Read gungbe PSALM 21 Bible Online

PSALM 21 - gungbe bible

PSALM 21

¹Sarki yana murna, ya Ubangiji, Domin ka ba shi ƙarfi, Yana cike da farin ciki, Don ka sa ya ci nasara.

²Ka biya masa bukatarsa, Ka amsa roƙonsa.

³Ka zo gare shi da albarka mai yawa, Ka sa kambin zinariya a kansa.

⁴Ya roƙi rai, ka kuwa ba shi mai tsawo, Da yawan kwanaki.

⁵Darajarsa tana da girma saboda taimakonka, Ka sa ya yi suna da martaba.

⁶Albarkarka tana a kansa har abada, Kasancewarka tare da shi, takan cika shi da murna.

⁷Sarki yana dogara ga Maɗaukaki, Saboda madawwamiyar ƙaunar Ubangiji Zai zama sarki har abada.

⁸Sarki zai kakkama dukan magabtansa, Zai kakkama duk waɗanda suke ƙinsa.

⁹Ubangiji zai hallaka su kamar harshen wuta, sa'ad da ya bayyana. Ubangiji zai cinye su a cikin fushinsa, Wuta kuma za ta cinye su ƙurmus.

¹⁰Sarki zai karkashe 'ya'yansu duka, Zai yanyanke dukan zuriyarsu.

¹¹Sun ƙulla mugayen dabaru, suna fakonsa, Amma ba za su yi nasara ba.

¹²Zai harba kibansa a kansu, Ya sa su juya su gudu.

¹³Ya Ubangiji, ka zo da ƙarfinka! Za mu raira waƙa mu yabi ikonka.