Read gungbe PSALM 48 Bible Online

PSALM 48 - gungbe bible

PSALM 48

¹Ubangiji mai girma ne, Dole kuwa a yabe shi da girmamawa a birnin Allahnmu, A kan tsattsarkan dutsensa.

²Dutsen Sihiyona, dutse mai tsawo, Mai kyan gani ne na Allah, Birnin babban Sarki. Yakan kawo farin ciki ga dukan duniya!

³Allah ya nuna akwai zaman lafiya a wurinsa, A kagarar birnin.

⁴Sarakuna suka tattaru, Suka zo Dutsen Sihiyona,

⁵Da suka gan shi sai suka yi mamaki, Suka tsorata suka gudu.

⁶Tsoro ya kama su suka razana, Kamar mace wadda take gab da haihuwa.

⁷Allah yakan hallaka manyan jiragen ruwa da iskar gabas.

⁸Mun ji labarin waɗannan al'amura, Yanzu kuwa mun gan su A birnin Allahnmu, Mai Runduna, Zai kiyaye birnin lafiya har abada.

⁹A cikin Haikalinka, ya Allah, Muna tunanin madawwamiyar ƙaunarka.

¹⁰A ko'ina jama'a suna yabonka, Sunanka ya game duniya duka. Kana mulki da adalci.

¹¹Bari jama'ar Sihiyona su yi murna! Gama kana shari'a ta gaskiya, Bari biranen Yahuza su yi farin ciki.

¹²Ku tafi ku kewaye Dutsen Sihiyona, Ku ƙirga yawan hasumiyarsa.

¹³Ku lura da garukanta, ku bincike kagaranta, Saboda ku iya faɗa wa tsara mai zuwa,

¹⁴Cewa wannan Allah shi ne Allahnmu har abada abadin, Shi ne zai bishe mu a dukan zamanai masu zuwa.