Read gungbe PSALM 37 Bible Online

PSALM 37 - gungbe bible

PSALM 37

¹Kada ka damu saboda mugaye, Kada ka yi ƙyashin masu aikata abin da ba daidai ba.

²Za su shuɗe kamar busasshiyar ciyawa, Za su mutu kamar yadda tsire-tsire suke bushewa.

³Ka dogara ga Ubangiji ka aikata nagarta, Ka zauna a ƙasar, ka sami lafiya.

⁴Ka nemi farin cikinka a wurin Ubangiji, Zai kuwa biya maka bukatarka.

⁵Ka miƙa kanka ga Ubangiji, Ka dogara gare shi, zai kuwa taimake ka.

⁶Zai sa nagartarka ta haskaka kamar haske, Adalcinka kuma yă haskaka kamar tsakar rana.

⁷Ka natsu a gaban Ubangiji, Ka yi haƙuri, ka jira shi, Kada ka damu da waɗanda suke da dukiya, Ko su da suka yi nasara da aikata mugayen shirye-shiryensu.

⁸Kada ka yi fushi, kada ka hasala! Kada ka damu! Gama ba zai yi maka amfanin kome ba.

⁹Waɗanda suka dogara ga Ubangiji, Za su yi zamansu lafiya a ƙasar, Amma za a kori mugaye.

¹⁰A ɗan ƙanƙanen lokaci mugaye za su shuɗe, Za ka neme su, amma ba za a same su ba,

¹¹Amma masu ladabi za su zauna lafiya a ƙasar, Su ji daɗin cikakkiyar salama.

¹²Mugu yakan yi wa mutumin kirki makarƙashiya, Yana harararsa da ƙiyayya.

¹³Ubangiji yana yi wa mugu dariya, Domin Ubangiji ya sani ba da daɗewa ba mugun zai hallaka.

¹⁴Mugaye sun zare takuba, Sun tanƙware bakkunansu Don su kashe matalauta da masu bukata, Su karkashe mutanen kirki.

¹⁵Amma takubansu za su sassoke su, Za a kakkarya bakkunansu.

¹⁶Ƙanƙanen abin da mutumin kirki yake da shi, Ya fi dukan dukiyar mugaye amfani,

¹⁷Gama Ubangiji zai raba mugaye da ƙarfinsu, Amma zai kiyaye mutanen kirki.

¹⁸Ubangiji yana kula da masu yi masa biyayya, Ƙasar kuwa za ta zama tasu har abada.

¹⁹Ba za su sha wahala a lokacin tsanani ba, Za su sami yalwa a lokacin yunwa.

²⁰Amma mugaye za su mutu, Magabtan Ubangiji kuwa za su shuɗe kamar furen jeji, Za su ɓace kamar hayaƙi.

²¹Mugu yakan ci bashi, yă ƙi biya, Amma mutumin kirki mai alheri ne, Mai bayarwa hannu sake.

²²Waɗanda Ubangiji ya sa wa albarka, Za su zauna lafiya lau a ƙasar, Amma waɗanda ya la'anta Za a kore su su fita.

²³Ubangiji yakan bi da mutum lafiya A hanyar da ya kamata yă bi, Yakan ji daɗin halinsa,

²⁴In ya fāɗi, ba zai yi warwar ba, Gama Ubangiji zai taimake shi Yă tashi tsaye.

²⁵Yanzu dai na tsufa, ni ba yaro ba ne, Amma ban taɓa ganin Ubangiji ya yar da mutumin kirki ba, Ko kuma a ga 'ya'yansa suna barar abinci.

²⁶A koyaushe yakan bayar a sake, Yana ba da rance ga waɗansu, 'Ya'yansa kuwa dalilin albarka ne.

²⁷Ka rabu da mugunta ka aikata nagarta, Za ka kuwa zauna a ƙasar har abada,

²⁸Gama Ubangiji yana ƙaunar abin da yake daidai, Ba ya rabuwa da amintattun jama'arsa, Yana kiyaye su koyaushe, Amma za a kori zuriyar mugaye.

²⁹Adalai za su yi zamansu lafiya a ƙasar, Su gāje ta har abada.

³⁰Kalmomin mutumin kirki suna da hikima, Yana faɗar abin da yake daidai.

³¹Yakan riƙe dokar Allahnsa a zuciyarsa, Ba ya kauce mata, faufau.

³²Mugu yakan yi fakon mutumin kirki, Yă yi ƙoƙari yă kashe shi,

³³Amma Ubangiji ba zai bar shi a hannun magabtansa ba, Ko kuwa yă bari a kāshe shi Sa'ad da ake masa shari'a.

³⁴Ka sa zuciyarka ga Ubangiji Ka kiyaye dokokinsa, Shi zai ba ka ƙarfin da za ka mallaki ƙasar, Za ka kuwa ga an kori mugaye.

³⁵Na ga wani mugu, azzalumi, Ya fi kowa tsayi, Kamar itacen al'ul na Lebanon,

³⁶Amma bayan ƙanƙanen lokaci, Da na zaga, ban gan shi ba, Na neme shi, amma ban same shi ba.

³⁷Dubi mutumin kirki, ka lura da adali, Mutumin salama yakan sami zuriya,

³⁸Amma za a hallaka masu zunubi ƙaƙaf, Za a kuma shafe zuriyarsu.

³⁹Ubangiji yakan ceci adalai, Ya kiyaye su a lokatan wahala.

⁴⁰Yakan taimake su, yă kuɓutar da su, Yakan cece su daga mugaye, Gama sukan zo wurinsa don yă kāre su.