Read gungbe PSALM 34 Bible Online

PSALM 34 - gungbe bible

PSALM 34

¹Zan yi godiya ga Ubangiji kullayaumin, Faufau ba zan taɓa fasa yabonsa ba.

²Zan yabe shi saboda abin da ya yi, Da ma dukan waɗanda suke da tawali'u su kasa kunne, su yi murna!

³Ku yi shelar girman Ubangiji tare da ni, Mu yabi sunansa tare!

⁴Na yi addu'a ga Ubangiji, ya kuwa amsa mini, Ya kuɓutar da ni daga dukan tsorona.

⁵Waɗanda ake zalunta suka dube shi suka yi murna, Ba za su ƙara ɓacin rai ba.

⁶Marasa galihu suka yi kira gare shi, ya kuwa amsa. Ya cece su daga dukan wahalarsu.

⁷Mala'ikansa yana tsaron waɗanda suke tsoron Ubangiji, Ya cece su daga hatsari.

⁸Ku gane da kanku yadda Ubangiji yake da alheri! Mai farin ciki ne mutumin da ya sami kwanciyar rai a wurinsa!

⁹Ku yi tsoron Ubangiji ku jama'arsa duka, Masu tsoronsa suna da dukan abin da suke bukata.

¹⁰Har zakoki sukan rasa abinci su ji yunwa, Amma masu biyayya ga Ubangiji, Ba abu mai kyau da sukan rasa.

¹¹Ku zo, ku abokaina, ku kasa kunne gare ni, Zan koya muku ku ji tsoron Ubangiji.

¹²Kuna so ku ji daɗin rai? Kuna son tsawon rai da farin ciki?

¹³To, ku yi nisa da mugun baki, Da faɗar ƙarairayi.

¹⁴Ku rabu da mugunta, ku aikata alheri, Ku yi marmarin salama, ku yi ƙoƙarin samunta.

¹⁵Ubangiji yana lura da adalai, Yana kasa kunne ga koke-kokensu,

¹⁶Amma yana ƙin masu aikata mugunta, Saboda haka har mutanensu sukan manta da su.

¹⁷Adalai sukan yi kira ga Ubangiji, yakan kuwa kasa kunne, Yakan cece su daga dukan wahalarsu.

¹⁸Ubangiji yana kusa da waɗanda suka karai, Yakan ceci waɗanda suka fid da zuciya.

¹⁹Mutumin kirki yakan sha wahala da yawa, Amma Ubangiji yakan cece shi daga cikinsu duka.

²⁰Ubangiji yakan kiyaye shi sosai, Ba ko ɗaya daga cikin ƙasusuwansa da zai karye ba.

²¹Mugunta za ta kashe mugu, Waɗanda suke ƙin adalai za a hukunta su.

²²Ubangiji zai fanshi bayinsa, Waɗanda suka tafi wurinsa neman mafaka Za a bar su da rai.