Read gungbe PSALM 39 Bible Online

PSALM 39 - gungbe bible

PSALM 39

¹Na ce, “Zan yi hankali da abin da nake yi, Don kada harshena yă sa ni zunubi, Ba zan ce kome ba sa'ad da mugaye suke kusa.”

²Na yi shiru, ban ce kome ba, Ko a kan abin da suke da kyau! Amma duk da haka wahalata sai ƙaruwa take yi,

³Zuciyata kuwa ta cika da taraddadi, Bisa ga yawan tunanina, haka yawan wahalata zai zama, Dole ne in yi ta tambaya,

⁴“Ya Ubangiji, kwana nawa zan yi a duniya? Yaushe zan mutu? Ka koya mini ranar da ajalina zai auko.

⁵“Ga shi, ka gajerta yawan kwanakina! Yawan kwanakina a wurinka kamar ba kome ba ne. Hakika duk mutum mai rai, Bai fi shaƙar iska ba.

⁶Bai kuma fi inuwa ba! Duk abin da yake yi banza ne, Yakan tara dukiya, amma bai san wanda zai more ta ba!

⁷“A kan me zan sa zuciya, ya Ubangiji? A gare ka nake dogara.

⁸Ka cece ni daga dukan zunubaina, Kada ka bar wawaye su yi mini ba'a.

⁹Zan yi shiru, ba zan ce kome ba, Saboda ka sa na sha wahala haka.

¹⁰Kada ka ƙara hukunta ni! Na kusa mutuwa saboda bugun da kake yi mini!

¹¹Kakan hukunta zunuban mutum ta wurin tsautawarka, Kamar yadda asu yake lalata abu. Hakika mutum bai fi shaƙar iska ba!

¹²“Ka ji addu'ata, ya Ubangiji, Ka kuma kasa kunne ga roƙona, Kada ka yi shiru sa'ad da na yi kuka gare ka! Yadda dukan kakannina suka yi, Ni baƙonka ne na ɗan lokaci.

¹³Ka ƙyale ni ko zan sami kwanciyar rai, Kafin in tafi, ai, tawa ta ƙāre.”