kam da igiyoyinta, Kabari kuma ya ɗana mini tarko.

⁶A shan wahalata na kira ga Ubangiji, Na yi kira ga Allahna domin neman taimako. A Haikalinsa ya ji muryata, Kukana na neman taimako ya kai kunnensa.

⁷Sai duniya ta raurawa ta girgiza, Harsashin duwatsu suka jijjigu, suka girgiza Saboda Allah ya husata!

⁸Hayaƙi ya yi ta tuƙaƙowa daga hancinsa, Harshen wuta da garwashi suna fitowa daga bakinsa.

⁹Ya buɗe sararin sama, ya sauko ƙasa, Tare da girgije mai duhu a ƙarƙashin ƙafafunsa.

¹⁰Ya sauko ta bisa bayan kerubobi, Yana tafe da sauri a kan fikafikan iska.

¹¹Ya rufe kansa da duhu, Gizagizai masu duhu cike da ruwa, suna kewaye da shi.

¹²Ƙanƙara da garwashin wuta suka sauko Daga cikin walƙiya da take gabansa, Suka keto ta cikin gizagizai masu duhu.

¹³Sa'an nan Ubangiji ya yi tsawa daga sararin sama, Aka ji muryar Maɗaukaki. Ƙanƙara da garwashin wuta suka sauko.

¹⁴Ya harba kibansa, ya watsa magabtana, Da walƙatawar walƙiya ya kore su.

¹⁵Kashiyar teku ta bayyana, Tussan duniya sun bayyana, Sa'ad da ka tsauta wa magabtana, ya Ubangiji, Sa'ad da kuma ka yi musu tsawa da fushi.

¹⁶Ubangiji ya miƙa hannunsa daga samaniya ya ɗauke ni, Ya tsamo ni daga cikin ruwa mai zurfi.

¹⁷Ya cece ni daga magabtana masu ƙarfi, Daga kuma dukan masu ƙina, Gama sun fi ƙarfina!

¹⁸Sa'ad da nake shan wahala suka auka mini, Amma Ubangiji ya kiyaye ni.

¹⁹Ya fisshe ni daga cikin hatsari, Ya cece ni, don yana jin daɗina.

²⁰Ubangiji yakan sāka mini, saboda ni adali ne, Yakan sa mini albarka, don ni marar laifi ne.

²¹Na yi biyayya da umarnan Ubangiji, Ban yi wa Ubangiji Allahna tawaye ba.

²²Na kiyaye dukan dokokinsa, Ban yi rashin biyayya da umarnansa ba.

²³Ya sani ba ni da laifi, Domin na kiyaye kaina daga mugunta.

²⁴Don haka ya sāka mini, domin ni adali ne, Gama ya sani ni marar laifi ne.

²⁵Kai, ya Ubangiji, mai aminci ne ga masu aminci, Kai nagari ne, cikakke ga kamilai.

²⁶Kai Mai Tsarki ne ga waɗanda suke tsarkaka, Amma kana gāba da mugaye.

²⁷Kakan ceci masu tawali'u, Amma kakan ƙasƙantar da masu girmankai.

²⁸Ubangiji yakan ba ni haske, Allah yakan kawar da duhuna.

²⁹Yakan ba ni ƙarfin da zan fāɗa wa magabtana, Da ikon rinjayar kagararsu.

³⁰Wannan Allah dai! Ayyukansa kamiltattu ne ƙwarai, Maganarsa abar dogara ce! Kamar garkuwa yake, ga duk mai neman taimako a wurinsa.

³¹Ubangiji shi kaɗai ne Allah, Allah ne kaɗai kāriyamu.

³²Shi ne Allahn da yake ƙarfafa ni, Yana kiyaye lafiyata a kan hanya.

³³Yana sa in tabbata lafiya nake tafiya, kamar barewa. Yana kiyaye ni lafiya a kan duwatsu.

³⁴Yakan horar da ni don yaƙi, Domin in iya amfani da baka mafi ƙarfi.

³⁵Ya Ubangiji ka kiyaye ni, ka cece ni, Na zama babban mutum saboda kana lura da ni, Ikonka kuma ya kiyaye lafiyata.

³⁶Ka tsare ni, ba a kama ni ba, Ban kuwa taɓa fāɗuwa ba.

³⁷Na kori magabtana, har na kama su, Ba zan tsaya ba, sai na yi nasara da su.

³⁸Zan buge su har ƙasa, ba kuwa za su tashi ba, Za su fāɗi ƙarƙashin ƙafafuna.

³⁹Kakan ba ni ƙarfin yin yaƙi, Kakan ba ni nasara a kan magabtana.

⁴⁰Ka kori magabtana daga gare ni, Zan hallaka waɗanda suke ƙina.

⁴¹Suna kukan neman taimako, amma ba wanda zai iya cetonsu, Za su yi kira ga Ubangiji, amma ba zai amsa ba.

⁴²Zan murƙushe su har su zama ƙura Wadda iska take kwashewa, Zan tattake su kamar caɓi a titi.

⁴³Ka cece ni daga mutane masu tawaye, Ka naɗa ni in yi mulkin sauran al'umma, Jama'ar da ban san ta ba, ta zama abin mulkina.

⁴⁴Za su yi biyayya sa'ad da suka ji ni, Baƙi za su rusuna mini,

⁴⁵Za su karai, Su fita, suna rawar jiki daga kagaransu.

⁴⁶Ubangiji mai rai ne! Yabo ya tabbata ga mai kāre ni! Allah ne, Mai Cetona! A yi shelar girmansa!

⁴⁷Yakan ba ni nasara a kan magabtana, Yakan sa jama'a a ƙarƙashina,

⁴⁸Yakan cece ni daga maƙiyana. Ka ba ni nasara a kan magabtana, ya Ubangiji, Ka kiyaye ni daga mutane masu kama-karya,

⁴⁹Don haka zan yabe ka a cikin al'ummai, Zan raira maka yabo.

⁵⁰Kullayaumi Allah yakan ba sarkin da ya naɗa babbar nasara. Yakan nuna madawwamiyar ƙauna ga wanda ya zaɓa, Wato Dawuda da zuriyarsa har abada.