Read gungbe PSALM 45 Bible Online

PSALM 45 - gungbe bible

PSALM 45

¹Kwanyata ta cika da kyawawan kalmomi, Lokacin da nake tsara waƙar sarki, Harshena kuwa kamar alkalami ne na ƙwararren marubuci.

²Kai ne mafi kyau a cikin dukan mutane, Kai mai kyakkyawan lafazi ne, Kullum Allah yakan sa maka albarka!

³Ka sha ɗamara da takobinka, ya Maɗaukakin Sarki, Kai mai iko ne, Maɗaukaki!

⁴Ka yi hawan ɗaukaka zuwa nasara, Domin ka tsare gaskiya da adalci. Saboda ikonka za ka yi babban rinjaye.

⁵Kibanka suna da tsini, Suna huda zuciyar abokan gābanka, Al'ummai suna fāɗuwa ƙasa a ƙafafunka.

⁶Kursiyinka, ya Allah, zai dawwama har abada abadin! Kana mulkin mallakarka da adalci.

⁷Kana ƙaunar abin da yake daidai, Kana ƙin abin da yake mugu. Saboda haka Allah, Allahnka, ya zaɓe ka, Ya kuwa kwararo maka farin ciki mai yawa fiye da kowa.

⁸Tufafinka suna ƙanshin turaren mur, da na aloyes, da na kashiya, A kowace fādar hauren giwa, mawaƙa suna yi maka waƙar.

⁹Daga cikin matan da suke fadarka, har da 'ya'yan sarakuna. A daman kursiyinka kuwa ga sarauniya a tsaye. Tana saye da kayan ado na zinariya mafi kyau duka.

¹⁰Ki ji abin da zan faɗa, ya ke amaryar sarki, Ki manta da mutanenki da danginki.

¹¹Saboda ke kyakkyawa ce sarki zai so ki, Shi ne maigidanki, sai ki yi masa biyayya.

¹²Mutanen Taya za su kawo miki kyautai, Attajirai za su zo su sami farin jini a gare ki.

¹³Gimbiya tana fāda, kyakkyawa ce ainun, Da zaren zinariya aka saƙa rigarta,

¹⁴Aka kai ta wurin sarki tana saye da riga mai ado. Ga 'yan matanta a biye, Aka kawo su wurin sarki.

¹⁵Da farin ciki da murna suka zo, Suka shiga fādar sarki.

¹⁶Za ka haifi 'ya'ya maza da yawa, Waɗanda za su maye matsayin kakanninka, Za ka sa su zama masu mulkin duniya duka.

¹⁷Waƙata za ta sa a yi ta tunawa da sunanka har abada, Dukan jama'a za su yabe ka a dukan zamanai masu zuwa.